සහන නෑ ... රු.මිලියන 996ක මුළු හිඟ බදු මුදලම රජයට ගෙවන්න අලෝෂියස්ගේ මෙන්ඩිස් සමාගමට උසාවිය නියෝග කරයි

ගෙවීම පැහැරහැර තිබෙන හිඟ වැට් බදු මුදල් නියමිත පරිදි ගෙවා අවසන් කරන ලෙස කොළඹ මහේස්ත්‍රාත් අධිකරණය ඩබ්ලිව්.එම්. මෙන්ඩිස් සමාගමේ අධ්‍යක්ෂවරුන්ට නියෝග කළේය.

අදාළ බදු මුදල් ගෙවීම සඳහා සහනයක් ලබාදෙන ලෙස එම සමාගම කළ ඉල්ලීම ප්‍රතික්ෂේප කරමින් අතිරේක මහේස්ත්‍රාත් ඕෂද මිගාර මහාරච්චි, එම සමාගමේ අධ්‍යක්ෂ මණ්ඩලයේ විත්තිකරුවන්ට මෙම නියෝගය නිකුත් කළේය.

කොළඹ අතිරේක මහේස්ත්‍රාත්වරයා මෙම නියෝගය කළේ 2016-2017 වර්ෂ වලට අදාළව ඩබ්ලිව්.එම්. මෙන්ඩිස් සහ සමාගම නොගෙවා පැහැරහැර ඇතැයි සඳහන් රුපියල් මිලියන 996 ක බදු මුදලක් අයකර ගැනීම සඳහා දේශීය ආදායම් කොමසාරිස්වරයා විසින් පැවරූ නඩුව කැඳ වූ අවස්ථාවේදීය.

මෙම නඩුකරය කැඳවූ අවස්ථාවේදී අදාළ සමාගමේ අධ්‍යක්ෂවරයකු වන විත්තිකාර අර්ජුන් ඇලෝසියස් අධිකරණයේ පෙනීසිටියේය.

විත්තිකරු වෙනුවෙන් පෙනීසිටි නීතිඥවරයා අධිකරණය හමුවේ කරුණු දක්වමින්, සිය සේවා දායකයාගේ සමාගමට අයත් මත්පැන් නිෂ්පාදන බලපත්‍ර සුරාබදු දෙපාර්තමේන්තු මගින් අත්හිටුවා ඇතැයි සඳහන් කළේය.

එමෙන්ම මත්පැන් නිෂ්පාදනාගාර වෙන්දේසි කිරීමට බැංකු සූදානමින් සිටින බවත් ඔහු පැවසුවේය.

එම නිසා හිඟ බදු වාරික ගෙවීම සඳහා මූල්‍ය දුෂ්කරතා පවතින බවත් ඔහු පෙන්වාදුන්නේය.

එම නිසා දැනට ගෙවීමට නියම කර තිබෙන බදු වාරික සංශෝධනය කර ගෙවීමට අවසර දෙන ලෙසත් නීතිඥවරයා අධිකරණයෙන් ඉල්ලා සිටියේය.

එම අවස්ථාවේදී දේශීය ආදායම් කොමසාරිස් ජෙනරාල් වෙනුවෙන් පෙනීසිටි නීතිඥ දිනේෂ් පෙරේරා, අධිකරණය හමුවේ කරුණු දක්වමින්, අදාළ සමාගම විසින් ගෙවීම පැහැරහැර ඇති බදු අයකර ගැනීම සඳහා එහි අධ්‍යක්ෂ මණ්ඩල සාමාජිකයින්ට එරෙහිව නඩු පහක් ගොනුකර තිබෙන බව පෙන්වාදුන්නේය.

එම එක් නඩුවක හිඟ බදු මුදල් ගෙවීම පැහැරහැරීම නිසා අදාළ සමාගමේ අධ්‍යක්ෂකවරුන්ට අධිකරණය මගින් සිරදඬුවම් නියම කළ බවත් නීතිඥවරයා සඳහන් කළේය.

ඒ අනුව දැනට නියම කර තිබෙන පරිදි බදු වාරික ගෙවන ලෙස විත්තිකරුවන්ට නියෝග නිකුත් කරන ලෙසත් නීතිඥවරයා අධිකරණයෙන් ඉල්ලා සිටියේය.

ඉදිරිපත් වූ කරුණු සලකා බැලූ අතිරේක මහේස්ත්‍රාත්වරයා, විත්තිකාර සමාගම විසින් බදු ගෙවිය යුතු කාලය දැනටමත් ඉක්මවා ගොස් තිබෙන නිසා, අදාළ බදු මුදල් නියම කර තිබෙන පරිදි ගෙවීමට පියවර ගන්නා ලෙස නියෝග කළේය.

මෙම කටයුතු වල ප්‍රගතිය මැයි මස 25 වන දා අධිකරණයට ඉදිරිපත් කරන ලෙසත් නියෝග කෙරිණි.

මේ පුවත තව අයට බලන්න