නි. ඇමති මුනීර් මරාගෙන මැරෙන දර්ශනය හඳුන්වා ෂුරා සභා නියෝජිතයෙක්..- ඥාණසාර හිමි

අලුතින් පත් වූ ආගමික හා සංස්කෘතික කටයුතු නියෝජ්‍ය අමාත්‍ය මුනීර් මුලව්ෆර් මහතා තම සංවිධානය පිළිබඳව රටට පැහැදිලි කිරීමක් කරන ලෙස බොදු බල සේනා සංවිධානයේ මහ ලේකම් පූජ්‍ය ගලගොඩඅත්තේ ඥාණසාර හිමියන් විසින් ඉල්ලා තිබේ.

මෙය, නියෝජ්‍ය අමාත්‍යවරයා සම්බන්ධයෙන් රට තුළ ඇති වී තිබෙන සැකය දුරු කිරීමේ අරමුණින් කරන ලද ඉල්ලීමක් බව උන්වහන්සේ සඳහන් කළහ.

මෙම ඉල්ලීම සිදු කරමින් ඥාණසාර හිමියන් පෙන්වා දුන්නේ, අතීතයේදී මුස්ලිම් ප්‍රජාව පීඩාවට පත් කළ සංවිධාන හතරක් පිළිබඳව තමන් දිගින් දිගටම කරුණු අනාවරණය කළ බවයි. 2014 වසරේදී පවා එවැනි ම්ලේච්ඡ ප්‍රහාරයක් රට තුළ ස්ථිර වශයෙන් සිදුවන බවටත්, ඒ පිටුපස සිටින පුද්ගලයන් සහ කණ්ඩායම් පිළිබඳවත් තමන් විසින් අනාවරණය කළ බව උන්වහන්සේ සිහිපත් කළහ.

2015 දී යහපාලන ආණ්ඩුව බලයට පැමිණෙන විට, තමන් පෙන්වා දී තිබූ ගෝලීය සන්නද්ධ ත්‍රස්ත කණ්ඩායම් සමඟ සම්බන්ධකම් තිබූ බොහෝ කණ්ඩායම් එම ආණ්ඩුව බලයට ගෙන ඒම සඳහා කටයුතු කළ බවත්, එහි අවසාන ප්‍රතිඵලය වූයේ පාස්කු ඉරිදා බෝම්බ ප්‍රහාරය බවත් උන්වහන්සේ කියා සිටියහ. තවද, ජාතික ජනබලවේග ආණ්ඩුව බිහිවීමට පෙර, ජනතා විමුක්ති පෙරමුණ ඇතුළු කණ්ඩායම් දිගින් දිගටම පාස්කු ප්‍රහාරයට පෙර කියා සිටියේ, මෙරට ඉස්ලාමීය අන්තවාදයක් නොමැති බවත්, මේවා බංකොලොත් දේශපාලන වැඩපිළිවෙල වසාගැනීමට කරන ජාතිවාදයක් හෝ ආගම්වාදයක් අවුස්සන වැඩක් බවත් ය. නමුත් බොදු බල සේනාව කතා කළේ සත්‍යය බව උන්වහන්සේ අවධාරණය කළහ.

නියෝජ්‍ය අමාත්‍ය මුනීර් මුලව්ෆර් මහතා පිළිබඳව පෞද්ගලික අමනාපයක් නොමැති බව පැවසූ ඥාණසාර හිමියෝ, එහෙත් පූර්ව අත්දැකීම් හේතුවෙන්, නියෝජ්‍ය අමාත්‍යවරයා අයිති වන සංවිධානය, නියෝජනය කරන ඉස්ලාමීය ආගමික නිකාය සහ ඔහුගේ මතවාදය කුමක්ද යන්න පැහැදිලි කරන ලෙස ඉල්ලා සිටියහ.

උන්වහන්සේ ඉස්ලාම් සමාජය තුළ පවතින ප්‍රධාන සංවිධාන හතරක් පිළිබඳව මෙලෙස පැහැදිලි කළහ.

තව්හීද් ජමාත් (Thawheed Jamath): ඒකදේවවාදය සනථ කළ සමූහය.

තබ්ලීක් ජමාත් (Thabligh Jamath): සාමූහික ප්‍රචාරය. (මෙය සෞදි අරාබියේ තහනම් වුවත් ශ්‍රී ලංකාවේ ක්‍රියාත්මක වේ).

