සෑම ඇමරිකානුවෙක්ම දැන් අපේ ඉලක්කයක්.. ඔබ ඇරඹුවා අප අවසන් කරනවා..- ඉරානය

ඉරාන න්‍යෂ්ටික මධ්‍යස්ථාන තුනකට ඇමෙරිකානු ගුවන් ප්‍රහාර එල්ලවීමත් සමඟ මැදපෙරදිග නොසන්සුන්තාවය තවදුරටත් උත්සන්න වී තිබේ. ඉරාන රාජ්‍ය රූපවාහිනිය මගින් සිදුකළ ප්‍රකාශයකින් අනතුරු අඟවා ඇත්තේ, කලාපයේ සිටින සියලුම ඇමෙරිකානු පුරවැසියන් සහ හමුදා නිලධාරීන් මේ වනවිට ඉරාන නීත්‍යානුකූල ඉලක්කයක් බවට පත්ව ඇති බවයි.

ඉරාන රාජ්‍ය රූපවාහිනී සජීවී වැඩසටහනකදී ප්‍රකාශ කළේ ඉරානයේ පහසුකම්වලට බෝම්බ හෙලීමෙන් ඇමරිකාව ආරම්භ කළ ගැටුම ඉරානය විසින් අවසන් කරනු ඇති බවයි.

“එක්සත් ජනපදය ඉරාන ගුවන් සීමාව උල්ලංඝනය කිරීමෙන් ඉරානයට එරෙහිව අපරාධයක් කර තිබෙනවා. බටහිර ආසියානු කලාපයේ ඔවුන්ට තැනක් නැහැ. ඔබ එය ආරම්භ කළ අතර, අපි එය අවසන් කරන්නෙමු.”

ඉරානයේ මෙම පැහැදිලි තර්ජනය තත්ත්වය බරපතල ලෙස උත්සන්න කිරීමක් ලෙස සැලකේ.

ජාත්‍යන්තර ප්‍රජාව මේ තත්ත්වය සමීපව නිරීක්ෂණය කරන අතර, දැනටමත් අස්ථාවර කලාපයක පුළුල් ගැටුමක් ඇතිවීමේ අවදානමක් පවතින බවට බොහෝ දෙනා බිය පළ කරති.

මෙම පුවතට ප්‍රතිචාර වශයෙන්, ලෝක බොරතෙල් මිලෙහි තියුණු වැඩිවීමක් දක්නට ලැබෙන අතර, එය සැපයුම්වලට ඇතිවිය හැකි බාධා පිළිබඳ පිළිබිඹු කරයි.