සලේ කොළඹ ජාතික රෝහලට ඇතුළත් කරයි

රාජ්‍ය බුද්ධි සේවයේ හිටපු අධ්‍යක්ෂ, මේජර් ජෙනරාල් (විශ්‍රාමික) සුරේෂ් සලේ හදිසි වෛද්‍ය ප්‍රතිකාර සඳහා කොළඹ ජාතික රෝහලට ඇතුළත් කර ඇති බව ජනමාධ්‍ය වාර්තා පවසයි. රෝහල් ආරංචි මාර්ග සඳහන් කරන්නේ, රෝහලට ඇතුළත් කිරීමෙන් පසු ඔහුගේ තත්ත්වය පරීක්ෂා කළ වෛද්‍යවරුන්, ඔහුට කඩිනම් ප්‍රතිකාර අවශ්‍ය බව තීරණය කිරීම නිසා වහාම දැඩි සත්කාර ඒකකයට ඇතුළත් කළ බවයි.

2019 පාස්කු ඉරිදා ත්‍රස්ත ප්‍රහාරය සම්බන්ධයෙන් කෙරෙන විමර්ශනවලට අදාළව සුරේෂ් සලේ අපරාධ පරීක්ෂණ දෙපාර්තමේන්තුවේ (CID) භාරයේ පසුවේ.

පසුගිය පෙබරවාරි 25 වැනිදා අපරාධ පරීක්ෂණ දෙපාර්තමේන්තුව විසින් ඔහුව අත්අඩංගුවට ගනු ලැබූ අතර එතැන් පටන් ඔහු රඳවා තබාගැනීමේ නියෝග මත පසුවේ.

පෙර වාර්තාවලට අනුව, තමන්ට අමානුෂික ලෙස සලකන බවට චෝදනා කරමින් සලෙයි CID අත්අඩංගුවේ පසුවෙමින් උපවාසයක් ද ආරම්භ කර තිබිණි.

කෙසේවෙතත් ශ්‍රී ලංකා පොලිසිය මෙම චෝදනා ප්‍රතික්ෂේප කර ඇති අතර, සැකකරුට කිසිදු ආකාරයක පහරදීමක් හෝ ක්‍රූර වධහිංසාවක් සිදු කර නොමැති බව ප්‍රකාශ කර ඇත.

තමන්ගේ මරණය ආසන්න විය හැකි යැයි බියෙන් පසුවන බැවින්, තමන්ගේ අවසන් කැමති පත්‍රය සකස් කිරීමට අවශ්‍ය ලේඛන ලබාදෙන ලෙස සලේ ඉල්ලා ඇති බව ඔහුගේ නීතිඥ කණ්ඩායම බලධාරීන්ට දැනුම් දී තිබේ.

එමෙන්ම ඔහුගේ නීතිඥවරුන්ට අනුව, සලේ තම දෑස් දන්දීමට ද කැමැත්ත පළ කර ඇත.

අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර වෙත ලිපියක් යොමු කරමින් ඔහුගේ නීතිඥවරුන් ඉල්ලා ඇත්තේ, සලේ වඩාත් හොඳ පහසුකම් සහිත රෝහලක් වෙත මාරුකරන ලෙසත්, ස්වාධීන වෛද්‍ය මණ්ඩලයක් මඟින් ඔහුගේ සෞඛ්‍ය තත්ත්වය ඇගයීමට ලක්කරන ලෙසත්ය.

මේ අතර, හිටපු අමාත්‍ය උදය ගම්මන්පිල ද මීට පෙර ප්‍රකාශ කර තිබුණේ සලෙයි CID අත්අඩංගුවේදී වධහිංසාවලට ලක්වන බවයි.

මෙය දේශපාලන හා මහජන අවධානයට ද ලක්විය.

එහෙත් පොලිසිය එම ප්‍රකාශ තරයේ ප්‍රතික්ෂේප කළේය.

තම සැමියා CID අත්අඩංගුවේ පසුවන අතරතුර වෛද්‍ය ප්‍රතිකාර සහ මූලික පහසුකම් අහිමි කිරීම ඇතුළු අමානුෂික හා අවමන්සහගත සැලකීම් සම්බන්ධයෙන් ස්වාධීන පරීක්ෂණයක් පවත්වන ලෙස ඉල්ලමින් සුරේෂ් සලෙයිගේ බිරිඳ වන මනෝරි සලෙයි ද පොලිස්පතිවරයා වෙත ලිඛිත පැමිණිල්ලක් ඉදිරිපත් කර තිබේ.

රාත්‍රී 10 න් පසු සනීපාරක්ෂක පහසුකම් සඳහා ඇති ප්‍රවේශය සීමාකිරීම සහ ප්‍රමාණවත් පරිදි ආහාර ලබා නොදීම හේතුවෙන් ඔහුගේ සෞඛ්‍ය තත්ත්වය බරපතළ ලෙස දරුණු අතට හැරී ඇති බව එම පැමිණිල්ලේ තවදුරටත් සඳහන් වේ.

මේ පිළිබඳව වහාම ස්වාධීන පරීක්ෂණයක් පවත්වන ලෙස ඇය බලධාරීන්ගෙන් ඉල්ලා සිටී.

කෙසේවෙතත්, පොලිසිය නිවේදනයක් නිකුත් කරමින් ගම්මන්පිලගේ චෝදනා ප්‍රතික්ෂේප කර ඇති අතර, සැකකරු අත්අඩංගුවේ පසුවන කාලය තුළ ඔහුට කිසිදු අමානුෂික සැලකීමක් සිදුකර නොමැති බව අවධාරණය කර සිටියි.