ආරුගම්බේ ඊශ‍්‍රායලය වෙලා.. ඇතුළුවීම තහනම් කරමින් ඊශ්‍රායල උත්සව.. ඊශ්‍රායල හමුදාවන්ට පක්ෂපාතී දැන්වීම්..

අන්තර්ජාතික ඩී.ජේ ශිල්පී ටොම් මොනගල්, සිය ඉන්ස්ටග්‍රෑම් ගිණුමේ පළ කළ වීඩියෝවක් හරහා, අරුගම්බේ ප්‍රදේශයේ පවතින තත්ත්වය සම්බන්ධයෙන් සිය දැඩි කනස්සල්ල පළ කර තිබේ. ඔහුගේ ප්‍රකාශවලට අනුව, අරුගම්බේ ප්‍රදේශයේ සිටින ඊශ්‍රායල ජාතිකයන්ගේ විශාල සංඛ්‍යාව සහ ඔවුන් සතු දේපල හේතුවෙන්, එම ස්ථානය ශ්‍රී ලංකාවේ පිහිටි ස්ථානයක්ද, නැතහොත් ඊශ්‍රායලයේ ටෙල් අවීව් නගරයේ පිහිටි ස්ථානයක්ද යන්න පිළිබඳව ඔහුට අවිනිශ්චිත හැඟීමක් ඇති වී ඇත.

මොනගල් සඳහන් කරන්නේ, ඊශ්‍රායල ජාතිකයන් විසින් අරුගම්බේ ප්‍රදේශය ශ්‍රී ලාංකිකයන්ගෙන් “සොරකම් කර” ඇති බවටයි.

තවද, ප්‍රදේශවාසීන්ට ඇතුළු වීම තහනම් කරමින් ඊශ්‍රායල ජාතිකයන් උත්සව පවත්වන බවටද ඔහු චෝදනා කරයි.

ඔහුගේ වීඩියෝවේ දැක්වෙන තවත් කරුණු කිහිපයක් නම්, අරුගම්බේහි බොහෝ ස්ථානවල සිංහල සහ දෙමළ භාෂා වෙනුවට හෙබ්‍රෙව් භාෂාව භාවිත කිරීම සහ ඇතැම් ස්ථානවල ඊශ්‍රායල ආරක්ෂක හමුදාවන්ට පක්ෂපාතී ප්‍රචාරක ස්ටිකර් ප්‍රදර්ශනය කිරීමයි.

මෙම තත්ත්වය සම්බන්ධයෙන් ශ්‍රී ලංකා රජය මැදිහත් වී ක්‍රියාමාර්ගයක් ගත යුතු බවට ඔහු ඉල්ලීමක්ද කර තිබේ.

මෙම ප්‍රකාශයන් හරහා ටොම් මොනගල් අවධාරණය කරන්නේ අරුගම්බේ ප්‍රදේශයේ සංස්කෘතික සහ සමාජීය අනන්‍යතාවයට සිදුව ඇති බලපෑම පිළිබඳවයි. මෙම ගැටලුව පිළිබඳව ශ්‍රී ලංකා රජයේ අවධානය යොමු කිරීම අත්‍යවශ්‍ය බව ඔහු වැඩිදුරටත් අවධාරණය කර ඇත.

-lankacnews