රනිල්ගේ මොළයටත් බලපෑම්-අද උසාවි එන එක ෂුවර් නැති බව UNP සංවිධායක දොස්තර බෙල්ලන කියයි (VIDEO)

එක්සත් ජාතික පක්ෂයේ සංවිධායක ධුරයකින්ද පිදුම් ලද, කොළඹ ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලනට අනුව, හිටපු ජනාධිපති රනිල් වික්‍රමසිංහ අද උදෑසන දක්වා දැඩි සත්කාර ඒකකයේ රැඳී සිටිනු ඇත.

පෞද්ගලික විදේශ සංචාරයක් සඳහා රුපියල් මිලියන 16.6 කට අධික මහජන අරමුදල් අවභාවිත කිරීමේ චෝදනාව මත පසුගිය සිකුරාදා සිට රක්ෂිත බන්ධනාගාරගත කර සිටින රනිල් වික්‍රමසිංහ අද කොළඹ කොටුව මහේස්ත්‍රාත් අධිකරණයට ඉදිරිපත් කිරීමට නියමිතය.

විශේෂඥ වෛද්‍ය මණ්ඩලයක් විසින් රනිල් වික්‍රමසිංහගේ තත්ත්වය බරපතල බව තක්සේරු කර ඇති බවත්, දැඩි සත්කාර ඒකකයේ ඔහුව නිරීක්ෂණය කිරීමට තීරණය කළ බවත් වෛද්‍ය බෙල්ලන පවසයි.

වෛද්‍යවරුන් තවමත් සවිස්තරාත්මක වෛද්‍ය වාර්තාවක් සකස්කරමින් සිටින බවත්, අද උදෑසන වැඩිදුර ඇගයීමක් සිදුකරන බවත් ඔහු සඳහන් කරයි.

රනිල් වික්‍රමසිංහට විජලන තත්වයක් ඇතුළු සංකූලතා වර්ධනය වී ඇති බවත්, හදවතට, වකුගඩුවලට සහ මොළයට පවා බලපෑම් ඇති කළ හැකි බවත් වෛද්‍ය බෙල්ලන තවදුරටත් පැහැදිලි කළේය.

එහි ප්‍රතිඵලයක් ලෙස, ඊයේ දහවල් ඔහුව MRI ස්කෑන් පරීක්ෂණයකට භාජනය කර තිබේ.

නියමිත පරීක්ෂණ සහ ප්‍රතිකාර නොමැතිව මෙම සංකූලතා තවත් උග්‍ර විය හැකි බවත්, ICU හි වෛද්‍ය සහ හෙද කාර්ය මණ්ඩලය ඔහුව ස්ථාවර කිරීමට කටයුතු කරමින් සිටින බවත් ඔහු සඳහන් කරයි.

ඉදිරි දින හෝ දෙක ඇතුළත ඔහුගේ තත්ත්වය යහපත් අතට හැරෙනු ඇතැයි වෛද්‍යවරු විශ්වාස කරන බවත් ඔහු පවසයි.

පවුලේ සාමාජිකයන්ට සහ පවුලේ අනුමැතිය ලත් පුද්ගලයන්ට පමණක් රනිල් වික්‍රමසිංහ හමුවීමට අවසර ඇති බවත්, අනෙක් අයට දැඩි සත්කාර ඒකකයේ දොරටුව දක්වා පමණක් පැමිණීමට අවසර ඇති බවත් ඔහු අවධාරණය කරයි.