ආණ්ඩුව ඉල්ලා අස්වී මහ මැතිවරණයක් කැදවන්නැයි කියයි

ඇමරිකානු ඩොලර් මිලියන 2.5 ක මුදලක් හැක් කිරීම ඇතුළු මෑතකදී වාර්තා වූ මහා පරිමාණ වංචා සහ අක්‍රමිකතාවලට වගකීම භාරගෙන වත්මන් කැබිනට් මණ්ඩලයම ඉල්ලා අස්විය යුතු බවත්, වහාම මහ මැතිවරණයක් පවත්වා නව රජයක් පත් කර ගැනීමට ජනතාවට ඉඩ දිය යුතු බවත් ඒකාබද්ධ විපක්ෂය අවධාරණය කළේය.

ශ්‍රී ලංකා නිදහස් පක්ෂය (SLFP), එක්සත් ජාතික පක්ෂය (UNP), සර්වජන බලය සහ තවත් පක්ෂ කිහිපයක නියෝජිතයන් කොළඹදී පැවැත්වූ මාධ්‍ය හමුවකදී මෙම ඉල්ලීම සිදු කරන ලදී.

මෙහිදී අදහස් දැක්වූ හිටපු අමාත්‍ය ජී. එල්. පීරිස් මහතා සඳහන් කළේ පසුගිය සති කිහිපය තුළ ගල්අඟුරු මිලදී ගැනීමේ වංචාව, ඉන්ධන වංචාව සහ ඩොලර් මිලියන 2.5 ක් හැක් කිරීම වැනි බරපතල සිදුවීම් රැසක් වාර්තා වී ඇති බවයි.

"ගල්අඟුරු මිලදී ගැනීමේ වංචාව වැනි දේවල් තනි අමාත්‍යවරයෙකුට පමණක් කළ නොහැකියි. ඒ සඳහා මුළු කැබිනට් මණ්ඩලයේම සහය ලැබිය යුතුයි. රජය දැන් සිය අදක්ෂතාව ප්‍රදර්ශනය කර අවසන්," යැයි ඔහු පැවසීය.

බැංකු පද්ධතිය හැක් කිරීම හරහා මහජනතාව තුළ බැංකු කෙරෙහි පවතින විශ්වාසය බිඳ වැටීම ආර්ථිකයට සිදු කරන දරුණුතම පහරක් බව ද ඔහු වැඩිදුරටත් කියා සිටියේය.

හිටපු අමාත්‍ය පාඨලී චම්පික රණවක මහතා මෙහිදී ප්‍රකාශ කළේ, ජනාධිපති ලේකම් කාර්යාලයට සම්බන්ධ මුදල් විශුද්ධිකරණය පිළිබඳ මොළකරුවන් කිහිප දෙනෙකු සිටින බවයි. මූල්‍ය ආරක්ෂාව තහවුරු කිරීමට සහ මෙරට ණය ශ්‍රේණිගත කිරීම් ආරක්ෂා කර ගැනීමට මෙම හැක් කිරීමේ සිදුවීම බරපතල අභියෝගයක් බව පැවසූ ඔහු, ඒ පිළිබඳව මහ බැංකුව විධිමත් පරීක්ෂණයක් කළ යුතු බව ද අවධාරණය කළේය.

ප්‍රමිතියෙන් තොර ගල්අඟුරු ආනයනය කිරීම හේතුවෙන් එළඹෙන ජූනි මාසය වන විට රට තුළ දැඩි ඉන්ධන සහ විදුලි අර්බුදයක් ඇතිවිය හැකි බවට ද ඔහු අනතුරු ඇඟවීය.

"ප්‍රමිතියෙන් තොර ගල්අඟුරු නිසා ඇතිවන විදුලි හිඟය පියවීමට තාප බලාගාර වැඩිපුර ක්‍රියාත්මක කිරීමට සිදු වනවා. එවිට ඉන්ධන ඉල්ලුම ඉහළ ගොස් රට අර්බුදයකට යනු ඇති," යැයි හෙතෙම පැවසීය.

මේ පුවත තව අයට බලන්න