පම්පෝරි නිවේදන ගැහුව ජෝන් කීල්ස්ලා; BYD මෝටරේ ගලවලා පරීක්ෂණ කරන්න අදිමදි කරන බව රේගුව කියයි (Video)

බී.වයි.ඩී (BYD) විදුලි වාහන තොගයක ප්‍රකාශිත මෝටර් ධාරිතාව සම්බන්ධයෙන් විමර්ශනයක් ක්‍රියාත්මක වන බව ශ්‍රී ලංකා රේගුව අද (30) තහවුරු කළේය. බදු වගකීම් අඩු කර ගැනීම සඳහා වාහනවල ධාරිතාව අවතක්සේරු කර ඇති බවට සැක පළ වීමෙන් මෙම පරීක්ෂණය ආරම්භ වී තිබේ.

මුදල් කාරක සභාව (COPF) හමුවේ පෙනී සිටි රේගු ජ්‍යෙෂ්ඨ අධ්‍යක්ෂ සහ මාධ්‍ය ප්‍රකාශක සීවාලි අරුක්ගොඩ මහතා සඳහන් කළේ, කර්මාන්ත පාර්ශ්වකරුවන්ගේ පැමිණිලි සහ මුදල් නියෝජ්‍ය අමාත්‍යවරයාගෙන් ලැබුණු තොරතුරු මත මෙම පරීක්ෂණය ආරම්භ කළ බවයි.

වාහන තොගයම කිලෝවොට් (kW) 100ක මෝටර් ධාරිතාවක් ලෙස ප්‍රකාශයට පත් කර තිබුණද, රේගුව මේ වන විට පරීක්ෂා කරමින් සිටින්නේ ඒවා සැබවින්ම කිලෝවොට් 150ක මෝටර්වලින් සමන්විත දැයි යන්නයි. මෙම වර්ගීකරණය මගින් අදාළ බදු සැලකිය යුතු ලෙස ඉහළ යනු ඇත.

රේගු නිලධාරීන් පරීක්ෂණයේ ප්‍රමාදයන්ට හේතු වී ඇත්තේ ශ්‍රී ලංකාවේ බී.වයි.ඩී හි නිල නියෝජිතයා වන ජෝන් කීල්ස් සී.ජී. ඔටෝ (පුද්ගලික) සමාගමෙන් (John Keells CG Auto (Pvt) Ltd) සහය නොලැබීම බව පෙන්වා දෙයි.

“අපිට මෝටරය පරීක්ෂා කරන්න ඕන බව අපි ඔවුන්ට කිව්වා, නමුත් එය ක්‍රියාවලියක් බව ඔවුන් කියනවා, ඒ නිසා ප්‍රමාදය ඔවුන්ගේ පැත්තෙන්,” රේගු ප්‍රකාශකයා වැඩිදුරටත් පැවසීය.

වාහනවල සැබෑ ධාරිතාවට වඩා අඩු මෝටර් නිමැවුමක් දැක්වීමට මෘදුකාංග වෙනස් කර ඇත්ද යන්න පිළිබඳව ද බලධාරීන් විමර්ශනය කරමින් සිටී.

මෝටරවල සත්‍ය පිරිවිතරයන් තහවුරු කර ගැනීම සඳහා මොරටුව විශ්වවිද්‍යාලයේ තාක්ෂණික සහාය ලබා ගැනීමට අපේක්ෂා කෙරේ.

මහජන මුදල් කාරක සභාවේ සභාපති පාර්ලිමේන්තු මන්ත්‍රී හර්ෂ ද සිල්වා මහතා අවධාරණය කළේ, මෙය විදේශීය නිෂ්පාදකයෙකු සම්බන්ධ වන කාරණයක් බැවින් පරීක්ෂණ ජාත්‍යන්තර ප්‍රමිතීන්ට අනුකූල විය යුතු බවයි.

මෙම විමර්ශනය ආරම්භ වන්නේ කොළඹ වරායේදී බී.වයි.ඩී වාහන 1,000කට ආසන්න ප්‍රමාණයක් රේගුව විසින් රඳවා ගැනීමෙන් පසුවය. ආනයනකරු වාහන ප්‍රමිතීන්ට අනුකූල වන බවත්, කිලෝවොට් 100ක මෝටර්වලින් සමන්විත බවත් ප්‍රකාශ කළද, රේගුවේ අවසන් තීරණය තවමත් ලැබී නොමැත.