ජනපතිගේ අනුරුවකට ගල් අගුරු කවමින් විරෝධතා.

බාල ගල් අඟුරු මෙරටට ගෙන්වීමේ සිද්ධියට එරෙහිව සමගි ජන බලවේගය ප්‍රමුඛ විපක්ෂය සංවිධානය කළ දැවැන්ත විරෝධතාවක් අද (10) දින පාර්ලිමේන්තු පිවිසුම් මාර්ගය අසල පිහිටි පොල්දූව මංසන්ධියේදී පැවැත්විණි. බලශක්ති අමාත්‍ය කුමාර ජයකොඩි මහතාට සහ රජයට එරෙහිව මෙහිදී විරෝධතාකරුවන් දැඩි ලෙස සිය විරෝධය පළ කළහ.

විරෝධතාව අතරතුර උණුසුම්කාරී තත්ත්වයක් හටගත් අතර, විරෝධතාකරුවන් විසින් ජනාධිපති අනුර කුමාර දිසානායක මහතාගේ සහ බලශක්ති අමාත්‍ය කුමාර ජයකොඩි මහතාගේ අනුරූ සදාගෙන විත් ඒවාට ගල් අඟුරුවලින් පහර දෙමින් තම විරෝධය ප්‍රකාශ කරනු ලැබීය.

"මේවා තමයි අනුරලා හොරෙන් කෑවේ", "කොමිස් ගහපු ගාන කියපන්" යනුවෙන් සටන් පාඨ කියමින් විරෝධතාකරුවන් චෝදනා කළේ මහජනතාවගේ බදු මුදල් මෙලෙස මහා පරිමාණ වංචාවන් හරහා අවභාවිත වන බවයි.

විපක්ෂ නායක සජිත් ප්‍රේමදාස මහතා ඇතුළු දේශපාලනඥයන් රැසක් මෙම අවස්ථාවට එක්ව සිටි අතර, ඔවුන් පාර්ලිමේන්තුව දෙසට ගමන් කිරීමට උත්සාහ කිරීමත් සමඟ පොලිසිය මාර්ග බාධක යොදා එය වළක්වනු ලැබීය.

එහිදී අදහස් දැක්වූ විපක්ෂ නායකවරයා සඳහන් කළේ මෙය ඉතිහාසයේ සිදුවූ දැවැන්තම වංචාව බවත්, අදාළ අමාත්‍යවරයා ආරක්ෂා කිරීමට ජනාධිපතිවරයා කටයුතු කරන්නේ නම් ඔහු ද මෙම වංචාවට වගකිව යුතු බවත්ය.

මෙම ගල් අඟුරු වංචාව හේතුවෙන් මෙරට විදුලි පාරිභෝගිකයන්ට දැඩි බරක් පැටවෙන බවත්, මෙම දූෂිත ක්‍රියාවන්ට එරෙහිව ඉදිරියටත් මුළු රටම පෙළගස්වමින් සටන් වදින බවත් විරෝධතාකරුවෝ මෙහිදී අවධාරණය කළහ.