තීරුබදු හිලවුවට ඇමරිකාවෙන් බොරතෙල් ගන්න තීන්දුයි…

ශ්‍රී ලංකාවේ සිදු කළ පරීක්ෂණ සාර්ථකව අවසන් කර ඇති බැවින්, එක්සත් ජනපදයෙන් බොරතෙල් මිලදී ගැනීමට ලංකා ඛනිජ තෙල් නීතිගත සංස්ථාව සූදානම් වේ. මේ පිළිබඳව අදහස් දක්වමින් සංස්ථාවේ සභාපති ඩී. ජේ. ඒ. එස්. ද එස්. රාජකරුණා මහතා සඳහන් කළේ, ඊළඟ මාසයේදී ටෙන්ඩර් පටිපාටියක් ආරම්භ කරන බවයි.

මෙම ගනුදෙනුව යටතේ වසරක් තුළ ඇමෙරිකාවෙන් බොරතෙල් මෙට්‍රික් ටොන් මිලියන දෙකක් ආනයනය කිරීමට අපේක්ෂා කෙරේ.

ඇමෙරිකානු තීරු බදු පිළිබඳ නියෝජිතයන් සමඟ සාකච්ඡා කිරීමෙන් පසු මෙම තීරණයට එළැඹ ඇති අතර, මේ සඳහා වසරකට ඩොලර් මිලියන 800ත් 900ත් අතර මුදලක් වැය කිරීමට බලාපොරොත්තු වේ.

සභාපතිවරයා පෙන්වා දුන්නේ, ලෝක වෙළෙඳපොළේ මිලට වඩා ඩබ්ලිව්. ටී. අයි. (WTI) බොරතෙල් මිල අඩු වුවද, නැව් ගාස්තු අධික විය හැකි බැවින්, ඒ සියල්ල සැලකිල්ලට ගනිමින් තරගකාරී මිලක් ඉදිරිපත් කරන සමාගමකට මෙම අවස්ථාව හිමි වන බවයි.