රාජිතගේ දේපල තහනම ඉවතට! 29 උසාවි එන්න කියා තිබියදී අල්ලස් කොමිසම 26 ඇවිත් දේපළ තහනමක් ඉල්ලා!

හිටපු අමාත්‍ය රාජිත සේනාරත්න මහතාගේ දේපළ තහනම් කරන ලෙස අල්ලස් කොමිසම කරන ලද ඉල්ලීමක් කොළඹ ප්‍රධාන මහේස්ත්‍රාත් අසංග එස්. බෝදරගම මහතා ඊයේ (26) ප්‍රතික්ෂේප කර තිබේ.

මෙම නඩුවේ ඉදිරි දිනය වන 29 වැනිදා මෙම ඉල්ලීම සිදුකරන ලෙසට ප්‍රධාන මහේස්ත්‍රාත්වරයා විසින්  අල්ලස් කොමිසමට දැනුම් දෙන ලදී.

අධිකරණයට ගෙන්වාගත නොහැකිව සැඟව සිටින වරෙන්තු කරුවෙකුට අධිකරණයට එන්නැයි බලකරමින් ප්‍රකාශන නියෝගයක් නිකුත් කර දින තිහක කාලයකට පසුව ඔහුගේ දේපළ තහනම් කිරීම අධිකරණ නඩු විධාන සංග්‍රහයේ සඳහන් ව්‍යවස්ථා ප්‍රතිපාදනය බව පෙන්වා දුන් මහේස්ත්‍රාත්වරයා, දින 30ක් පසුවීමෙන් පසුව දේපළ තහනම් කිරීමේ නියෝගයක් ලබා ගැනීමට ඊයේ දින නිකුත් කරන නියෝගය කිසිදු බලපෑමක් නොවන බවද සඳහන් කළේය.

සැකකාර සේනාරත්න ගේ කොළඹ කඩුවෙල පිහිටි රුපියල් කෝටි තුනක් වටිනා දේපළක් තහනම් කරන්නැයි ඉල්ලා අල්ලස් කොමිසම ගොනු කළ මෝෂම සම්බන්ධයෙන් සිය නියෝගය ප්‍රකාශයට පත් කරමින් මහේස්ත්‍රාත්වරයා  එසේ පැවසීය.

2012 මැයි මස 10 දින  SCO.WOOD CO.LMT නැමැති කොරියානු සමාගම විසින් කිරින්ඳ ධීවර වරායේ වැලි කැණීම්කර , එම වැලි දේශීය වෙළඳපොළට නිකුත් කළ හැකි පරිදි ව්‍යාපෘතියක් පවත්වාගෙන ගෙන යාමට අනීතිකව අවසර ලබා දෙමින් රජයට රුපියල් ලක්ෂ 262ක් පාඩු කිරීම සම්බන්ධයෙන් අල්ලස් කොමිසම මෙම පැමිණිල්ල ගොනුකර ඇත.

ඉදිරිපත් කළ කරුණු සලකා බැලූ ප්‍රධාන මහේස්ත්‍රාත්වරයා සැකකරුට නිකුත් කළ ප්‍රකාශන නියෝගය අනුව ඔහු ලබන 29 වැනි දින අධිකරණය හමුවේ පෙනී සිටිය යුතු බවත්, අධිකරණ නඩු විධාන සංග්‍රහය ප්‍රකාරව අධිකරණයට ගෙන්වා ගත නොහැකි සැකකරුවකු ගේ දේපළ තහනම් කිරීම ව්‍යවස්ථාපිත ප්‍රතිපාදන අනුව දින තිහක කාලයක් තුළ ඔවුන් නොපැමිණියහොත් සිදු කළ යුතු බවට සඳහන් වන හෙයින් අදාල ඉල්ලීම මේ මොහොතේ ප්‍රතික්ෂේප කරන බවට නියෝග කළේය.