ජමාතේ ඉස්ලාම් (Jamaat-e-Islami): රාජ්‍යය ඉස්ලාම්කරණය කිරීමේ සමූහය.

ඉක්වාන් මුස්ලිම් (Ikhwan al-Muslimeen): යූසුෆ් අල් කරදාවාගේ මතවාදය සමඟ බැඳුණු, දෙවියන් උදෙසා අනිවාර්යයෙන් ප්‍රාණායනය කළ යුතු යැයි මතවාදය දරන කණ්ඩායම.

බුදු පිළිම කුඩු කරමින්, මුස්ලිම් සමාජයටත් අපකීර්තියක් එකතු කරමින්, ගෝලීය ත්‍රස්ත කල්ලි හා එක්ව ඉස්ලාම් නාමයෙන් උන්මත්තක අන්තවාදී ක්‍රියාකාරකම් නිර්මාණය කළේ, වර්ධනය කළේ, සහ ගොඩනැගුවේ මෙම සංවිධාන හතරෙන් සැදුම් ලත් කණ්ඩායම් 29ක් බව ඥාණසාර හිමියෝ වැඩිදුරටත් පැවසූහ.

නියෝජ්‍ය අමාත්‍යවරයාගේ මතවාදය නිල වශයෙන් ප්‍රකාශ කළ නොහැකි වුවත්, අතීතය පිරික්සන විට ඒ පිළිබඳ සාක්ෂි පෙන්විය හැකි බව ඥාණසාර හිමියෝ සඳහන් කළහ.

මුනීර් මුලව්ෆර් මහතා ජමාත්තුලා අනුගාමිකයන් සිටින ස්ථානවලට ගොස් වාර ගණනක් දේශනා පවත්වා ඇත.

ඔහු උස්තාද් මන්සූර් මහතාගේ CIS සංවිධානයේ වැඩ කර ඇති බවත්, නැතහොත් දේශන පවත්වා ඇති බවත්, ඒවාට සහභාගී වී ඇති බවත් උන්වහන්සේ කියා සිටියහ.

CIS යනු ජමාතේ ඉස්ලාම් සංවිධානය සහ පාස්කු ප්‍රහාරය සම්බන්ධයෙන් තහනම් කළ යුතු යැයි නම් ලද වාමි සංවිධානය සමඟ කටයුතු කළ ආයතනයකි.

2013 වසරේදී, ලෝකයට මරාගෙන මැරෙන දර්ශනය හඳුන්වා දුන් යූසුෆ් අල් කරදාවා මුණගැසීමට ලංකාවේ දූත පිරිසක් ගිය බවත්, ඉන්පසු මෙහි ශූරා සභාවක් පිහිටුවූ බවත් උන්වහන්සේ හෙළි කළහ.

වර්තමාන නියෝජ්‍ය අමාත්‍යවරයා මෙම ආයතනත් ශූරා සභාව තුළත් වැඩ කර ඇති බවට යූටියූබ්වල සාක්ෂි පවතින බව උන්වහන්සේ ප්‍රකාශ කළහ.

ජාමයා නලීමියා ඉස්ලාමික් සෙන්ටර් (JNJIC) වැනි අධ්‍යාපන ආයතනවලින් පුහුණුව ලබන අය, පරිපාලන සේවය, අධ්‍යාපනය, සෞඛ්‍යය වැනි රාජ්‍යයේ මර්මස්ථානවල නිලධාරීන් ලෙස ස්ථානගත වන බවත් ඥාණසාර හිමියෝ පෙන්වා දුන්හ.

මෙය ආණ්ඩුව පිළිබඳ ප්‍රශ්නයක් නොව රාජ්‍යය පිළිබඳ ප්‍රශ්නයක් බවත්, රාජ්‍යය බිඳ වට්ටන ක්‍රියාවලට ඉඩ දිය නොහැකි බවත් උන්වහන්සේ අවධාරණය කළහ. මීට පෙරද අදාළ තොරතුරු ආරක්ෂක ලේකම් ඇතුළු ඉහළ නිලධාරීන්ට දැනුම් දුන්නද, තොරතුරු පහළ මට්ටමේ නිලධාරීන් ළඟ මාස වීමට ඉඩ ඇති නිසා තමන්ට රට පිළිබඳව විශාල බියක් ඇති බව උන්වහන්සේ පැවසූහ.