ක්රිකට් අතුරු කමිටුව පිලි නොගනී.. ICC කාන්තා ලෝක කුසලාන සත්කාරකත්වයෙන් ශ්රී ලංකාව ඉවත් කරයි..
ශ්රී ලංකා ක්රිකට් ආයතනයේ පාලනය සඳහා රජය විසින් අතුරු පාලන කමිටුවක් පත් කර තිබීම හේතුවෙන්, 2027 වසරේ මෙරටදී පැවැත්වීමට නියමිතව තිබූ Women’s Champions Trophy ක්රිකට් තරගාවලියේ සත්කාරකත්වය ශ්රී ලංකාවට අහිමි වී ඇති බව The Sunday Times පුවත්පත වාර්තා කරයි.
ජාත්යන්තර ක්රිකට් කවුන්සිලය දේශපාලන මැදිහත්වීම් මත පත් කරන ලද පාලක මණ්ඩල පිළි නොගන්නා ප්රතිපත්තිය මත මෙම තීරණය ගෙන ඇත.
දැනට ශ්රී ලංකා ක්රිකට් ආයතනය පාලනය කරනු ලබන්නේ රජය විසින් පත් කරන ලද 'පරිවර්තන කමිටුව' (Transformation Committee) මගිනි.
ශ්රී ලංකා ක්රිකට් පරිවර්තන කමිටුවේ ලේකම් ප්රකාශ් ශාෆ්ටර් මහතා මෙම පුවත තහවුරු කර ඇති අතර, තරගාවලිය ශ්රී ලංකාවෙන් ඉවතට ගෙන ඇති බවත් නව සත්කාරක රට ඉදිරි ICC රැස්වීමේදී තීරණය කරනු ඇති බවත් ඔහු පවසා තිබේ.
මෙම තීරණය හේතුවෙන් ශ්රී ලංකා ක්රිකට් ආයතනයට මෙන්ම මෙරට සංචාරක ක්ෂේත්රයටද දැවැන්ත මූල්ය අලාභයක් සිදුවනු ඇතැයි අපේක්ෂා කෙරේ.
කණ්ඩායම් 6ක් සහභාගී වන මෙම තරගාවලිය සඳහා ශ්රී ලංකා කාන්තා කණ්ඩායමට හිමිව තිබූ අවස්ථාවද මේ වන විට අවදානමකට ලක්ව ඇත. ශ්රී ලංකාව දැනට ලෝක ශ්රේණිගත කිරීම්වල 6 වැනි ස්ථානයේ පසුවන අතර, නව සත්කාරක රට පළමු කණ්ඩායම් 5න් පිටත රටක් වුවහොත් ශ්රී ලංකාවට තරගාවලියට සහභාගී වීමේ අවස්ථාව පවා අහිමි විය හැකිය.
මීට පෙර 2024 වසරේ පැවැත්වීමට තිබූ 19න් පහළ ලෝක කුසලාන තරගාවලියේ සත්කාරකත්වයද මෙවැනිම දේශපාලන මැදිහත්වීම් හේතුවෙන් ශ්රී ලංකාවට අහිමි වූ අතර පසුව එය දකුණු අප්රිකාවට මාරු කෙරිණි.
ශ්රී ලංකා ක්රිකට් ආයතනය සඳහා නව ව්යවස්ථාවක් සකස් කර මැතිවරණයක් පවත්වන ලෙස ICCය දිගින් දිගටම බලපෑම් කරමින් සිටින බවද වාර්තාවේ වැඩිදුරටත් සඳහන් වේ.
-lankacnews
