අපේ රටේ අල්ලස සහ දූෂණයට අදාළව අසන්නට ලැබෙන මෙම බැරෑරුම් කතාන්දරය කුමක්ද? මෙරට ව්‍යාපාරික ප්‍රජාවද ආශ්‍රිත කරගනිමින් අසන්නට ලැබෙන මෙම බැරෑරුම් කතාව කියා සිටින්නේ කවරකු විසින්ද? මෙම අදහස් ප්‍රකාශ කර සිටින්නේ මෙරට සිටින කීර්තිමත්, ගෞරවනීය පුද්ගලයකු විසින්. ඔහු නම් ශ්‍රේෂ්ඨාධිකරණ විනිසුරු, ජනාධිපති නීතිඥ යසන්ත කෝදාගොඩ මහතාය. මෙරට නීති ක්ෂේත්‍රයේ කීර්තිමත් විද්වතකු වූ යසන්ත කෝදාගොඩ මහතා මෙරට ශ්‍රේෂ්ඨාධිකරණයේ විනිසුරුවරයකු ලෙස 2020 පෙබරවාරි මාසයේ සිට මේ දක්වා කටයුතු කරමින් සිටියි. එසේම ඔහු 2015 වසරේ සිට මේ දක්වා අතිරේක සොලිසිටර් ජනරාල් ධුරයෙහිද කටයුතු කළේය. මෙරට සිටි අතිශය කීර්තිමත් විද්වතකු වූ මහාචාර්ය නන්දදාස කෝදාගොඩ මහතාගේ පුත්‍රයා වන විනිසුරු යසන්ත කෝදාගොඩ මහතා කොළඹ ආනන්ද විද්‍යාලයෙන් අධ්‍යාපනය ලබා, ශ්‍රී ලංකා නීති විද්‍යාලයෙන් සහ එංගලන්තයේ ලන්ඩන් විශ්වවිද්‍යාලයෙන්ද උපාධි දෙකක් හිමිකර ගෙන ඇත. පසුගියදා ශ්‍රේෂ්ඨාධිකරණ විනිසුරු යසන්ත කෝදාගොඩ මහතා ඉහත බැරෑරුම් කතාව ප්‍රකාශ කර සිටියේ කොළඹ පැවැති ජාතික වාණිජ මණ්ඩලයේ වාර්ෂික මහාසභා රැස්වීමේ ප්‍රධාන ආරාධිත අමුත්තා ලෙස සහභාගි වූ අවස්ථාවේදීය. ශ්‍රී ලංකාවේ ප්‍රධානතම ව්‍යාපාරික ප්‍රජාව නියෝජනය කළ මෙම උත්සවයේදී ඔහු ව්‍යාපාරික ප්‍රජාව අමතා ඉහත ආන්දෝලනාත්මක කතාව සිදු කළේය. බොහෝ පාර්ශ්ව විසින් ඔහුගේ මෙම කතාව බොහෝ ප්‍රශංසාවට ලක්කළ අතර, පුළුල් මාධ්‍ය ප්‍රචාරණයකටද ලක්කෙරුණේය. මෙරට අල්ලස සහ දූෂණය මෙන්ම නීතිමය රාමුවද අවධානයට ගනිමින් ඔහු තම විද්වත් කතාව සිදුකළේය.
