හිටපු ජනාධිපති මෛත්රීපාල සිරිසේනට එරෙහිව ශ්රී ලංකා නිදහස් පක්ෂයේ විධායක සභිකයෙකු වන මොන්ටේගු සරත්චන්ද්ර විසින් අධිකරණයට අපහාස කළේ යැයි චෝදනා කරමින් ගොනු කර තිබූ පෙත්සමක් අද (16) අභියාචනාධිකරණය හමුවේ සමථයකට පත් කළේය.
හිටපු ජනාධිපති මෛත්රිපාල සිරිසේන හට ශ්රී ලංකා නිදහස් පක්ෂයේ සභාපති ධුරයේ කටයුතු කිරීම වළක්වාලමින් කොළඹ දිසා අධිකරණය විසින් අතුරු තහනම් නියෝගයක් නිකුත් කර තිබියදී ඔහු එම ධුරයේ කටයුතු කිරීම හරහා අධිකරණයට අපහාසයක් සිදු කර ඇති බවට මෙම පෙත්සම තුළින් චෝදනා කර තිබූණේය.
මෙම පෙත්සම අභියාචනාධිකරණ විනිසුරු මඩුල්ල ඉදිරියේ කැඳවනු ලැබු අවස්ථාවේදී වගඋත්තරකාර මෛත්රිපාල සිරිසේන වෙනුවෙන් පෙනී සිටි ජනාධිපති නීතිඥ මෛත්රී ගුණරත්න අධිකරණය හමුවේ කරුණු දක්වමින් තම සේවාදායකයා මින් ඉදිරියට ශ්රී ලංකා නිදහස් පක්ෂයේ සභාපති ධුරය සදහා ඉදිරිපත් නොවන බවටත් වත්මන් සභාපති නිමල් සිරිපාල ද සිල්වා සහ ලේකම්වරයා සම්බන්ධයෙන් විරුද්ධත්වයක් නොදක්වන බව සදහන් කළේය.
එම කරුණු මත මෙම පෙත්සම සමථයකට පත් කිරීමට හැකියාව තිබෙන බවත් ජනාධිපති නීතිඥවරයා අධිකරණයට දැනුම් දුන් අතර එම දැනුම්දීම සම්බන්ධයෙන් සෑහීමකට පත්වන බවත් එම කරුණු මත පෙත්සම සමථයකට පත් කිරීමට එකඟ වන බව පෙත්සම්කාර පාර්ශවයේ නීතිඥ ශාන්ත ජයවර්ධන අධිකරණයට දන්වා සිටියේය.
ඒ අනුව අදාල පෙත්සම සමථයකට පත්කළ අභියාචනාධිකරණ විනිසුරු මඩුල්ල අනතුරුව එය ඉල්ලා අස්කර ගැනීමට අවසර දෙමින් නිෂ්ප්රභ කිරීමට තීන්දු කළේය.
