බංගලාදේශය යලි ගිනිගනී... අරගලයෙන් පසු තව අරගල රැසක්... ඉන්දියාවත් පැටලෙයි!

බංග්ලාදේශයේ අරගල දේශපාලන නායකයෙකු වූ 32 හැවිරිදි ශරීෆ් ඔස්මාන් හාදිගේ ඝාතනයත් සමඟ එරට ප්‍රධාන නගර රැසක දැඩි නොසන්සුන්කාරී තත්ත්වයක් සහ ප්‍රචණ්ඩ ක්‍රියා ඇවිළී තිබේ. සිය දැඩි ඉන්දියානු විරෝධී මතවාදය හේතුවෙන් ප්‍රසිද්ධියට පත්ව සිටි හාදි, 2024 වසරේදී හිටපු අගමැතිනි ෂීක් හසීනා බලයෙන් පහකිරීමට මග පෑදූ ශිෂ්‍ය අරගලයේ කැපී පෙනෙන චරිතයකි.

පසුගිය සිකුරාදා ඩකා නුවරදී සිය මැතිවරණ ප්‍රචාරක කටයුතු ආරම්භ කරමින් සිටියදී, මුහුණු ආවරණය කරගත් සන්නද්ධ පිරිසක් හාදිගේ හිසට වෙඩි තබා තිබුණි. බරපතළ තුවාල ලැබූ ඔහු සිංගප්පූරුවේ රෝහලක දැඩි සත්කාර ඒකකයේ ප්‍රතිකාර ලබමින් සිටියදී ඊයේ අභාවප්‍රාප්ත විය.

හාදිගේ අභාවය සැලවීමත් සමඟ උරණ වූ දහස් සංඛ්‍යාත විරෝධතාකරුවන් ඩකා අගනුවර වීදි බැස ප්‍රචණ්ඩ ලෙස හැසිරුණු බව වාර්තා වේ. එහිදී බංග්ලාදේශයේ ප්‍රමුඛ පෙළේ පුවත්පත් ආයතන දෙකක් වන 'ද ඩේලි ස්ටාර්' සහ 'ප්‍රෝතොම් ආලෝ' ගොඩනැගිලිවලට විරෝධතාකරුවන් ගිනි තබා ඇත. ගින්න හටගන්නා අවස්ථාවේ සේවකයන් රැසක් ගොඩනැගිලි තුළ සිරවී සිටි අතර පසුව ගිනි නිවන හමුදාව මැදිහත් වී තත්ත්වය පාලනය කර තිබේ.

මීට අමතරව, රාජ්ෂාහි ප්‍රදේශයේ පිහිටි බංග්ලාදේශ නිර්මාතෘ ෂීක් මුජිබර් රහ්මාන්ගේ නිවසට සහ අවාමි ලීග පක්ෂ කාර්යාලයට ද විරෝධතාකරුවන් ගිනි තබා අලාභ හානි පමුණුවා ඇත.

මෙම නොසන්සුන්කාරී තත්ත්වය හමුවේ ඉන්දියාව සහ බංග්ලාදේශය අතර පවතින රාජ්‍ය තාන්ත්‍රික සබඳතා තවදුරටත් පළුදු වී තිබේ. චිතගොං නුවර පිහිටි ඉන්දියානු සහකාර මහා කොමසාරිස් කාර්යාලය ඉදිරිපිට රැස්වූ පිරිස් ඉන්දියානු විරෝධී සටන් පාඨ ඉදිරිපත් කර ඇති බව සඳහන් වේ.

ඉන්දියාවේ ඊසානදිග ප්‍රාන්ත ඉන්දියාවෙන් වෙන් කරන බවට බංග්ලාදේශ දේශපාලන නායකයන් කළ ප්‍රකාශ සහ ඉන්දියානු මහ කොමසාරිස් කාර්යාලයට එල්ල වන තර්ජන සම්බන්ධයෙන් ඉන්දියාව සිය දැඩි විරෝධය පළ කර ඇත. මේ හේතුවෙන් බංග්ලාදේශයේ වෙසෙන ඉන්දියානු ජාතිකයින්ට අනවශ්‍ය ගමන් බිමන්වලින් වැළකී සිටින ලෙස විශේෂ උපදේශන මාලාවක් ද නිකුත් කර තිබේ.

බංග්ලාදේශ අන්තර්වාර රජයේ ප්‍රධානී, නොබෙල් ත්‍යාගලාභී මුහම්මද් යූනුස් මහතා ජාතිය අමතමින් කියා සිටියේ හාදිගේ මරණය රටේ ප්‍රජාතන්ත්‍රවාදී ගමනට පිරිමැසිය නොහැකි පාඩුවක් බවයි. මෙය එළඹෙන පෙබරවාරි 12 වනදා පැවැත්වීමට නියමිත මහ මැතිවරණය කඩාකප්පල් කිරීම සඳහා සැලසුම් සහගතව සිදුකළ ප්‍රහාරයක් බවට ඔහු චෝදනා කළේය.

හාදිගේ අභාවය වෙනුවෙන් එළඹෙන සෙනසුරාදා දිනය ජාතික ශෝක දිනයක් ලෙස ප්‍රකාශයට පත් කර ඇති අතර, ජාතික ධජය අඩකුඹු කර තැබීමට ද තීරණය කර ඇත. ඝාතකයන් අත්අඩංගුවට ගැනීම සඳහා තොරතුරු ලබාදෙන්නෙකුට බංග්ලාදේශ ටකා මිලියන පහක (ඇමරිකානු ඩොලර් 42,000 ක පමණ) ත්‍යාගයක් ද ප්‍රකාශයට පත් කර තිබේ.