විපක්ෂයේ බලවේග එක්සත් කරන්න : “A Team – Next Wave” නමින් අලුත් දේශපාලන වේදිකාවක්!
පාර්ලිමේන්තුව තුළ මෙන්ම ඉන් බැහැරව ද සිටින විපක්ෂයේ ක්රියාකාරීන් ඒකාබද්ධ කිරීමේ අරමුණින්, විපක්ෂ මන්ත්රීවරුන් වන නාමල් රාජපක්ෂ, රෝහිත අබේගුණවර්ධන, අනුරාධ ජයරත්න, ඩී. වී. චානක සහ චානක මඩුගොඩ විසින් “A Team – Next Wave” නමින් නව දේශපාලන වේදිකාවක් පසුගිය අඟහරුවාදා නිල වශයෙන් ආරම්භ කරන ලදී.
වත්මන් රජයට පවතින අතිවිශාල බලය හේතුවෙන් පාර්ලිමේන්තුව තුළ නිසි නියෝජනයක් නොලැබෙන දේශපාලන පක්ෂ, ස්වාධීන කණ්ඩායම් මෙන්ම පුද්ගලයන් වෙනුවෙන් ශක්තිමත් හඬක් නැඟීම මෙම නව දේශපාලන වේදිකාවේ ප්රධානතම අරමුණක් බව එම මන්ත්රීවරුන් පෙන්වා දෙති.
එමෙන්ම, ජාතික මට්ටමේ වැදගත් ගැටලුවලදී ජනතාවගේ සැබෑ හඬ බලධාරීන් වෙත රැගෙන යාම සඳහා දැනට පාර්ලිමේන්තුව නියෝජනය කරන මන්ත්රීවරුන් මෙන්ම පාර්ලිමේන්තු නියෝජනයක් නොමැති අනෙකුත් දේශපාලන කණ්ඩායම් සමඟ ද අත්වැල් බැඳගෙන මෙම වැඩපිළිවෙළ ඉදිරියට ගෙන යන බව ඔවුහු ප්රකාශ කළහ.
පුළුල් දේශපාලන සන්ධානයක් ගොඩනැඟීම වෙනුවෙන්, විවිධ විපක්ෂ කණ්ඩායම් සහ ස්වාධීන කණ්ඩායම්වල නියෝජිතයන් එකම වහලක් යටට කැඳවීම මෙම ව්යාපාරයේ අපේක්ෂාව බවද එම මන්ත්රීවරු පවසති.
වත්මන් ආර්ථික දුෂ්කරතා, දරාගත නොහැකි බදු බර මෙන්ම ගොවියන්, ධීවරයන්, උපාධිධාරීන්, තාරුණ්යය සහ ශිෂ්ය ප්රජාව මුහුණ දෙන දැවෙන ගැටලුවලට සාර්ථකව මුහුණ දිය හැකි, අත්දැකීම් බහුල දේශපාලන කණ්ඩායමක අවශ්යතාව මේ මොහොතේ රටට තදින්ම දැනෙමින් පවතින බව මන්ත්රීවරු වැඩිදුරටත් අවධාරණය කර සිටිති.
මෙම වැඩපිළිවෙළේ දිගුකාලීන අරමුණ වන්නේ ශ්රී ලංකාවේ අනාගතය භාරගත හැකි “ඊළඟ ජාතික කණ්ඩායම” (Next National Team) ලෙස ශක්තිමත්, එක්සත් විපක්ෂ බලවේගයක් රට තුළ නිර්මාණය කිරීම බව ද ඔවුහු සඳහන් කළහ.
මේ පුවත තව අයට බලන්න
