පරිසර, වනජීවී, වන සම්පත්, ජල සම්පාදන, වැවිලි සහ ප්‍රජා යටිතල පහසුකම් අමාත්‍යාංශයේ ලේකම් ප්‍රභාත් චන්ද්‍රකීර්ති මහතා වැවිලි අමාත්‍යාංශයට උපදෙස් ලබාදී ඇත්තේ තල් සංවර්ධන මණ්ඩලයේ හිටපු සභාපතිවරයා විසින් ප්‍රංශයේ දින 23ක සංචාරයක් සඳහා එම මණ්ඩලයේ රුපියල් ලක්ෂ 19කට අධික මුදලක් වැය කිරීම සම්බන්ධව වහාම පරීක්ෂණයක් පවත්වන ලෙසයි
මේ අතර හිටපු සභාපතිවරයා සිය අස්වීමේ ලිපිය අමාත්‍යාංශ ලේකම්වරයාට ඊයේ (01 වැනිදා) භාරදී ඇති බවද වාර්තා වෙයි.
ඉකුත් 2020 වසරේදී හිටපු සභාපතිවරයා තල් සංවර්ධන මණ්ඩලයේ සභාපතිවරයා ලෙස පත්වීම් ලබා ඇති අතර, ඔහු ප්‍රංශය ඇතුළු යුරෝපීය රටවල ශ්‍රී ලාංකීය තල් නිෂ්පාදන ප්‍රචලිත කිරීමට යැයි පවසමින් ඉකුත් 2021 වසරේ සැප්තැම්බර් මස 04 වැනිදා සිට 27 වැනිදා දක්වා සංචාරයක නිරතවී ඇති බව වාර්තා වෙයි.
හිටපු සභාපතිවරයා විසින් මෙම දින 23ක සංචාරය සඳහා එම මණ්ඩලයේ ප්‍රතිපාදන වලින් වියදම් කර ඇති මුදල රුපියල් දහනව ලක්ෂ හතළිස් නවදහස් හාරසිය පනහකි (1,949,450.00).
සභාපතිවරයාගේ ප්‍රංශ සංචාරයේ අරමුණ වී තිබූ බව පැවසෙන්නේ ශ්‍රී ලාංකීයව නිපදවන තල් ආශ්‍රිත නිෂ්පාදන ප්‍රංශය ඇතුළු යුරෝපීය රටවල අලෙවිය දියුණු කිරීම, ගබඩා පහසුකම් දියුණු කිරීම, දේශීය තල් නිෂ්පාදන අලෙවි ජාලය විධිමත්ව පවත්වාගෙන යාම සඳහා නියෝජිතයකු පත් කිරීම යන කාරණා වෙයි.
නමුත් 2021 වසරේදී සහ 2022 වසරේ අප්‍රේල් මාසය දක්වා වූ කාලය තුළදී යුරෝපීය රටවලට මෙරට තල් නිෂ්පාදන අපනයනයේ ආදායම රුපියල් බිංදුවක් බවට මහ බැංකු වාර්තා පෙන්වා දෙයි.
හිටපු සභාපතිවරයා විසින් අධ්‍යක්ෂ මණ්ඩලයේ අනුමැතියකින් තොරව ස්ව කැමැත්ත පරිදි ඉතාලිය, ප්‍රංශය සහ ඔස්ට්‍රේලියාව ආදී රටවල්වලට මෙරට තල් නිෂ්පාදන ප්‍රවර්ධනයට නියෝජිතයන් පත්කර ඇතත්, එම රටවලින්ද මෙරට තල් නිෂ්පාදන අපනයන ආදායම බිංදුවක් බව වාර්තා වී තිබේ.
තල් සංවර්ධන මණ්ඩලය පාලනය වූයේ පොල්, කිතුල්, තල් වගා ප්‍රවර්ධනය හා ආශ්‍රිත කාර්මික භාණ්ඩ නිෂ්පාදන අපනයන විවිධාංගීකරණ රාජ්‍ය අමාත්‍යාංශය යටතේ වන අතර එම අමාත්‍යාංශයේ පරීක්ෂණ මණ්ඩලයක් විසින් කරන ලද විගණනයකදී මෙම තොරතුරු අනාවරණය වී ඇත.
කෙසේවෙතත ැම පරීක්ෂණ මණ්ඩලය විසින් නිර්දේශ කර ඇත්තේ සභාපතිවරයා විසින් ප්‍රංශ සංචාරය සඳහා වැය කරන ලද මුදල යළි අය කරගන්නා ලෙසය. මෙම මුදල හිටපු සභාපතිවරයා ගෙවා ඇත්ද යන්න පිළිබඳවද සොයා බලන ලෙස පරිසර, වනජීවි, වන සම්පත්, ජල සම්පාදන, වැවිලි සහ ප්‍රජා යටිතල පහසුකම් අමාත්‍යාංශයේ ලේකම්වරයා වැවිලි කර්මාන්ත අමාත්‍යාංශයට දැනුම්දී ඇත.
මෙරට තල් නිෂ්පාදන මධ්‍යස්ථානවල නිෂ්පාදන කටයුතු අවම මට්ටමක පවතින බවත්, මණ්ඩලය විසින් සිදුකර ඇත්තේ තල් නිෂ්පාදන සිදු කරන සමාගම්වලින් නිෂ්පාදන ලබාගෙන සුළු ලාභයක් තබාගෙන මණ්ඩලයේ අලෙවි සල්වලවල අලෙවි කර ඇති බවත් මෙම අභ්‍යන්තර විගණනයේදී හෙළිදරව් වී තිබේ.
හිටපු සභාපතිවරයාට විරුද්ධව යාපනය මහෙස්ත්‍රාත් අධිකරණයේ නඩුවක් විභාග වන බවටද අදාළ පරීක්ෂණ මණ්ඩලය විසින් සිය වාර්තාවෙන් අනාවරණය කර තිබේ. මණ්ඩලයේ ගිණුම් හා අනෙකුත් සාක්ෂි ගිනි තැබීමේ සිද්ධියක් පිළිබඳව මණ්ඩලයේ සේවකයකු විසින් යාපනය මහෙස්ත්‍රාත් අධිකරණයේ නඩුවක්ද ගොනුකර ඇතැයි එම පරීක්ෂණ වාර්තාවේ දැක්වේ.
