ස්ටෙෆනි සිරිවර්ධන බන්ධනාගාර අධීක්ෂණ කමිටුවට පත්කිරීම : සමාජ මාධ්‍ය තුළ දැඩි උනන්දුවක්!

බන්ධනාගාර පද්ධතියේ අධීක්ෂණ කටයුතු විධිමත් කිරීම සඳහා අධිකරණ අමාත්‍ය හර්ෂණ නානායක්කාර විසින් විශේෂ කමිටුවක් පත් කර ඇති අතර, එහි සාමාජිකාවක ලෙස ප්‍රකට නිරූපිකාවක වන ස්ටෙෆනි සිරිවර්ධන මහත්මිය ද පත් කර තිබේ.

මෙම පත්වීමත් සමඟ මේ වන විට සමාජ මාධ්‍ය ජාල තුළ විවිධ අදහස් පළවෙමින් පවතී.

ස්ටෙෆනි සිරිවර්ධන මෙරට කලා ක්ෂේත්‍රයේ ප්‍රසිද්ධ චරිතයක් වන අතර ඇය ජයග්‍රහණ රැසක් අත්පත් කරගෙන ඇති තැනැත්තියකි.

2011, 2013 වසර වල ඇය ශ්‍රී ලංකා රූ රැජින සහ ආසියානු රූ රැජින ලෙස කිරුළ දිනා ඇත.

මෙරට ප්‍රමුඛ පෙළේ රූපවාහිනී නාලිකාවල ඉංග්‍රීසි සහ සිංහල මාධ්‍ය නිවේදිකාවක ලෙස කටයුතු කරන ඇය, නිරූපණ ක්ෂේත්‍රයේ ද දක්ෂතා දක්වන්නියකි.

බන්ධනාගාර වැනි සංකීර්ණ ආයතනයක අධීක්ෂණ කටයුතු සඳහා මෙලෙස කලා ක්ෂේත්‍රයේ නිරූපිකාවක පත් කිරීම සම්බන්ධයෙන් සමාජ මාධ්‍ය පරිශීලකයින් අතර පක්ෂ සහ විරුද්ධ අදහස් මතු වෙමින් තිබේ.

ඇතැම් පිරිස් පවසන්නේ විෂය පිළිබඳ විශේෂඥ දැනුමක් ඇති පිරිස් මෙවැනි කමිටුවලට පත් කළ යුතු බවයි. කෙසේ වෙතත්, තවත් පිරිසක් පෙන්වා දෙන්නේ ක්ෂේත්‍රයෙන් බැහැර, මානුෂීය දෘෂ්ටිකෝණයකින් බලන නව පරපුරේ නියෝජිතයින් මෙවැනි කමිටුවලට එක්කර ගැනීම හරහා බන්ධනාගාර ප්‍රතිසංස්කරණ සඳහා නව මානයක් එකතු විය හැකි බවයි.

මෙම කමිටුව හරහා බන්ධනාගාර රැඳවියන්ගේ සුභසාධනය සහ පරිපාලනමය දෝෂ නිරීක්ෂණය කර අමාත්‍යවරයා වෙත වාර්තා කිරීමට නියමිත බව වාර්තා වේ.

මේ පුවත තව අයට බලන්න