කොළඹ පරාජයෙන් පසු SJB යුද පිටියක්.. මහ ලේකම් රට ගිහින්..

කොළඹ මහනගර සභාවේ බලය අහිමිවීමත් සමඟ සමගි ජන බලවේගය (SJB) තුළ බරපතළ අභ්‍යන්තර ගැටුමක් හටගෙන ඇති බව වාර්තා වේ. පක්ෂයේ ජ්‍යෙෂ්ඨ නායකයෙකු සඳහන් කළේ, පහසුවෙන් දිනාගත හැකිව තිබූ කොළඹ මහනගර සභාවේ බලය මඟ හැරීම සම්බන්ධයෙන් පක්ෂයේ ප්‍රබල ක්‍රියාකාරීන් රැසක් නායකත්වයට දැඩි දෝෂාරෝපණයක් එල්ල කර ඇති බවයි.

මෙම තත්ත්වය තවත් උග්‍ර වී ඇත්තේ, පළාත් පාලන ආයතනවල බලය පිහිටුවන තීරණාත්මක අවස්ථාවේදී පක්ෂ මහලේකම්වරයා විදේශගත වීම සම්බන්ධයෙන් බොහෝ ක්‍රියාකාරීන්ගේ දැඩි දෝෂ දර්ශනයට ලක්වීම හේතුවෙනි.

පක්ෂ ක්‍රියාකාරීන් චෝදනා කරන්නේ, කොළඹ මහනගර සභාව ඇතුළු පළාත් පාලන ආයතනවල බලය පිහිටුවීමේදී SJB නායකත්වය ප්‍රමාණවත් කැපවීමක් නොකළ බවයි. ඇතැම් නායකයන්ට එරෙහිව එල්ල වී ඇති චෝදනාවලින් ගැලවීමට ඔවුන් “නිද්‍රාශීලී” ප්‍රතිපත්තියක් අනුගමනය කළාද යන්න පිළිබඳව ද ඔවුහු සැක පළ කරති.

ජනාධිපතිවරණයේදී සන්ධානගතවීම ප්‍රතික්ෂේප කළ නායකත්වය, පළාත් පාලන ආයතන පිහිටුවීමේදී සන්ධානවලට යොමුවීම “විහිළුවක්” ලෙස ක්‍රියාකාරීහු පෙන්වා දෙති. එසේ කටයුතු කරමින් සභිකයන් “බිල්ලට දීම” අනුමත කළ නොහැකි බවද ඔවුහු අවධාරණය කරති.

-lankacnews