බහාලුම් නිදහස් කිරීමෙන් වරදක් වෙලා කියා හෙලිවුනා.. පියවරක් ගන්නවා..- බිමල්

කොළඹ වරායේදී බහාලුම් 309ක් නිසි පරීක්ෂාවකින් තොරව නිදහස් කිරීම සම්බන්ධයෙන් ජනාධිපති කමිටුවක් විසින් වැරදි සිදුව ඇති බවට කරුණු අනාවරණය කර ඇති බව වරාය, නාවික හා සිවිල් ගුවන් සේවා අමාත්‍ය බිමල් රත්නායක මහතා ප්‍රකාශ කරයි.

මෙම සිද්ධිය සම්බන්ධයෙන් ජනාධිපතිවරයා ඉදිරියේදී තීරණයක් ගනු ඇතැයි අමාත්‍යවරයා වැඩිදුරටත් පැවසීය.

අමාත්‍ය රත්නායක මහතා පෙන්වා දුන්නේ විපක්ෂයේ ඇතැම් පිරිස් මෙම සිද්ධිය ඔවුන්ගේ “පරණ පව් වසා ගැනීමට” දේශපාලනිකව භාවිතා කිරීමට උත්සාහ කර “පච වුණු” බවයි.

කෙසේ වෙතත්, මෙම සිද්ධියේ සම්පූර්ණ සත්‍යය ඉදිරියේදී හෙළි වනු ඇති බවට ඔහු විශ්වාසය පළ කලේය.

මෙම සිද්ධිය සම්බන්ධයෙන් පසුගිය මාස කිහිපය පුරා සමාජයේ සහ දේශපාලන ක්ෂේත්‍රයේ දැඩි කතාබහක් ඇති විය.

විවිධ පාර්ශ්වයන් විසින් මෙම බහාලුම් නිදහස් කිරීම පිටුපස විශාල මූල්‍ය වංචාවක් හෝ අක්‍රමිකතාවක් ඇති බවට චෝදනා එල්ල කරනු ලැබුනි.

විශේෂයෙන්ම, මෙම බහාලුම්වල අඩංගු වූ භාණ්ඩ මොනවාද සහ ඒවා නිසි රේගු ක්‍රියාපටිපාටියකින් තොරව නිදහස් කිරීමට හේතුව කුමක්ද යන්න පිළිබඳව විපක්ෂය සහ සිවිල් සංවිධාන විසින් ප්‍රශ්න කරනු ලැබුහ.