ශ්රී ලන්කන්ට සයිබර් ප‍්‍රහාරයක්... 'CarrierConnect' ජාලයෙනුත් විසන්ධි කරලා!
ශ්‍රීලන්කන් ගුවන් සේවයේ පරිගණක හා ඊමේල් පද්ධති ඉලක්ක කර ගනිමින් සිදුවූ බව කියන සයිබර් ආරක්ෂණ උල්ලංඝනයක් සහ ඒ පිළිබඳව ශ්රී ලංකා සිවිල් ගුවන් සේවා අධිකාරිය වෙත වහාම දැනුම් නොදීම සම්බන්ධයෙන් මේ වන විට පරීක්ෂණ දෙකක් ක්‍රියාත්මක වන බව වරාය හා සිවිල් ගුවන් සේවා නියෝජ්‍ය අමාත්‍ය ජනිත් රුවන් කොඩිතුවක්කු මහතා ප්‍රකාශ කළ බව ‘සන්ඩේ ටයිම්ස්’ පුවත්පත වාර්තා කරයි.
විපක්ෂයේ පාර්ලිමේන්තු මන්ත්‍රී දයාසිරි ජයසේකර මහතා පසුගියදා පාර්ලිමේන්තුවේදී කරුණු අනාවරණය කරමින් කියා සිටියේ, හැකර්වරුන් පිරිසක් ශ්‍රීලන්කන් ගුවන් සමාගමේ අභ්‍යන්තර පද්ධතියට අනවසරයෙන් ඇතුළු වී ඒ පිළිබඳව 'ඩාක් වෙබ්' අඩවිය ඔස්සේ වීඩියෝවක් පළ කරමින් ඩොලර් 50,000ක කප්පමක් ක්‍රිප්ටෝ මුදලින් ඉල්ලා ඇති බවයි.
කෙසේ වෙතත්, ශ්‍රීලන්කන් ගුවන් සේවය නිල නිවේදනයක් නිකුත් කරමින් මෙම චෝදනා තරයේ ප්‍රතික්ෂේප කර ඇති අතර, තම තොරතුරු තාක්ෂණ පද්ධති හැක් වී හෝ වෙනත් පාර්ශ්වයක පාලනයට නතු වී නොමැති බව සඳහන් කර තිබේ.
නමුත් ‘සන්ඩේ ටයිම්ස්’ වාර්තාවට අනුව, මෙම සයිබර් සිදුවීමෙන් අනතුරුව ගෝලීය ගුවන් සේවා සන්ධානයක් වන Oneworld විසින් සාමාජික ගුවන් සමාගම් අතර දත්ත හුවමාරු කෙරෙන 'CarrierConnect’ ජාලයෙන් ශ්‍රීලන්කන් පද්ධතිය තාවකාලිකව විසන්ධි කර ඇත. පසුව නිල මැදිහත්වීමෙන් එය යළි යථා තත්ත්වයට පත් කළ බව නියෝජ්‍ය අමාත්‍යවරයා තහවුරු කර තිබේ.
මේ සම්බන්ධයෙන් ශ්රී ලංකා පරිගණක හදිසි ප්‍රතිචාර සංසදය පුළුල් විමර්ශනයක් පවත්වන බව පැවසූ නියෝජ්‍ය අමාත්‍ය කොඩිතුවක්කු මහතා, කිසියම් සිදුවීමක් වී ඇති බැවින් ඒ පිළිබඳව වහාම නියාමන ආයතනය වන සිවිල් ගුවන් සේවා අධිකාරිය දැනුවත් නොකිරීම බරපතළ ගැටලුවක් බවත්, සිවිල් ගුවන් සේවා අධිකාරිය මේ සම්බන්ධයෙන් ශ්‍රීලන්කන් පාලනාධිකාරියෙන් කරුණු විමසා ඇති බවත් කියා සිටියේය.
සිවිල් ගුවන් සේවා අධිකාරිය මඟින් නිකුත් කර ඇති නියෝගවලට අනුව ආයතනය තුළ සිදුවන සැකකටයුතු ක්‍රියාකාරකම්, පද්ධති බිඳවැටීම් හෝ සයිබර් තර්ජන පිළිබඳව වහාම අධිකාරියේ විශේෂ මාර්ගගත පද්ධතිය ඔස්සේ දැනුම් දිය යුතු වුවද, ශ්‍රීලන්කන් බලධාරීන් එය වසන් කිරීමට උත්සාහ දරා ඇති බවට වෘත්තීය සමිති චෝදනා කරයි.
ජනතා විමුක්ති පෙරමුණට අනුබද්ධ අන්තර් සමාගම් සේවක සංගමයේ ශ්‍රීලන්කන් ශාඛාවේ ප්‍රධානී නිසල් අධිකාරි මහතා පෙන්වා දෙන්නේ, ජාත්‍යන්තර හැකර් කල්ලියක් විසින් ගුවන් සමාගමේ ජාලය බිඳ දැමූ බව ප්‍රකාශ කළ අවස්ථාවේදී, සිංගප්පූරුවේ අමෙරිකානු තානාපති කාර්යාලයේ ප්‍රවාහන ආරක්ෂක නිලධාරියා පවා ඒ පිළිබඳ අනතුරු අඟවා තිබියදීත්, ගුවන් සමාගමේ ඉහළ කළමනාකාරීත්වය ස්වාධීන විගණනයක් නොකර එම අනතුරු ඇඟවීම් යටපත් කර ඇති බවයි. ගුවන් මගීන්ගේ තොරතුරු, වෙන්කිරීම් සහ ගුවන් ආරක්ෂාව වැනි අතිශය සංවේදී ක්ෂේත්‍ර අනතුරේ හෙළමින් සිදුවූ මෙම සිදුවීම සම්බන්ධයෙන් වහාම පූර්ණ ස්වාධීන හා වෝහාරික පරීක්ෂණයක් පවත්වන ලෙස වෘත්තීය සමිති රජයෙන් බලකර සිටියි.
