මහින්දගේ නොවන මහින්දගේ තවත් නිවෙසක් කතරගමින් මතුවේ!

රුහුණු කතරගම මහා දේවාලයේ බස්නායක නිලමේ ඩිෂාන් ගුණසේකර පැවැසුවේ, හිටපු ජනාධිපති මහින්ද රාජපක්ෂ වෙනුවෙන් කතරගම ඉදිකරන ලද නිවසක් සම්බන්ධයෙන් අපරාධ පරීක්ෂණ දෙපාර්තමේන්තුව (CID) ඊයේ තමන්ගෙන් ප්‍රශ්න කළ බවයි.

ජනමාධ්‍ය වෙත අදහස් දක්වමින් ඩිෂාන් ගුණසේකර සඳහන් කරන ලද්දේ, මෙම නිවස විමලරත්න නම් පුද්ගලයකු විසින් ඉදිකරන ලද බවත්, එවකට කතරගම කිරිවෙහෙර විහාරස්ථානයේ විහාරාධිපති හිමියන් විසින් අරමුදල් සපයන ලද බවත්ය.

නිවස ඉදිකරන ලද පුද්ගලයා දැනට අසනීප වී සිටින බවත්, එවකට කතරගම කිරිවෙහෙර විහාරස්ථානයේ විහාරාධිපති හිමියන් අපවත් වී ඇති බවත් පවසමින් ඩිෂාන් ගුණසේකර පැවසුවේ, ගොඩනැගිල්ලට අදාළ තොරතුරු දන්නා එකම පුද්ගලයා තමා බවයි.

එබැවින්, දේපළ පිළිබඳ විස්තර ලබාදීම සඳහා අපරාධ පරීක්ෂණ දෙපාර්තමේන්තුව තමාට කැඳවූ බව ඔහු තවදුරටත් පැවැසීය.

මෙම නිවස හිටපු ජනාධිපති මහින්ද රාජපක්ෂට අයත් නොවන බවත්, එය එවකට කතරගම කිරිවෙහෙර විහාරස්ථානයේ විහාරාධිපති හිමියන් විසින් ඔහු වෙනුවෙන් ඉදිකරන ලද බවත් ඩිෂාන් ගුණසේකර හෙළිකළේය.

“යුද්ධය අතරතුර, මහින්ද රාජපක්ෂ පන්සල් ගිය විට, ඔහු හෝටල්වල නවාතැන් ගත්තේ නැහැ. ඒ වෙනුවට පන්සල් දේපළ තුළ ඉදිකරන ලද නිවාස හෝ වෙනත් ස්ථානවල නවාතැන් ගත්තා. මෙම දේපළත් ඒ හා සමාන ගොඩනැගිල්ලක්” ඔහු තවදුරටත් සඳහන් කළේය.