සිරි දළදා වන්දනාව සඳහා පැමිණි විශාල පිරිස මහනුවර නගරයට දරාගත නොහැකි තරම් වූ බැවින් බරපතල බෝවන රෝග පැතිරීමේ අවදානමක් ඇති බවට මහජන සෞඛ්‍ය පරීක්ෂකවරුන්ගේ සංගමය අනතුරු අඟවයි.
පාචනය, ඩෙංගු සහ චිකුන්ගුන්යා වැනි රෝග ජනතාව අතර පැතිරීමේ අවදානමක් පවතින බව සංගමයේ සභාපති උපුල් රෝහණ මහතා පැවසීය.
මහනුවර මහ නගර සභාව වාර්තා කර ඇත්තේ දලදා වන්දනා සමයේ එක් දිනක් තුළ එකතු කරන කසළ ප්‍රමාණය සාමාන්‍ය කාලයක නගර සීමේ මාසයකට එකතු කරන කසළ ප්‍රමාණයට සමාන බවය.
ඒවා නිසි ලෙස බැහැර කිරීමට ප්‍රමාණවත් ඉඩක් නොමැති බවත් නගර සභාව පෙන්වා දී ඇත.
විශාල පිරිසට ප්‍රමාණවත් වැසිකිළි පහසුකම් නොමැති වීමේ එහි ප්‍රතිඵලයක් ලෙස මහවැලි ගඟ දෙපස ජනතාව එම කටයුතු සිදු කර ඇති බවත් ඒ හරහා බරපතල පාරිසරික ගැටළු මතුවනු ඇති බවත් හෙතෙම පෙන්වා දෙයි.
ඇතැම් වන්දනාකරුවන් දැනටමත් උණ සහ සමේ රෝගවලින් පෙළෙන බවත්, එමඟින් රෝග පැතිරීමේ අවදානම වැඩි වන බවත් ඔහු පැවසීය.
මීට පෙර වන්දනාකරුවන්ගේ පැමිණීම මහනුවර නගර සභා බල ප්‍රදේශයට පමණක් සීමා වූ නමුත් මෙවර අවට ප්‍රාදේශීය සභා බල ප්‍රදේශවල ද දිගු පෝලිම් දක්නට ලැබින.
වන්දනාකරුවන්ට ආහාර සැපයීම සඳහා දන්සල 1000 කට පමණ අවසර ලබා දී තිබූ බවත් පාචනය ඇතිවීමේ අවදානම අවම කිරීම සඳහා දන්සලවල්වල ශීත කළ කිරි ඇතුළු පාන වර්ග පිරිනැමීම නැවැත්වීමට පියවර ගෙන තිබින.
-lankacnews
