ජ්‍යෙෂ්ඨ නීතිඥයෙකුට, මීගමුව අතිරේක මහේස්ත්‍රාත්තුමියගෙන් තරයේ අවවාද සහ දැඩි නියෝග!

ශ්‍රී ලංකා රේගුව මඟින් මෙරට ගුවන්තොටුපළකදී අත්අඩංගුවට ගත් වැඩිම ” කුෂ් ” නමැති මත්ද්‍රව්‍ය තොගය වූ කිලෝ ග්‍රෑම් 46, ග්‍රෑම් 60 ක් සමගින් අත්අඩංගුවට ගත් ගුවන් සේවිකාවක ලෙස සේවය කළ, 21 හැවිරිදි , ” චාලට් මේ ලී ” නමැති ⁣බ්‍රිතාන්‍ය ජාතික,කාන්තාව සම්බන්ධයෙන් පවත්වන නඩු විභාගයේ තවත් එක් නඩුවාරයක් ඊයේ (20/08/2025) පෙරවරුවේදී විභාගයට ගැනිණි.

ඒ මීගමුව මහේස්ත්‍රාත් අධිකරණයේ ශාලා අංක 02 හී, මීගමුව අතිරේක මහේස්ත්‍රාත් දර්ශිමා ප්‍රේමරත්න මහත්මිය ඉදිරියේදීය.

එහිදී මෙම ජ්‍යෙෂ්ඨ නීතිඥවරයා පැමිණ අධිකරණ සිරමැදිරියේ සිටි බ්‍රිතාන්‍ය ජාතික තම සේවාදායිකාව සමග කතා කිරීමට, මීගමුව බන්ධනාගාර නිලධාරීන්ගෙන් අවසර ඉල්ලා ඇත. ඒ පිළිබඳව අවධානයෙන් සිටි බන්ධනාගාර නිලධාරීන්ට දැකගත හැකි වූයේ එම නීතිඥයා තම ජංගම දුරකථනය ගෙන, එය ක්‍රියාත්මක කර එය ඔහුගේ කළු පැහැති කෝට් සාක්කුවේ දමා ගන්නා ආකාරයයි. එලෙසම ඒ අවස්ථාවේ මෙම නීතිඥයා අධිකරණ සිරමැදිරිය තුළ සිටි එම සැකකාර විදේශික කාන්තාවට ඉතාම ලංවී කතා කරන ආකාරය ද එම බන්ධනාගාර නිලධාරීන්ට නිරීක්ෂණය විය. ඒ පිළිබඳව විමසිලිමත්ව සොයා බැලූ එම නිලධාරීන්ට වැඩිදුරටත් නිරීක්ෂණය වූයේ එම නීතිඥයා දුරකථන ඇමතුමක් ගන්නා බවය. එම නීතිඥයා දුරකථන ඇමතුමක් ගන්නා බව හොඳින් තහවුරු වීමෙන් පසුව, එහිදී ක්‍රියාත්මක වූ එම බන්ධනාගාර නිලධාරීන් එම ජංගම දුරකථනය තමන් භාරයට ගෙන අධිකරණය තුළ එම නඩු විභාගයට කැඳවනු ලැබූ අවස්ථාවේදී අතිරේක මහේස්ත්‍රාත්තුමිය වෙත එම දුරකථනයද ඉදිරිපත් කරමින් එම සිදුවීම සම්බන්ධව කරුණු වාර්තා කලේය. ඒ අනුව එම බන්ධනාගාර නිලධාරියා අධිකරණයේදී මෙලෙස ප්‍රකාශයක් කළේය.

“” ගරු මැතිනියනි, මේ නීතිඥවරයා ඒ සිර මැදිරියේ සිටින එංගලන්ත ජාතික සැකකාර කාන්තාව සමග කතා කිරීමට අවශ්‍ය බව පවසා ඒ ස්ථානයට ගියා.අපි ඒ පිළිබඳව අවධානයෙන් සිටියේ.ඔහු දුරකථනය අරගෙන ඔහුගේ කෝට් එකේ උඩ සාක්කුවේ දාගෙන යමක් කරන බව වැටහී ගියා. අපි ක්‍රියාත්මක වෙලා, ඒ දුරකථනය අපේ භාරයට ගත්තා. ගරු මැතිනියනී, මීට පෙරත් මෙම සැකකාරිය බලන්න බන්ධනාගාරයට පැමිණි පුද්ගලයෙකු බොත්තමක් වැනි කැමරාවක් මගින් බන්ධනාගාරය ගැන වීඩියෝ කරලා ,ඒ වීඩියෝ පටය මුළු ලොව පුරාම බෙදාහැරියා. මේකත් එවැනි ආකාරයට මාධ්‍යයට ගියා නම් අපේ රැකියාවත් ඉවරයි. ඒ නිසා ගරු මැතිනියනි, මේ සම්බන්ධව සුළුවෙන් නොතකා සුදුසු ක්‍රියාමාර්ගයක් ගන්නා ලෙස ඉල්ලා සිටිනවා””.

