මගෙ යාළුවො ඩොලර් මිලියන 23ක් ලංකාවට නිකං දෙන්න ආවා.. IMF කිවුවා එහෙම කරන්න බෑ කියලා..- සංගීත්

වර්තමාන රජය බලයට පත්වීමෙන් පසු විදේශගතව සිටින සිය මිතුරන් පිරිසක් ඩොලර් මිලියන 23ක මුදලක් මෙරටට ලබාදීමට සූදානමින් සිටියද, ජාත්‍යන්තර මූල්‍ය අරමුදලේ පවතින නීති රීති හමුවේ එය සිදු කිරීමට නොහැකි වූ බව ප්‍රකට සංගීත ශිල්පී සංගීත විජේසූරිය මහතා පවසයි.

අන්තර්ජාල නාලිකාවක වැඩසටහනකට එක්වෙමින් ඒ මහතා කියා සිටියේ, රජය ජයග්‍රහණය කළ පසු එක් මිතුරෙකු පමණක් නොව පුද්ගලයින් හතර දෙනෙකුම මෙලෙස මුදල් ලබාදීමට සූදානම්ව සිටි බවයි. ඕස්ට්‍රේලියාවේ පදිංචි දෙදෙනෙකු සහ එක්සත් රාජධානියේ සිටින සිය මිතුරෙකු ඇතුළු පිරිසක් මෙලෙස ඩොලර් මිලියන 23ක් වැනි විශාල මුදලක් මෙරටට රැගෙන ඒම පිළිබඳ සාකච්ඡා කළ බව ඔහු අනාවරණය කළේය.

මේ සම්බන්ධයෙන් ජනාධිපති අනුර කුමාර දිසානායක මහතා හෝ ඒ සම්බන්ධ අදාළ බලධාරීන් සමඟ සාකච්ඡා කළ බවත්, එහිදී දැනගන්නට ලැබුණේ පවතින මූල්‍ය රෙගුලාසි අනුව එලෙස මුදල් මෙරටට ගෙන ඒමට නොහැකි බවත්ය.

"එම්.එෆ්. එකෙන් බැහැ, එහෙම ගෙනල්ලා ඩොලර් මෙහෙට දාන්න බැහැ, ඒක තමයි නීතිය" යනුවෙන් තමන්ට දැනුම් දුන් බව විජේසූරිය මහතා වැඩිදුරටත් සඳහන් කළේය.

මෙම මුදල් මෙරටට එවීමට ඔවුන් බලාපොරොත්තු වූයේ ලාභ ලබන ආයෝජනයක් ලෙස නොව, රටට දක්වන සහයෝගයක් හා ආධාරයක් ලෙස බව හෙතෙම පැහැදිලි කළේය.

විදේශගතව සිටින ශ්‍රී ලාංකිකයන් රටට ඇති ආදරය නිසාම මෙරට ඩොලර් සංචිත ඉහළ නැංවීමට මෙවැනි ක්‍රම මගින් උත්සාහ කළද, ජාත්‍යන්තර මූල්‍ය අරමුදලේ කොන්දේසි හමුවේ එය ක්‍රියාත්මක කිරීමට නොහැකි වූ බව සංගීත විජේසූරිය මහතා පවසා සිටියි.

-lankacnews