‘වසර අවසන් වනවිට ඔබ අන්තර් ක්‍රියාකරන රාජ්‍ය නිලධාරීන්ට බාධා කිරීම් සිදු නොකරන බව පෞද්ගලික අංශයේ ඔබගෙන් කී දෙනකුට ආඩම්බරයෙන් පැවැසිය හැකිද?රජයේ ප්‍රධාන ව්‍යාපෘති හසුරුවන ඔබගෙන් කී දෙනකුට ඔබේ අයවැයේ ව්‍යාපාර සංවර්ධන කටයුතු හෝ ව්‍යාපාර පහසුකම් ගෙවීම් සඳහා ප්‍රතිශතයක් වෙන්කර නොමැති බව අවංකවම පැවැසිය හැකිද? අල්ලස් හා දූෂණ වැළැක්වීම රජයේ ප්‍රධාන යුතුකමක් වෙනවා. එසේම අල්ලස් හා දූෂණ සඳහා වගකිව යුතු අයට නඩු පවරා නීතියට අනුව දඬුවම් ලබාදීමෙන් වගවීම සිදුකළ යුතුයි. මෙය සාක්ෂාත් කරගැනීම සඳහා ශක්තිමත් නීති පද්ධතියක්ද ක්‍රියාත්මක විය යුතුයි. 2023දී අල්ලස් – දූෂණ විරෝධී පනත සම්මත කරන ලදී. අල්ලස් හෝ දූෂණ චෝදනා විමර්ශන කොමිෂන් සභාවට (CIABOC) අල්ලස් හෝ දූෂණ සහ නීති විරෝධී ලෙස ධනය අත්පත් කරගැනීම් පිළිබඳ සිද්ධීන් විමර්ශනය කිරීමට සහ නඩු පැවරීමට සැලකිය යුතු බලයක් පැවරෙන ශක්තිමත් නීතියක් අත්‍යාවශ්‍යයි. අපරාධ පනතක් සකස් වෙමින් පවතින අතරතුර මුදල් විශුද්ධිකරණය වැළැක්වීමේ පනත යටතේ පියවර ගැනීමට කොමිසමට අයිතියක් ඇත. නමුත් දූෂණයෙන් තොර රටක් සංවර්ධනය කිරීම රජයේ යුතුකමක්ම පමණක් නොවන බව මම නැවත අවධාරණය කර සිටිනවා. පළමුව අපරාධවලින් උපයන මුදල් සැඟවුණු ස්ථානය හෝ අපරාධවලින් උපයන මුදල් පරිවර්තනය කර ඇති දේපළ ඇතුළු දූෂණය පිළිබඳ තොරතුරු ඇති අතර, ඔවුන් දන්නා දේ කොමිසමට හෙළිකළ යුතුයි. දෙවැනුව කොමිසම විමර්ශනය කරනු ලබන කරුණුවලට අදාළ තොරතුරු සහ ලේඛන වෙත ප්‍රවේශය ඇති පුද්ගලයන් සම්පූර්ණයෙන්ම සහයෝගයෙන් කටයුතු කළ යුතු අතර, සොයන දේ ලබාදිය යුතුයි. කොමිසමට ප්‍රකාශ ලබාදීමටත්, පසුව අධිකරණයේදී සත්‍ය සාක්ෂි දීමටත් සූදානම් විය යුතුයි…’
ශ්‍රේෂ්ඨාධිකරණ විනිසුරු යසන්ත කෝදාගොඩ මහතා තවදුරටත් තම කතාව මෙසේ පැහැදිලි කළේය.
‘තෙවැනුව නිලධාරීන්ට අල්ලස් දීමට ඇති ආශාවෙන් වැළකී එමගින් භාණ්ඩ හා සේවා සැපයීම සඳහා රජයේ කොන්ත්‍රාත්තු ලබාගත යුතුයි. ඔබේ ආයතනයට ව්‍යාපාරික වාසියක් ලබාගැනීමේ අරමුණෙන් රාජ්‍ය සේවකයන්ට සහ තේරී පත්වූ නිලධාරීන්ට තෑගි ලබා නොදෙන්න. ඔබේ වියදම් අයවැයෙන් අල්ලස් සඳහා අරමුදල් වෙන් නොකරන්න. ඔබ විසින් සකස් කරන ලද අනවශ්‍ය යෝජනා පිළිගැනීමට නිලධාරීන් දිරිමත් නොකරන්න. අනාගත හදිසි ප්‍රසම්පාදන සම්බන්ධයෙන් කල්තියා තොරතුරු සොයන්නට එපා. විනිවිද පෙනෙන සහ සාධාරණ ආකාරයකින් ව්‍යාපාර සඳහා තරග කිරීමට සූදානම්ව සිටින්න. වෙනත් වචනවලින් කිවහොත් අල්ලස් සහ දූෂණයට ඍජුව හෝ වක්‍රව හෝ අනුබල නොදෙන්න.
විනිසුරුවරයා තම කතාවේ අවසානයේ මෙසේ ප්‍රකාශ කර සිටියේය.
‘හතරවැනුව සහ අවසාන වශයෙන් ඔබේ අදාළ සංවිධාන තුළ අඛණ්ඩතාවයේ සංස්කෘතියක් සහ අල්ලස් හා දූෂණය සඳහා ශූන්‍ය ඉවසීමක් වර්ධනය කරන්න. දූෂණයට අදාළව තොරතුරු හෙළිදරව් කිරීම විවෘතව දිරිමත් කරන්න. මෙය ව්‍යාපාරික ප්‍රජාවගෙන් මා සිදුකරන කාරුණික ඉල්ලීමයි…’
-ප්‍රියන්ත හෙට්ටිගේ
