දිවයිනපුරා රෝහල්වලට පැමිණෙන දියවැඩියා රෝගින්ට ලබා දෙන ඉන්සියුලින් නොමැතිවීම නිසා සායනවලට ඊයේ (27) පැමිණි රෝගීන් දැඩි අසීරුතාවට පත්වූ බව වාර්තා වේ.
කොළඹ ජාතික රෝහල ඇතුළු දිවයින පුරා රෝහල් රැසක ඉන්සියුලින් නොමැති බව වෛද්‍යවරුන් රෝගීන්ට ප්‍රකාශ කර තිබේ.
මික්සටාර්ඩ් (Mixtard) නමැති මෙම ඉන්සියුලින් රෝගීන්ට ලබා දෙන්නේ නිවෙස්වලට ගොස් එන්නත් කර ගැනීම සඳහායි.
එන්නත් හිඟයට හේතු වී ඇත්තේ එන්නත් කුප්පි හත්ලක්ෂ පනස් දෙදහසක් ලබා ගැනීම සඳහා රාජ්‍ය ඖෂධ නීතිගත සංස්ථාව ටෙන්ඩර් කැඳවා එම ඇණවුම
Emerchemie NB (Ceylon) Limited නැමැති සමාගමට ලබා දී ඇති නිසා බව සෞඛ්‍ය අමාත්‍යාංශය ප්‍රකාශ කරයි.
එහෙත් Emerchemie NB (Ceylon) Limited සමාගම ඉන්සියුලින් සඳහා ලියාපදිංචිය යාවත්කාලීන කර ගැනීමට ජාතික ඖෂධ නියාමන අධිකාරියට අයැදුම්පතක් ඉදිරිපත්කර ඇතත් මෙතෙක් ඊට අනුමැතිය ලබා නොදීම නිසා එම ඉන්සියුලින් සැපයීමට නොහැකි වී ඇතැයි ද පැවසේ.
මේ පිළිබඳව හිටපු සෞඛ්‍ය ලේකම් විශේෂඥ වෛද්‍ය පාලිත මහීපාල මහතාගේ ප්‍රධානත්වයෙන් පසුගිය 21 වැනිදා පැවැති ඖෂධ සමාලෝචන රැස්වීමේදීද අවධානය යොමු කර ඇත.
එම අවස්ථාවේදී ජාතික ඖෂධ නියාමන අධිකාරිය ප්‍රකාශ කර ඇත්තේ යාවත්කාලීන කරන ලද බලපත්‍රය සූදානම් කර ඇති බවයි. කෙසේවුවද, අදාළ සමාගම එම බලපත්‍රය ලබා ගැනීමට මෙතෙක් කටයුතු කර නොමැති බව වාර්තා වේ.
මේ නිසා මෙම ඉන්සියුලින් හිඟය නිර්මාණය වී තිබේ.
මෙරට දියවැඩියා රෝගීන් සංඛ්‍යාව දාහතර ලක්ෂ දාහත් දහසකට අධික වෙයි. ඉන්සියුලින් සඳහා ලියාපදිංචිය යාවත්කාලීන කර ගැනීමට ජාතික ඖෂධ නියාමන අධිකාරියට ඉදිරිපත් කර ඇති අයැදුම්පත ට අනුමැතිය ලබා නොදීම සම්බන්ධයෙන් ජාතික ඖෂධ නියාමන අධිකාරියේ සභාපති විශේෂඥ වෛද්‍ය ආනන්ද විජේවික්‍රමගෙන් විමසීමක් කළ අතර එහිදී ඔහු ප්‍රකාශ කළේ මේ සම්බන්ධව පුවත්පතට අදහස් දැක්වීම ප්‍රතික්ෂේප කරන බවයි.
ඖෂධ ආනයන කරුවන්ගේ සංගමයේ සභාපතිවරයා ලෙස කටයුතු කරනු ලබන්නේ ද Emerchemie NB (Ceylon) සමූහයේ ප්‍රධාන විධායක නිලධාරියා ලෙස කටයුතු කරනු ලබන මයිල්වාගනම් ප්‍රතාපන් නැමැත්තාය.
