ගෝල්ෆේස් විරෝධය උණුසුම්.. අට්ටාල ඉවත් කරන්න පොලිිසිය එයි..
බොදු බල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර හිමියන් වහා නිදහස් කරන ලෙස රජයට බලකරමින් භික්ෂූන් වහන්සේ ප්‍රමුඛ පිරිසක් විසින් කොළඹ ජනාධිපති ලේකම් කාර්යාලය ඉදිරිපිට ආරම්භ කළ විරෝධතාව හේතුවෙන් එම ප්‍රදේශයේ දැඩි උණුසුම්කාරී තත්ත්වයක් හටගත්තේය.
විරෝධතාවයේ නිරත පිරිස ගාලු පාර අවහිර වන පරිදි මාර්ගය මධ්‍යයේ තාවකාලික කූඩාරමක් ඉදිකිරීමට උත්සාහ දැරීමත් සමඟ පොලිසිය ඊට දැඩි විරෝධය පළ කළේය.
එහිදී විරෝධතාවයේ නිරත භික්ෂූන් වහන්සේ සහ පොලිස් නිලධාරීන් අතර දැඩි උණුසුම් වචන හුවමාරුවක්ද සිදුවිය.
අනතුරුව වහා ක්‍රියාත්මක වූ පොලිසිය මාර්ගය මධ්‍යයේ පිහිටුවා තිබූ කූඩාරම ඉවත් කිරීමට මැදිහත් වූ අතර, පසුව විරෝධතාකරුවන් විසින් එම කූඩාරම මාර්ගයේ පසෙකට ගෙන ගොස් රඳවා තබන ලදී.
මෙම ක්‍රියාමාර්ගයත් සමඟ අවහිර වී තිබූ ගාලු පාරේ එක් මංතීරුවක් රථවාහන ධාවනය සඳහා යළි විවෘත කිරීමට පොලිසිය පියවර ගත්තේය.
මේ අතර, ඥානසාර හිමියන්ගේ නිදහස සම්බන්ධයෙන් විරෝධතාවයේ නිරත හිමිවරුන් ජනාධිපති ලේකම් කාර්යාලයේ නිලධාරීන් සමඟ සාකච්ඡාවක නිරත වී ඇති නමුත්, එම සාකච්ඡාව සාර්ථක ප්‍රතිඵලයකින් තොරව අවසන් වී තිබේ.
අදාළ ඉල්ලීම පිළිබඳව තීරණයක් ගැනීම සඳහා අවම වශයෙන් මසක කාලයක් අවශ්‍ය බව ජනාධිපති කාර්යාල නිලධාරීන් ප්‍රකාශ කළ බවත්, එම ස්ථාවරය තමන් පිළිනොගන්නා බවත් උද්ඝෝෂණයේ නිරත හිමිවරු සඳහන් කළහ.
ඥානසාර හිමියන් නිදහස් කිරීම පිළිබඳව රජය විසින් නිල හා සාධනීය නිවේදනයක් නිකුත් කරන තුරු ජනාධිපති ලේකම් කාර්යාල පරිශ්‍රයෙන් කිසිසේත්ම ඉවත් නොවන බව අවධාරණය කරන විරෝධතාකරුවන්, සිය සත්‍යග්‍රහය මාර්ගය අයිනේ රැඳෙමින් අඛණ්ඩව ඉදිරියට ගෙන යන බව ප්‍රකාශ කර සිටියි.
අධිකරණ තීන්දුවක් මත වරදකරු වී බන්ධනාගාරගතව පසුවන පූජ්‍ය ගලගොඩඅත්තේ ඥානසාර හිමියන්ට ජනාධිපති සමාව ලබා දෙන ලෙස ඉල්ලා මීට පෙරද අවස්ථා කිහිපයකදීම ජාතික සංවිධාන සහ මහා සංඝරත්නය විසින් රජයට බලපෑම් එල්ල කර තිබිණි.
ආණ්ඩුවෙන් ඊට යහපත් ප්‍රතිචාරයක් නොලැබීම හේතුවෙන් මෙලෙස ජනාධිපති කාර්යාලය ඉදිරිපිට සෘජු විරෝධතාවක් ආරම්භ කිරීමට විරෝධතාකරුවන් පියවර ගෙන ඇත.
