අච්චාරු සන්ධා­න­ව­ලට එකතු වෙන්නේ නෑ... මරික්කාර් පාර්ලිමේන්තුවට සමුදෙයි?

පක්ෂයේ ඉල්ලීම පරිදි පාක්ෂි­ක­යාගේ අව­ස­රය මත පක්ෂය වෙනු­වෙන් ඕනෑම කැප කිරී­මක් සිදු කිරීමට තමා සූදානම් බවත් බස්නා­හිර පළාත් සභා­වට තරග වදින ලෙස පක්ෂ­යෙන් ඉල්ලී­මක් කළොත් ඒ පිළි­බ­ඳව සලකා බලන බව පාර්ලි­මේන්තු මන්ත්‍රී එස්. එම්. මරි­ක්කාර් මහතා පවසයි.

ඊයේ (13) දින සමගි ජන බල­වේග ප්‍රධාන කාර්යා­ලයේ පැවති මාධ්‍ය හමු­වට සහ­භාගි වෙමින් මන්ත්‍රී­ව­රයා මේ බව පැව­සුවේ ය.

වාමාං­ශික කඳ­වු­රට විරු­ද්ධව දක්ෂි­ණාං­ශික කඳ­වුර එකතු විය යුතු බවත් ඒ හරහා දක්ෂි­ණාං­ශික කඳ­වුර ශක්ති­මත්ව නිර්මා­ණය විය යුතු බවට් මන්ත්‍රීවරයා පවසයි.

කෙසේවෙතත් සමගි ජන බල­වේ­ගය 2014 සිට එක්සත් ජාතික පක්ෂය පිළිබඳ නැඟූ චෝදනා වෙනු­වෙන් අද­ටත් පෙනී සිටි­න බවත් එම චෝදනා සෝදා දැමීමට සූදානම් නැති බවත් මරික්කාර් මහතා වැඩිදුරටත් පැවසීය.

එහිදී වැඩි­දු­ර­ටත් අද­හස් දැක්වූ මන්ත්‍රී­ව­රයා මෙලෙස ද කීවේය.

“පක්ෂයේ ඉල්ලීම පරිදි පාක්ෂි­ක­යාගේ අව­ස­රය මත පක්ෂය වෙනු­වෙන් ඕනෑම කැප කිරී­මක් සිදු කරන්න මා සූදා­නම්. එක්සත් ජාතික පක්ෂය සමඟ එකතු විය හැකි ආකාර පිළි­බ­ඳව සමගි ජන බල­වේ­ගයේ කළ­ම­නා­ක­රණ කමි­ටු­වට වාර්තා­වක් දෙන ලෙස සමගි ජන බල­වේ­ගයේ කෘත්‍යා­ධි­කාරි මණ්ඩල කමි­ටු­වත්, කළ­ම­නා­ක­රණ කමි­ටු­වත් තීන්දු­වක් ගෙන තිබෙ­නවා.

වාමාං­ශික කඳ­වු­රට විරු­ද්ධව දක්ෂි­ණාං­ශික කඳ­වුර එකතු විය යුතුයි කියන මතයේ අප සිටි­නවා. ඒ එක­තු­වීම හරහා දක්ෂි­ණාං­ශික කඳ­වුර ශක්ති­මත්ව නිර්මා­ණය විය යුතුයි. එය විය යුතු දෙයක්. එය අනා­ග­ත­යේදී සිදු වෙනවා. පළාත් සභා මැති­ව­ර­ණ­යේදී දක්ෂි­ණාං­ශික කඳ­වු­රට එක­තුවී වැඩ කිරීමේ හැකි­යාව තිබෙ­නවා.

ඒ හරහා තමයි දක්ෂි­ණාං­ශික කඳ­වු­රට ජය­ග්‍ර­හ­ණ­යක් ගැනී­මට හැකි­යාව ලැබෙන්නේ. පළාත් සභා මැති­ව­ර­ණය හැර­වු­මක ආර­ම්භ­යක් කර ගත යුතුයි. පළාත් සභා මැති­ව­ර­ණය අය-වැයෙන් පසුව පැමි­ණී­මට නිය­මි­තයි. එතෙක් මේ එක්සත් ජාතික පක්ෂය සමඟ සාකච්ඡා කිරී­මට කාල­යක් තිබෙ­නවා. පොදු­ජන පෙර­මුණ සමඟ හෝ ශ්‍රී ලංකා නිද­හස් පක්ෂය සමඟ එක­තු­වී­මක් නොව දකුණු කඳ­වුරු එකට හිට­ගැ­නී­මයි වැද­ගත් වෙන්නේ.

සමගි ජන බල­වේ­ගය 2014 සිට නඟපු චෝදනා වෙනු­වෙන් අද­ටත් පෙනී සිටි­නවා. ඒ චෝදනා සෝදා දමන්න සූදා­නම් නෑ. එක්සත් ජාතික පක්ෂයේ සහ සමගි ජන බල­වේ­ගයේ ප්‍රති­පත්ති අතර විශාල වෙන­ස්කම් නෑ. එක්සත් ජාතික පක්ෂය ඇතැම් අව­ස්ථා­ව­ලදී අන්ත ලිබ­රල් ප්‍රති­පත්ති අනු­ග­ම­නය කරන්න උත්සාහ දර­නවා. නමුත් මේ වන විට ලෝකයේ තිබෙන්නේ අන්ත ලිබ­රල් ක්‍රම­යක් නෙවෙයි. සමාජ වෙළෙ­ඳ­පොළ ආර්ථි­ක­යක් ලෝකයේ ක්‍රියා­ත්මක වෙනවා.

ආණ්ඩුව සමඟ සමස්ත විප­ක්ෂ­යම එකතු වුණත් තරග කරන්න නොහැකි බව ආණ්ඩුවේ ඇමැ­ති­ව­ර­යෙක් ප්‍රකාශ කර තිබුණා. කිසිම පක්ෂ­යක් හැම­දාම දින­න්නෙත් නෑ, හැම­දාම පර­දි­න්නෙත් නෑ. අපේ රටේ ප්‍රධාන විප­ක්ෂය ලෙස සමගි ජන බල­වේ­ගය පළාත් සභා මැති­ව­ර­ණ­යට තරග කර­නවා.

අපි පළාත් සභා මැති­ව­ර­ණය ජය­ග්‍ර­හ­ණය කරන්න බලා­පො­රොත්තු වෙනවා. එම ජය­ග්‍ර­හ­ණ­යට අපි දකුණු කඳ­වුර එකතු කළ යුතුයි. එහිදී එක්සත් ජාතික පක්ෂයේ අන­න්‍ය­තාව රැක ගනි­මින් , සමගි ජන බල­වේ­ගයේ අන­න්‍ය­තාව රැක ගනි­මින් එක සන්ධා­න­යක් ලෙස එක­තුවී කට­යුතු කිරීමේ හැකි­යාව තිබෙ­නවා.

දීර්ඝ­කා­ලීන දේශ­පා­ලන තීන්දු පිළි­බ­ඳව සාකච්ඡා කර­නවා. පළාත් සභා ජය­ග්‍ර­හ­ණය කිරී­මට සමගි ජන බල­වේ­ගය උප­රි­ම­යෙන් කට­යුතු කර­නවා. සමගි ජන බල­වේ­ගය දේශ­පා­ලන සන්ධා­න­යක් නිර්මා­ණය වන්නේ එක්සත් ජාතික පක්ෂය සමඟ පම­ණයි. අච්චාරු දේශ­පා­ලන සන්ධා­න­ව­ලට සමගි ජන බල­වේ­ගය එකතු වන්නේ නෑ.”