විහිළුකාරයන්ට රට හදන්න බෑ… රනිල් නැවත ජනපති කළ යුතුයි… නැත්නම් රට යටත්විජිතයක් වෙනවා…! – වජිර…

මේ මොහොත වන විට ශ්‍රී ලංකාවට 1977 ආර්ථික පරිවර්තනය මෙන් දහස් ගුණයක මහා ආර්ථික පරිවර්තනයක් අවශ්‍ය වී ඇති බවත් එවන් ආර්ථික පරිවර්තනයක් සිදුකළ හැකි දැනට සිටින එකම නායකයා හිටපු ජනාධිපති රනිල් වික්‍රමසිංහ පමණක් බවත් එක්සත් ජාතික පක්ෂයේ සභාපති වජිර අබේවර්ධන පවසයි.

“මේ ආර්ථික පරිවර්තන පනත හැදුවේ වැටෙන රට දේශීය සහ ජාත්‍යන්තර වශයෙන් ගොඩගන්න. නමුත් දැන් ඒක සම්පූර්ණයෙන් උල්ලංඝනය කරලා ඉවරයි. රනිල් වික්‍රමසිංහ මැතිතුමා දූෂණ විරෝධී පනත ගෙනාවේ රටට යහපතක් කිරීම සඳහා. ඊළඟට පාර්ලිමේන්තු අයවැය කාර්යාලය, මේක ගෙනාවෙ මුදල් පරිපාලනය නිසි ආකාරව සිද්ධ කරන්න. මේ වගේ පනත් රාශියක් ගෙනල්ලා තිබුණා.

දැන් මේ පනත් සියල්ලම විනාශ කරලා ඉවරයි. දැන් මේ පනත්වලින් ආපහු රට ගොඩනගන්න බෑ.

එහෙනම් අලුත් යුගයක් අවශ්‍යයි. ශ්‍රී ලාංකීය මහ ජනතාව මතක තබාගත යුතුයි, ඒ යුගය 77 ඇති වුණු යුග පෙරළියට වඩා මහා පරිමාණ යුග පෙරළියක් විය යුතුයි. එහෙනම් විපක්ෂයේ කාර්යභාරය වෙන්නේ මේ ආර්ථික ප්‍රතිපත්ති, පනත් සියල්ල විනාශ කළාට පස්සේ කොහොමද ඒක ගොඩගන්නෙ කියන එක. මහ ජනතාව නැවත සුරංගනා කතාවලට හසු නොවිය යුතුයි.

77 කරපු පරිවර්තනය නිසා ඔබ කැමරා අල්ලාගෙන ඉන්නවා, ඔබට රූපවාහිනී යන්ත්‍ර ලැබිලා තියෙනවා, ඔබට මෝටර් සයිකල් ලැබිලා තිබෙනවා, ඔබට බස් ලැබිලා තියෙනවා, ඔබට විදුලිය ලැබිලා තිබෙනවා, ඔබට සෞඛ්‍ය, අධ්‍යාපනය ලැබිලා තිබෙනවා. දැන් ඒ වගේ දහස් ගුණයක පිම්මක් ආර්ථිකයට අවශ්‍ය කරලා තිබෙනවා. ඒක කරන්න බෑ මේ විහිළු සපයන දේශපාලන පක්ෂ මහජනයා නොමග අරිමින් කරන ක්‍රියාවලියෙන්.

ඒක කරන්න පුළුවන් එකම නායකත්වය ඉතුරු වෙලා තිබෙන්නෙ රනිල් වික්‍රමසිංහ නමැති අවුරුදු 50ක දේශපාලන පළපුරුද්ද, ආර්ථික අත්දැකීම් සහ ජාත්‍යන්තරය සමග ගනුදෙනු කළ හැකි නායකත්වය. එතුමාගේ ප්‍රයෝජනය ශ්‍රී ලාංකික මහ ජනතාව ලබාගත යුතුයි. එසේ ලබා නොගත්තොත් මේ රට යටත් විජිතයක් වනු ඇත.”

හිටපු අමාත්‍ය වජිර අබේවර්ධන මේ බව පැවසුවේ අද (15) පැවති මාධ්‍ය හමුවක් අමතමිනි.