පාතාලයකුගෙන් ලක්ෂ 3ක් ලබා ගත් බන්ධනාගාර රෝහලේ නි. අධ්‍යක්ෂ රිමාන්ඩ්!

අල්ලස් කොමි­සම විසින් අත්අ­ඩං­ගු­වට ගනු ලැබූ හිටපු බන්ධ­නා­ගාර රෝහල් නියෝජ්‍ය අධ්‍ය­ක්ෂ­ව­රයා ලෙස කට­යුතු කළ හේමන්ත රණ­සිංහ මහතා මේ මස 19 වැනිදා දක්වා රක්ෂිත බන්ධ­නා­ගා­ර­ගත කරන ලෙස කොළඹ අති­රේක මහේ­ස්ත්‍රාත් මංජුල රත්නා­යක මහතා ඊයේ (13) නියෝග කළේය.

වැලි­කඩ බන්ධ­නා­ගාර රෝහලේ නේවා­සි­කව ප්‍රති­කාර ලබ­මින් සිටි ප්‍රබල මත්ද්‍රව්‍ය ජාවා­ර­ම්ක­රු­වකු වන ආමි අසංක නමැත්තා තව­දු­ර­ටත් එහි නේවා­සි­කව රඳ­වා­ගෙන ප්‍රති­කාර කිරී­මට රුපි­යල් ලක්ෂ තුනක අල්ල­සක් ගැනීමේ සිද්ධි­යක් සම්බ­න්ධ­යෙන් ඔහු මින් පෙර අල්ලස් කොමිසම විසින් අත්අඩංගුවට ගනු ලැබීය.

සිද්ධි­යට අදාළ සැක­කරු අල්ලස් කොමි­සමේ විම­ර්ශන නිල­ධා­රීන් ඔහුගේ නිවෙසේ සිට අත්අ­ඩං­ගු­වට ගෙන ඊයේ (13) පස්ව­රුවේ අධි­ක­ර­ණ­යට ඉදි­රි­පත් කිරී­මෙන් අන­තු­රුව මෙලෙස නියෝග කෙරිණි.

සැක­කරු අධි­ක­ර­ණ­යට ඉදි­රි­පත් කර­මින් අල්ලස් හෝ දූෂණ කොමි­ෂන් සභාව වෙනු­වෙන් අධි­ක­ර­ණයේ පෙනී සිටි සහ­කාර අධ්‍යක්ෂ නීති සුලෝ­චනා හෙට්ටි­ආ­රච්චි මහ­ත්මිය පැව­සුවේ සැක­කරු  බන්ධ­නා­ගාර රෝහලේ ප්‍රති­කාර ගනි­මින් සිටි රැඳ­වූ­ව­කු­ගෙන් අල්ලස් මුද­ලක් ලබා ගැනීමේ සිද්ධි­යක් සම්බ­න්ධව අත්අ­ඩං­ගු­වට ගත් බවයි.

“ස්වාමීනි, 2024 වර්ෂ­යේදී බූස්ස බන්ධ­නා­ගා­රයේ සිටි රැඳ­වූ­වකු රෝගී තත්ත්ව­යක් හේතු­වෙන් වැලි­කඩ බන්ධ­නා­ගාර රෝහ­ලට ඇතු­ළත් කර තිබෙ­නවා. එම රැඳ­වියා බන්ධ­නා­ගාර රෝහලේ නේවා­සි­කව ප්‍රති­කාර ගැනී­මෙන් අන­තු­රුව නැවත ඔහු රඳවා සිටි බූස්ස බන්ධ­නා­ගා­ර­යට මාරු නොකර තව­දු­ර­ටත් බන්ධ­නා­ගාර රෝහ­ලේම නේවා­සි­කව රඳ­වා­ගෙන ප්‍රති­කාර සිදු කිරී­මට මේ සැක­කරු අල්ලස් වශ­යෙන් රුපි­යල් ලක්ෂ පහ­ළො­වක් ඉල්ලා තිබෙ­නවා.

එයින් රුපි­යල් ලක්ෂ තුනක මුද­ලක් මොහු ලබා­ගෙන තිබෙ­නවා.  එම රැඳ­වියා බන්ධ­නා­ගාර රෝහලේ සිටී­මට මේ සැක­ක­රු­ගෙන් කළ ඉල්ලී­මක් අනු­වයි, මේ සැක­කරු එම රැඳ­වි­යා­ගෙන් අල්ලස් මුදල ඉල්ලා තිබෙන්නේ. පසුව රැඳ­වි­යාගේ ඥාති­යකු විසින් මොහුගේ බැංකු ගිණු­ම­කට ලක්ෂ තුනක මුද­ලක් බැර කර තිබෙ­නවා.

ස්වාමීනි, මේ තුළින් දූෂ­ණය නමැති වරද සිදුවී තිබෙ­නවා. තව­දු­ර­ටත් විම­ර්ශන කට­යුතු සිදු වන බැවින්  ඇප පන­ත ­ප්‍ර­කා­රව සහ දූෂණ විරෝධී  පනතේ 122 වැනි වග­න්තිය යටතේ සැක­කරු රක්ෂිත බන්ධ­නා­ගා­ර­ගත කරන ලෙස අධි­ක­ර­ණ­යෙන් ඉල්ලා සිටි­නවා.” යැයි සිද්ධිය සම්බ­න්ධ­යෙන් අධි­ක­ර­ණ­යට කරුණු දැක්වූ සුලෝ­චනා හෙට්ටි­ආ­රච්චි මහ­ත්මිය සඳ­හන් කර සිටි­යාය.

