වත්කම් බැරකම් ගණං කරන්න අමාරුයි කියා මහින්ද බාරදී ඇත්තේ දිවුරුම් ප්‍රකාශයක් පමණලු

දේශපාලන බලය, වත්කම් සහ අතීතයේ සෙවණැලි බොහෝ විට ගැටෙන්නේ තීරණාත්මක කාලසීමාවන් ආසන්න වන විටදීය.

රාජපක්ෂ පවුලේ දේපොළ සම්බන්ධයෙන් වසර ගණනාවක් පුරා ඇදෙන කතාබහ යළිත් වරක් මෙලෙස තීරණාත්මක මංසන්ධියකට පැමිණ තිබේ.

අල්ලස් හෝ දූෂණ චෝදනා විමර්ශන කොමිෂන් සභාව විසින් ලබා දී තිබූ දින දාහතරක කාලසීමාව අවසන් වන අවසන් මොහොතේදී, එනම් පෙරේදා (10) දිනයේදී, හිටපු ජනාධිපති මහින්ද රාජපක්ෂ මහතා සිය වත්කම් සහ බැරකම් දැක්වෙන දිවුරුම් ප්‍රකාශයක් කොමිසමට භාර දී ඇත.

ප්‍රධාන ධාරාවේ මාධ්‍ය පවා වාර්තා කළේ මෙම ප්‍රකාශය තුළ වත්කම් බැරකම් සඳහන් වන බවක් වන නමුත් එහි එවැන්නක් තිබී නැත. එහි ඇත්තේ තමන්ට ගණං කිරීමට අපහසු තරං වත්කම් ඇති බැවින් ඒවා ගණං කර ඉක්මනින් ලබාදෙන බවට දිවුරුම් ප්‍රකාශයක් පමණක් බව කොමිසම විසින් මේ බව නිල වශයෙන් තහවුරු කරනු ලැබීය.

කෙසේ වෙතත් මෙම ක්‍රියාවලිය පිටුපස පැවතියේ යම් අවිනිශ්චිතභාවයකි. දිවුරුම් ප්‍රකාශය භාරදීමට පෙර, අතීතයට අයත් පැරණි දේපොළ පිළිබඳ නිවැරදි දත්ත එක්රැස් කිරීමට විශාල කාලයක් වැයවන බැවින් තමන්ට ඒ සඳහා තවත් අමතර කාලයක් අවශ්‍ය බව හිටපු ජනාධිපතිවරයා සිය නීතිඥවරුන් මාර්ගයෙන් කොමිසමට දැනුම් දී තිබුණි. එහෙත් ඒ සඳහා කොපමණ අතිරේක කාලයක් අවශ්‍ය දැයි ඔහු එහි නිශ්චිතව දක්වා තිබුණේ නැත.දිගින් දිගටම මෙය ප්‍රමාද කිරීම උපායකට අනුව සිදුවන බව පෙන්නුම් කර තිබේ.

මෙම විමර්ශනය හදිසියේ මතුවූවක් නොවේ. මෙය 2015 වසරේදී ආරම්භ කරන ලද විශේෂ පරීක්ෂණයක සෘජු දිගුවකි. 2010 වසරේ සිට 2015 දක්වා වූ අතිශය තීරණාත්මක දේශපාලන යුගය තුළ, හිටපු ජනාධිපතිවරයාගේ සහ ඔහුගේ පවුලේ සාමාජිකයන් සතුව පැවති වත්කම්වල මූලයන් සෙවීම සහ ඒ පිළිබඳ තොරතුරු ලබාගැනීම මෙහි ප්‍රධාන අරමුණ වී තිබේ.

කාලය ඉල්ලා සිටීම සම්බන්ධයෙන් අනුගමනය කළ යුතු ක්‍රියාමාර්ගය ගැන කොමිසමේ ඉහළ නිලධාරීන් අතර සාකච්ඡා පැවැත්වෙමින් තිබියදීම, අවසන් දිනයේදී මෙලෙස දිවුරුම් ප්‍රකාශය ලැබීම නීතිමය සහ දේශපාලනික වශයෙන් කුතුහලයක් දනවන කරුණකි. ඉදිරිපත් කළ ලේඛන කොමිසමේ අපේක්ෂාවන් සම්පූර්ණ කරන්නේද, නැතහොත් දත්ත ගවේෂණයට තවදුරටත් කල් ලබාදීමට කොමිසමට සිදුවේද යන්න තවමත් පවතින්නේ විවෘත ප්‍රශ්නයක් වශයෙනි.

දශකයකට පෙර පැවති බලයේ සහ ධනයේ සැබෑ තරම හෙළිදරව් වීම, හුදෙක් එක් නීතිමය ලියවිල්ලක් භාරදීමෙන් පමණක් අවසන් නොවන බව නම් මේ වන විට පැහැදිලිය.

මේ පුවත තව අයට බලන්න