හර්ෂණට ඇමතිකමෙන් ඉල්ලා අස්වෙන්නැයි කියයි..

මීගමුව බන්ධනාගාරයේ ඇති වූ දරුණු ගැටුම්කාරී තත්ත්වයේ වගකීම රජය වෙනුවෙන් භාරගන්නා බව අධිකරණ අමාත්‍ය හර්ෂණ නානායක්කාර මහතා ප්‍රකාශ කර තිබුණද, ඔහු වහාම සිය ධුරයෙන් ඉල්ලා අස්විය යුතු බවට විපක්ෂයේ මන්ත්‍රීවරුන්  බලකර සිටිති.

අදාළ සිදුවීම සම්බන්ධයෙන් අදහස් දක්වමින් හිටපු පාර්ලිමේන්තු මන්ත්‍රී ප්‍රේමනාත් සී. දොළවත්ත මහතා කියා සිටියේ, අමාත්‍යවරයා වගකීම භාරගන්නා බව පැවසීමෙන් පමණක් පලක් නොවන බවයි.

වැලිකඩ බන්ධනාගාර සිදුවීමේදී මෙන්ම මෙහිදී ද පාලකයන්ගේ රහස් රකින රැඳවියන් ඝාතනය කරන්නේද යන බරපතළ සැකය ඔහු මතු කළේය.

එසේම, බන්ධනාගාර පද්ධතිය පිළිබඳ මනා අවබෝධයක් තිබූ දක්ෂ නිලධාරීන් ඉවත් කර පරිපාලනය දුර්වල කිරීමේ ප්‍රතිඵලයක් ලෙස මෙම විනාශය සිදු වූ බවත්, ඒ පිළිබඳ වගකීමෙන් අමාත්‍යවරයාට මිදිය නොහැකි බවත් ඔහු වැඩිදුරටත් පැවසීය.

මේ පිළිබඳව අදහස් දැක්වූ පාර්ලිමේන්තු මන්ත්‍රී මුජිබර් රහුමාන් මහතා අවධාරණය කළේ, අහිමි වූ මිනිස් ජීවිත නැවත ලබා දීමට අමාත්‍යවරයාට නොහැකි බැවින් වගකීම භාරගැනීම යන ප්‍රකාශයට කිසිදු අර්ථයක් නොමැති බවයි.

වත්මන් ජනාධිපතිවරයා මීට පෙර මෙවැනි සිදුවීම්වලදී එවකට පැවති රජයන්ට චෝදනා කළ අයුරු සිහිපත් කළ මන්ත්‍රීවරයා, අධිකරණ අමාත්‍යවරයාට තවදුරටත් ධුරයේ රැඳී සිටීමට සදාචාරාත්මක අයිතියක් නොමැති බවත් වහාම ඉල්ලා අස්විය යුතු බවත් ප්‍රකාශ කළේය.

අධිකරණ අමාත්‍ය හර්ෂණ නානායක්කාර මහතා මෙම සිදුවීම සම්බන්ධයෙන් රජය වෙනුවෙන් කණගාටුව පළ කරමින් වගකීම භාරගන්නා බව ප්‍රකාශ කළ ද, විපක්ෂය නගන මෙම ඉල්ලා අස්වීමේ ඉල්ලීම සම්බන්ධයෙන් මෙතෙක් කිසිදු ප්‍රතිචාරයක් දක්වා නොමැත.

පුද්ගලයන් 26 දෙනෙකුට ජීවිත අහිමි කරමින් සහ සියයකට අධික පිරිසකට තුවාල සිදු කරමින් මීගමුව බන්ධනාගාරය තුළ ඇති වූ මෙම ප්‍රචණ්ඩකාරී තත්ත්වය ශ්‍රී ලංකාවේ බන්ධනාගාර ඉතිහාසයේ කළු පැල්ලමක් ලෙස සටහන් වන බව දේශපාලන විචාරකයෝ පෙන්වා දෙති.