පොලිස් ලොක්කන් 170ක් පොලිස්පතිට එරෙහි උසාවියේ නඩු දමයි!

පසුගියදා පැවති සහකාර පොලිස් අධිකාරීවරුන් බඳවාගැනීමේ විභාගය සම්බන්ධයෙන් පැන නැඟුණු ගැටළු හේතුවෙන් ප්‍රධාන පොලිස් පරීක්ෂකවරුන් සහ පොලිස් පරීක්ෂකවරුන් 170 දෙනෙකු විසින් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් තුනක් (3ක්) ගොනු කර තිබේ.

නීතිඥ මංජුල බාලසූරිය මහතා මාර්ගයෙන් ගොනු කර ඇති මෙම පෙත්සම්වල ප්‍රධාන අරමුණ වී ඇත්තේ, අදාළ විභාගයේ ප්‍රතිඵල මත පදනම්ව 45 දෙනෙකු සහකාර පොලිස් අධිකාරී ධුරයට උසස් කිරීම තුළින් තමන්ගේ මූලික අයිතිවාසිකම් උල්ලංඝනය වී ඇති බවට අධිකරණ තීන්දුවක් ලබා ගැනීමයි.

උසස්වීම් ලබා දීම සඳහා පවත්වන ලද සීමිත තරග විභාගය සම්බන්ධයෙන් පෙත්සම්කරුවන් විසින් කරුණු කිහිපයක් පෙන්වා දී ඇත. විභාගයේ ප්‍රශ්න පත්‍රයක් පිටවී ඇති බවට තොරතුරු අනාවරණය වී තිබේ. විභාග ප්‍රතිඵල නිකුත් කිරීම ප්‍රමාද වීම හිතාමතා සිදුකළ ක්‍රියාවක් බවට චෝදනා එල්ල වේ.

මීට පෙර අවස්ථාවලදී ජ්‍යෙෂ්ඨත්වය මත උසස්වීම් සිදු කළ නමුත්, මෙවර කිසිදු වෘත්තීය සුදුසුකමක් සැලකිල්ලට නොගෙන, ශාස්ත්‍රීය සුදුසුකම් මත පමණක් උසස්වීම් ලබා දී ඇත. මෙම විභාගයේදී විවිධ අක්‍රමිකතා සිදුවී ඇති බවට චෝදනා කර ඇත.

මෙම කරුණු මත පදනම්ව, අදාළ විභාගයේ ප්‍රතිඵල සම්පූර්ණයෙන්ම බලරහිත කරන නියෝගයක් නිකුත් කරන ලෙස පෙත්සම්කරුවෝ අධිකරණයෙන් ඉල්ලා සිටිති.

මෙම පෙත්සම්වල වගඋත්තරකරුවන් ලෙස පොලිස්පතිවරයා, උසස්වීම් ලද නව සහකාර පොලිස් අධිකාරීවරුන් සහ ජාතික පොලිස් කොමිසමේ සාමාජිකයන් නම් කර තිබේ.