පාස්කු ප‍්‍රහාරයට ගෝඨාභය අත්අඩංගුවට?

පාස්කු ඉරිදා ත්‍රස්ත ප්‍රහාරය සම්බන්ධයෙන් හිටපු ජනාධිපති ගෝඨාභය රාජපක්ෂ මහතා අත්අඩංගුවට ගැනීමේ පැහැදිලි සූදානමක් පවතින බව ජාතික නිදහස් පෙරමුණේ නායක, හිටපු අමාත්‍ය විමල් වීරවංශ මහතා පවසයි.

ඔහු මේ බව අවධාරණය කළේ ජාතික නිදහස් පෙරමුණ විසින් සංවිධානය කරන ලද විශේෂ වැඩසටහනකදී අදහස් දක්වමිනි.

බුද්ධි අංශ ප්‍රධානී මේජර් ජනරාල් සුරේෂ් සලේ මහතා අත්අඩංගුවට ගැනීම හරහා හිටපු ජනාධිපතිවරයා වෙත ඉලක්කය යොමු කිරීමට ආණ්ඩුව උත්සාහ කරන බව වීරවංශ මහතා මෙහිදී චෝදනා කළේය.

"දැන් ඊළඟට මේගොල්ලෝ ගන්න තීරණය කරලා තියෙන්නේ ගෝඨාභය රාජපක්ෂ අත්අඩංගුවට ගන්න. ඒකට තමයි සලේ මගින් ඊළඟට පොට පාදා ගන්න හදන්නේ," යනුවෙන් ඔහු සඳහන් කළේය.

සහරාන් හෂීම් වැනි අන්තවාදියෙකු ගෝඨාභය රාජපක්ෂ මහතා ජනාධිපති කරවීම සඳහා සිය ජීවිතය පරිත්‍යාග කරමින් ප්‍රහාරයක් එල්ල කළේය යන්න තර්කානුකූල නොවන "වඳුරු කුණුහරුපයක්" බව හිටපු අමාත්‍යවරයා පැවසීය. ගෝඨාභය රාජපක්ෂ මහතා යනු උග්‍ර බෞද්ධයෙකු බවත්, එවැනි අයෙකු බලයට පත් කිරීමට සහරාන්ලා ක්‍රියා කරනු ඇතැයි සිතීම විහිළුවක් බවත් ඔහු පෙන්වා දුන්නේය.

අපරාධ පරීක්ෂණ දෙපාර්තමේන්තුවේ ප්‍රධානී ශානි අබේසේකර මහතා ඇතුළු පිරිසක් විසින් බොරු චෝදනා සහ කෘතිම සාක්ෂි යොදා ගනිමින් මෙම නඩු නිර්මාණය කරන බවට වීරවංශ මහතා චෝදනා කළේය.

ඕනෑම පුද්ගලයෙකුට විරුද්ධව රචනා ලියා බොරු සාක්ෂි මගින් අධිකරණය හමුවේ වරදකරුවෙකු කිරීමට තරම් සුවිශේෂී හැකියාවක් ඔවුන් සතු බව ඔහු උපහාසාත්මකව ප්‍රකාශ කළේය.

බුද්ධි අංශ දුර්වල කිරීම ක්‍රියාවලිය හරහා රාජ්‍යයේ ඓතිහාසික බලකනු බිඳ දැමීමට උත්සාහ කරන බවත්, වර්තමානය වන විට කිලිනොච්චිය සහ මුලතිව් වැනි ප්‍රදේශවල යුද හමුදා කඳවුරු පවා ඉවත් කරමින් පවතින බවත් වීරවංශ මහතා හෙළි කළේය.

සුරේෂ් සලේ මහතා වැනි යුද්ධයේදී සුවිශේෂී කාර්යභාරයක් ඉටු කළ බුද්ධි නිලධාරීන් ඉලක්ක කිරීම දෙමළ ඩයස්පෝරාව සතුටු කිරීමේ දේශපාලනික ව්‍යාපෘතියක් බවද ඔහු පැවසීය.

සහරාන් ඇතුළු පිරිස අන්තවාදයට යොමුවන බවත්, ඔවුන් ISIS සංවිධානය සමඟ සම්බන්ධතා පවත්වන බවත් සුරේෂ් සලේ මහතා ඇතුළු බුද්ධි අංශ විසින් එවකට පැවති යහපාලන ආණ්ඩුවේ ආරක්ෂක මණ්ඩලයට දැනුම් දී තිබුණද, ඔවුන් එය නොසලකා හැරි බව වීරවංශ මහතා මෙහිදී මතක් කර දුන්නේය.

එදා එම තොරතුරු කෙරෙහි අවධානය යොමු කළේ නම් පාස්කු ප්‍රහාරය වළක්වා ගැනීමට ඕනෑ තරම් හැකියාව තිබූ බව ඔහු වැඩිදුරටත් අවධාරණය කළේය.

අනෙක් අතට, බෝම්බකරුවන්ගේ පියා වන ඉබ්‍රාහිම් වැනි අයගේ දේපල නිදහස් කරමින් සහ ප්‍රධාන සාක්ෂිකරුවන් විදේශගත වීමට ඉඩ සලසමින් සැබෑ වගඋත්තරකරුවන් නිදහස් කිරීමට ආණ්ඩුව කටයුතු කරමින් සිටින බවටද ඔහු මෙහිදී චෝදනා කළේය.

මේ පුවත තව අයට බලන්න