කෙසේවෙතත් සැක­කරු වෙනු­වෙන් අධි­ක­ර­ණයේ පෙනී සිටි නීති­ඥ­ව­රයා පැව­සූයේ, සැක­කරු විසින් අදාළ රැඳ­වි­යා­ගෙන් කිසිදු අව­ස්ථා­වක අල්ලස් ඉල්ලා නැති බවයි.

“ස්වාමීනි, මගේ සේවා­දා­ය­කයා අවු­රුදු දහ­යක බන්ධ­නා­ගා­රයේ වෛද්‍ය වෘත්තියේ නියැ­ළුණු  අයෙක්. මගේ සේවා­දා­ය­ක­යාට පෙර වැරදි කිසි­වක් නෑ. අල්ලස් කොමි­සම හමුවේ මගේ සේවා­දා­ය­ක­යාට විරු­ද්ධව පැමි­ණිල්ල කර තිබෙන්නේ ආමි අසංක නමැති රැඳ­වි­යාගේ බිරිය විසින්.

ඔහු බන්ධ­නා­ගාර රෝහලේ ප්‍රති­කාර ලබන විට ඔහු සතුව තිබී ජංගම දුර­ක­තන හසුවී තිබෙ­නවා. එම ජංගම දුර­ක­තන භාවි­ත­යෙන් ඔහු බන්ධ­නා­ගාර රෝහලේ සිටි­යදී  මත්ද්‍රව්‍ය ජාවා­රම ද කර තිබෙ­නවා. ඔහුගේ එම කට­යු­තු­ව­ලට මගේ සේවා­දා­ය­කයා විරුද්ධ වී තිබෙ­නවා. ඒ නිසා එම රැඳ­වි­යාගේ බිරිය මේ ආකා­ර­යෙන් අල්ලස් කොමි­සම හමුවේ පැමි­ණි­ල්ලක් සිදු කර තිබෙන්නේ. මගේ සේවා­දා­ය­කයා කිසිදු අව­ස්ථා­වක අදාළ රැඳ­වි­යා­ගෙන් අල්ලස් මුද­ලක් ඉල්ලා නෑ.

ස්වාමීනි, මගේ සේවා­දා­ය­කයා ව්‍යාපාර කරන අයෙක්. ඒ නිසා ඔහුගේ බැංකු ගිණුම් පිළි­බ­ඳව සොයා ගැනීම අප­හසු වන්නේ නෑ. එවන් වට­පි­ටා­ව­කයි මගේ සේවා­දා­ය­කයා නොදැ­නු­ම්ව­ත්වම මේ මුදල් ඔහුගේ ගිණු­මට බැර වී තිබෙන්නේ. එසේ නොමැ­තිව ඔහු අදාළ රැඳ­වි­යා­ගෙන් ඉල්ලා ලබා ගත් මුද­ලක් නෙවෙයි.

ස්වාමීනි, මේ සිද්ධිය මාස ගණ­න­කට පෙර සිදු වූ සිද්ධි­යක්. අල්ලස් මුද­ලක් ගන්නා අව­ස්ථා­වේදී හෝ මුදල් ඉල්ලා සිටින අව­ස්ථා­ව­කදී නෙවෙයි මගේ සේවා­දා­ය­කයා අත්අ­ඩං­ගු­වට ගැනීම සිදු කළේ. ඔහුගේ නිවෙ­සේදී විම­ර්ශන නිල­ධා­රීන් ඔහු අත්අ­ඩං­ගු­වට ගත්තේ.  මගේ සේවා­දා­ය­ක­යාට විම­ර්ශ­න­යට බල­පෑම් කිරී­මට කිසිදු හැකි­යා­වක් නෑ.

මොහුගේ බිරිය ද පිළිකා රෝගි­යෙක්. කුඩා දරු­වන් තිදෙ­න­කුගේ පියෙක්. මොහුගේ බිරි­යත් අස­නී­ප­යෙන් සිටින අව­ස්ථා­වක මොහු රක්ෂිත බන්ධ­නා­ගා­ර­ගත වුව­හොත් දරු­වන් සහ බිරිය දැඩි පීඩා­ව­කට ලක් වෙනවා. එම නිසා ස්වාමීනි, සුදුසු ඇප­යක් මත මගේ සේවා­දා­ය­කයා මුදා හරින ලෙස අධි­ක­ර­ණ­යෙන් ඉල්ලා සිටි­නවා.” යනු­වෙන් නීති­ඥ­ව­රයා අධි­ක­ර­ණ­යෙන් ඉල්ලීය.

දෙපා­ර්ශ්ව­යෙන්ම ඉදි­රි­පත් වූ කරුණු සලකා බැලූ කොළඹ අති­රේක මහේ­ස්ත්‍රා­ත්ව­රයා සිද්ධි­යට අදාළ සැක­කරු මේ මස 19 වැනිදා දක්වා රක්ෂිත බන්ධ­නා­ගා­ර­ගත කිරී­මට නියෝග කළේය.