රනිල් ඇතුළු කණ්ඩායමට තවත් නඩුවක්... චාමර පෙරමුණ ගනී!

පසුගිය රජය සමයේ එප්පාවල පොස්පේට් නිදියෙන් ලබාගන්නා පොස්පේට් තොග සම්මත මිල ගණන් වලට වඩා අඩු මිල ගණන් වලට තමන්ට හිතවත් සමාගම් කිහිපයකට අපනයනය කිරීම සඳහා නිකුත් කිරීම තුලින් මුලික අයිතිවාසිකම් උල්ලංඝණය වී ඇති බවට තීන්දුවක් ලබා දෙන ලෙස ඉල්ලා හිටපු ජනාධිපති රනිල් වික්‍රමසිංහ සහ හිටපු අමාත්‍ය මණ්ඩල සාමාජිකයින් ඇතුළු වගඋත්තරකරුවන් පිරිසකට එරෙහිව ගොනුකර තිබු මුලික අයිතිවාසිකම් පෙත්සමක් විභාගයට ගැනීමට ශ්‍රෙෂ්ඨාධිකරණය ඊයේ (01) දින අවසර ලබා දුන්නේය.

පෙත්සම්කාර පාර්ශවය වෙනුවෙන් පෙනී සිටි නීතීඥ ආචාර්ය රවින්ද්‍රනාත් දාබරේ මහතා එහිදී පෙන්වා දුන්නේ, ලෝක වෙළදපොලේ පොස්පේට් මෙට්‍රික් ටොන් එකක් සඳහා නියමිත මිලට වඩා ඉතාම අඩු මිලකට තමන්ට හිතවත් සමාගම් කිහිපයකට අපනයනය කිරීම සඳහා තොග ලබාදීමට වගඋත්තරකරුවන් කටයුතු කර ඇති බවයි.

මේ තුලින් රජයටත්, මහජනතාවටත් විශාල ආර්ථිකමය පාඩුවක් සිදුවී ඇති බවත් මෙම ක්‍රියාවලියේදී විෂයභාර අමාත්‍යවරයා වශයෙන් කටයුතු කළ චාමර සම්පත් දසනායක පොස්පේට් නිකුත් කිරීමට අවශ්‍ය බලපත්‍ර නිකුත් කරන ලෙස භූ විද්‍යා හා පතල් කැණීම් කාර්යාංශය ඇතුළු රාජ්‍ය ආයතන වලට බලපෑම් කර තිබෙන බවටද තොරතුරු හෙළිවී ඇතැයි ද නීතීඥවරයා සඳහන් කරයි.

අනතුරුව ඉදිරිපත් වු කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ⁣ විනිසුරු මඩුල්ල අදාළ පෙත්සම මාර්තු මස (09) වැනිදා විභාගයට ගැනීමට දින නියම කළේය.