සටන් විරාමය ඉවරයි… හෝමුස් යළි වසයි… ඊශ්‍රායලය මට්ටු කරන බව ඉරානය පවසයි…!

ඊශ්‍රායලය විසින් දිගින් දිගටම සටන් විරාම කොන්දේසි උල්ලංඝනය කරමින් ලෙබනනයට ප්‍රහාර එල්ල කරන්නේ නම්, අමෙරිකානු මැදිහත්වීමෙන් ඇති කරගත් සටන් විරාම ගිවිසුමෙන් ඉවත් වීමට තමන් සූදානම් බව ඉරානය නිවේදනය කර තිබේ.

මෙම නොසන්සුන්කාරී තත්ත්වය හමුවේ ලෝක තෙල් ප්‍රවාහනයට අතිශය වැදගත් වන හෝමුස් සමුද්‍ර සන්ධිය හරහා තෙල් නැව් ගමනාගමනය යළිත් වරක් අත්හිටුවීමට ඉරානය පියවර ගෙන ඇත.

ඉරාන නිල පුවත් සේවා වාර්තා කරන පරිදි, ඊශ්‍රායලය ලෙබනනයට එල්ල කරන ප්‍රහාර නතර නොකරන්නේ නම් ඉරානය ගිවිසුමෙන් ඉවත් වී ප්‍රතිප්‍රහාර එල්ල කරනු ඇත.

ඉරාන විප්ලවීය ආරක්ෂක බලකාය සිය ටෙලිග්‍රෑම් නාලිකාව ඔස්සේ ප්‍රකාශ කර ඇත්තේ, ලෙබනනය තුළ ඊශ්‍රායලය සිදුකරන “සාහසික ක්‍රියාවන්ට” දඬුවම් දීමට තමන් සූදානම් බවයි.

කෙසේ වෙතත්, ඊශ්‍රායල හමුදාව පවසන්නේ සටන් විරාම ගිවිසුමට ලෙබනනය ඇතුළත් නොවන බවයි. මේ හේතුවෙන් ඊශ්‍රායල හමුදාව පසුගිය බදාදා දිනයේදී ලෙබනනය පුරා සිය විශාලතම සම්බන්ධීකරණ ගුවන් ප්‍රහාරය දියත් කර තිබේ.

මේ අතර, පකිස්ථාන අගමැති ෂෙහ්බාස් ෂරීෆ් ප්‍රකාශ කර ඇත්තේ සටන් විරාමය ලෙබනනය ඇතුළු සමස්ත කලාපයටම අදාළ වන බවයි. පවතින අර්බුදය සමනය කිරීම සඳහා අමෙරිකානු සහ ඉරාන නියෝජිත පිරිස් අතර සාකච්ඡා මෙහෙයවීමට පකිස්ථානය සූදානමින් සිටින බවද ඔහු වැඩිදුරටත් සඳහන් කළේය.

හෝමුස් සමුද්‍ර සන්ධිය මෙලෙස අවහිර වීම හේතුවෙන් ලෝක වෙළඳපොළේ බරපතල ඉන්ධන අර්බුදයක් ඇතිවීමේ අවදානමක් මතු වී ඇති අතර, සටන් විරාමය ප්‍රකාශ කිරීමත් සමඟ පහත වැටුණු තෙල් සහ ගෑස් මිල ගණන් මෙම නව තත්ත්වයත් සමඟ යළි ඉහළ යමින් පවතී.

මේ පුවත තව අයට බලන්න