පාස්කු විමර්ශනයට යුද හමුදාව බාධා කරන බව දිලීප පීරිස් කියයි... හමුදා ලොක්කෙක් සමග උණුසුම් වචන හුවමාරුවක්!

පාස්කු ඉරිදා ත්‍රස්ත ප්‍රහාරය පිළිබඳ විමර්ශනවලට ඇතැම් හමුදා නිලධාරීන් බාධා පමුණුවන බවට අතිරේක සොලිසිටර් ජනරාල් (ASG) දිලීප පීරිස් මහතා විවෘත අධිකරණයේදී කළ ප්‍රකාශයක් සම්බන්ධයෙන් ජ්‍යෙෂ්ඨ හමුදා නිලධාරියෙකු සිය දැඩි අප්‍රසාදය පළ කර ඇති බව සන්ඩේ ටයිම්ස් වාර්තා කරයි.

හමුදා නීති අංශයේ නිලධාරියෙකු හරහා සිදු කළ දැනුම්දීමකට අනුව, අතිරේක සොලිසිටර් ජනරාල්වරයා සහ අදාළ ජ්‍යෙෂ්ඨ හමුදා නිලධාරියා අතර දුරකථන සංවාදයක් පවත්වා ඇත.

මුලින් සුහදව ආරම්භ වූ මෙම සංවාදය පසුව උණුසුම් මුහුණුවරක් ගෙන ඇත්තේ, අතිරේක සොලිසිටර් ජනරාල්වරයාගේ ප්‍රකාශ මඟින් යුද හමුදාව දැඩි අපහසුතාවයට පත්ව ඇති බවට එම නිලධාරියා චෝදනා කිරීමත් සමඟය.

හමුදාව විමර්ශනවලට සහාය දෙන බව එම නිලධාරියා තර්ක කළද, දිලීප පීරිස් මහතා එය ප්‍රතික්ෂේප කරමින් පවසා ඇත්තේ සැබෑ තත්ත්වය එය නොවන බවයි.

මෙම සංවාදය අතරතුරදී, අතිරේක සොලිසිටර් ජනරාල්වරයා දිගින් දිගටම මෙවැනි ප්‍රකාශ සිදු කරන්නේ නම් ඒ පිළිබඳව ජනාධිපතිවරයාට පැමිණිලි කිරීමට සිදුවන බවට ද අදාළ හමුදා නිලධාරියා පවසා ඇති බව වාර්තා වේ.

අතිරේක සොලිසිටර් ජනරාල්වරයා මෙහිදී බරපතළ චෝදනාවක් එල්ල කරමින් කියා සිටියේ, ප්‍රහාරය සම්බන්ධයෙන් අත්අඩංගුවට ගෙන සිටින සැකකරුවන්ට නීතිමය සහාය ලබා ගැනීම සඳහා හමුදා බුද්ධි අංශ මඟින් ප්‍රතිපාදන ලබා දී ඇති බවයි. මෙය කිසිසේත්ම අනුමත කළ නොහැකි ක්‍රියාවක් බව ඔහු අවධාරණය කළේය.

මීට අමතරව, පාස්කු විමර්ශන සඳහා සහාය දීම ප්‍රතික්ෂේප කරන පුද්ගලයන් පිළිබඳව ඉදිරියේදී අධිකරණය දැනුවත් කිරීමටත්, ඔවුන් අධිකරණය හමුවට කැඳවීමටත් නීතිපතිවරයා අපේක්ෂා කරන බව පීරිස් මහතා එම නිලධාරියාට දැනුම් දී ඇත.

නීතිපති පරිඳ රණසිංහ මහතා ද මෙම සිදුවීම පිළිබඳව දැනුවත් කර ඇති බව වාර්තාවේ තව දුරටත් දැක්වෙයි.

මේ පුවත තව අයට බලන්න