ඉන්පසුව එම අධිකරණ නිලධාරීන් එම ජංගම දුරකථනය මහේස්ත්‍රාත්තුමිය වෙත ඉදිරිපත් කල අතර එහිදී එම නීතිඥයා නිදහසට කරුණු දක්වමින් ප්‍රකාශ කලේ ඇගේ මව අසනීපෙන් පසුවන බවත් ,ඇගේ ඉල්ලීම මත දුරකථන ඇමතුමක් ⁣ලබා දුන් බවය. එහිදී ඔහු මහේස්ත්‍රාත්තුමියගෙන් ඉල්ලා සිටියේ එය නොදැනුවත්ව සිදු වූ වරදක් බැවින් සමාව දෙන ලෙසයි. එහෙත් ඊට විරුද්ධත්වය ප්‍රකාශ කළ බන්ධනාගාර නිලධාරින් පැවසුවේ , මෙම සැකකාරියට දින 14 කට වරක් ඇගේ රටට වීඩියෝ මගින් දුරකථන ඇමතුම් ලබා ගැනීමට බන්ධනාගාරයෙන් කටයුතු සලසා දෙන බවයි. එලෙස තිබියදී මේ ආකාරයෙන් හැසිරීම නීතිඥයෙකුට සුදුසු නොවන බවද එම නිලධාරීන් අධිකරණය හමුවේ ප්‍රකාශ කළහ.

මෙහිදී මීගමුව අතිරේක මහේස්ත්‍රාත්තුමිය ප්‍රකාශ කළේ , මේ සම්බන්ධයෙන් ශ්‍රේෂ්ඨාධිකරණයට කරුණු වාර්තා කළහොත්, තමන්ගේ නීතිඥභාවය ද අහෝසි විය හැකි බවත්, නීතිඥයින්ට අධිකරණය තුළට දුරකථන ගෙන ඒමට අවසර දී ඇත්තේ රාජකාරී කටයුතු වලට පමණක් බවත්, මෙවැනි විෂමාචාර ක්‍රියාවලට නොවන බවයි. ඒ නිසා මේ පළමු අවස්ථාව බැවින් , ඒ සඳහා සමාව දෙන බවත්, මින් ඉදිරියට මේ නඩුවට පෙනී සිටීම තහනම් කරන අතර මෙම නඩුව අධිකරණය තුළ පැවැත්වෙන අවස්ථාවේදී අධිකරණයට නොපැමිණෙන ලෙසත් නියෝග කර එම ජංගම දුරකථනය එම නීතිඥයාට ලබා දෙන ලදී.

එමෙන්ම ” චාලට් මේ ලි ” නමැති මෙම සැකකාර කාන්තාව එළඹෙන සැප්තැම්බර් 03 වැනිදා (03/09/2025) දක්වා නැවත රක්ෂිත බන්ධනාගාර ගත කරන ලෙසද අතිරේක මහේස්ත්‍රාත්තුමිය විසින් මෙහිදී නියෝග කළාය.

බ්‍රිතාන්‍යයේ, දකුණු ලන්ඩනයේ සිට ඉකුත් මැයි මස 13 දින මෙරටට පැමිණි ” චාලට් මේ ලී ” නැමැති මෙම සැකකාර කාන්තාව කටුනායක ජාත්‍යන්තර ගුවන් තොටුපළේදී ශ්‍රී ලංකා රේගු නිලධාරීන් විසින් අත්අඩංගුවට ගන්නා ලදී. මෙරටට නීති විරෝධීව ” කුෂ් ” නමැති මත්ද්‍රව්‍ය ගෙන ඒමට උත්සාහ කළ බවට ,රේගු නිලධාරීන් විසින් ඇයට චෝදනා එල්ල කර තිබිණි. එහිදී ඇය කියා සිටියේ තම ගමන් මලු වල මත්ද්‍රව්‍ය ඇති බව දැන සිටීම ඇය ප්‍රතික්ෂේප කරන බවත්, ඒවා කිසිවෙකු විසින් ඇගේ ගමන් මලු වල තැන්පත් කර ඇති බවයි.

මේ අනුව ඇය මේ වන විට දින 90 කට අධික කාලයක් රක්ෂිත බන්ධනාගාර ගතව සිටින අතර ඇය බැලීමට ඇයගේ පවුලේ කිසිවෙක් මෙරටට නොපැමිණීමත්, එලෙසම අධිකරණයටද ඥාතීන් කිසිවෙකු නොපැමිණීමත් විශේෂත්වයකි.

ඇය වෙනුවෙන් පෙනී සිටින නීතිඥවරුන් සඳහන් කළේ ඇය වෙනුවෙන් ඇප ලබා ගැනීම සඳහා ඇප අයදුම් පතක් මීගමුව මහාධිකරණය වෙත ඉදිරිපත් කර ඇති බවයි.