ඇමති කුමාර ජයකොඩිට අල්ලස් කොමිසමෙන් නඩු.. ටෙන්ඩර වංචා චෝදනා…

අල්ලස් හෝ දූෂණ චෝදනා විමර්ශනය කිරීමේ කොමිෂන් සභාව විසින් 2015 වසරේ පොහොර සංස්ථාවේ සේවය කරන සමයේදී අරමුදල් අවභාවිත කිරීම සම්බන්ධයෙන් ලැබුණු දූෂණ පැමිණිලි අනුව, බලශක්ති අමාත්‍ය කුමාර ජයකොඩි මහතාට එරෙහිව නඩු පැවරීමට තීරණය කර ඇති බව ‘සන්ඩේ ටයිම්ස්’ පුවත්පත වාර්තා කරයි.

අමාත්‍යවරයාට සහ තවත් දෙදෙනෙකුට එරෙහිව රුපියල් මිලියන 8ක මුදලක් අවභාවිත කිරීමේ චෝදනා යටතේ මෙම නඩුව මහාධිකරණය හමුවේ ගොනු කිරීමට නියමිතය.

විමර්ශනයට ලක් වූ ටෙන්ඩරයක් අනුමත කළ ටෙන්ඩර් මණ්ඩලයේ ප්‍රධානියා ලෙස ජයකොඩි මහතා කටයුතු කර තිබේ.

අදාළ ටෙන්ඩරයේ ගෙවීම් ක්‍රියාපටිපාටි සම්බන්ධයෙන් සැක මතුවීමත් සමඟ මෙම විමර්ශනයන් ආරම්භ වී ඇත.

අල්ලස් කොමිසම විසින් මුදල් අවභාවිත කිරීම සම්බන්ධයෙන් මීට පෙර සිදුකළ විමර්ශනද සැලකිල්ලට ගනිමින් නැවත පරීක්ෂණ ආරම්භ කර තිබේ.

වත්මන් ආණ්ඩුවේ දූෂණ චෝදනා වලට මුහුණ දෙන පළමු අමාත්‍යවරයා බවට ජයකොඩි මහතා පත් වනු ඇත.

මීට පෙර, පොහොර සංස්ථාවේ මූල්‍ය වංචාවක් සම්බන්ධයෙන් අත්හිටුවනු ලැබූ පුද්ගලයෙකු ජාතික ජන බලවේගයේ (NPP) කැබිනට් මණ්ඩලයේ සේවය කරන බවට සමගි ජන බලවේගයේ (SJB) මඩකලපුව දිස්ත්‍රික් මන්ත්‍රී ශානකියන් රාසමානික්කම් මහතා පාර්ලිමේන්තුවේදී ප්‍රශ්න කර තිබුණි.

පසුගිය රජයේ අමාත්‍යවරුන්ට එරෙහිව දූෂණ නඩු ගණනාවක් ගොනු කිරීමෙන් පසුව අල්ලස් කොමිසමේ මෙම පියවර ගෙන ඇත.