හොරු අල්ලන්න හිටපු රන්ජන් හොරෙක් අල්ලගෙන – දිලිත්

හොරු අල්ලන්න හිටපු රන්ජන් රාමනායක හොරෙක් අල්ලගෙන ඇතැයි සමාජ මාධ්‍යවල පළවී තිබෙන බවත්, රන්ජන් රාමනායක නිරතවී සිටින්නේ ව්‍යාපාරික කටයුත්තක බවත් සර්ව ජනබලය පක්ෂයේ නායක, ගම්පහ දිස්ත්‍රික් අපේක්ෂක, ව්‍යවසායක දිලිත් ජයවීර මහතා කියයි.

ජයවීර මහතා මේ බව කියා සිටියේ බොරැල්ල පිහිටි එම පක්ෂ කාර්යාලයයේ අද (29) පැවැති මාධ්‍ය හමුවකදී ය.

වැඩිදුරටත් අදහස් දැක්වූ ව්‍යවසායක දිලිත් ජයවීර,

“රන්ජන් රාමනායක ව්‍යාපාරික කටයුත්තක නිරත වෙලා ඉන්නේ. එතුමාගේ දේශපාලන ප්‍රවේශය ගත්තොත් ඒ පක්ෂයේ නායකයා කවුද, ඒ පක්ෂය අයිති කාටද, ඒ පක්ෂයේ මූලධර්ම මොනවාද, ඒ පක්ෂයේ අපේක්ෂාවන් මොනවාද, ඒ පක්ෂය විශාල වශයෙන් මුදල් වියදම් කරනවා. රන්ජන් රාමනායක හොරු අල්ලන්න හිටපු කෙනෙක්. මම දැක්කා සමාජ මාධ්‍යවල සඳහන් වෙලා තියෙනවා හොරු අල්ලන්න හිටපු රන්ජන් හොරෙක් අල්ලගෙන කියලා. ඒකයි කතාව. මේක දේශපාලන විකෘතියක්. ප්‍රජාතන්ත්‍රවාදයේ නාමයෙන් මෙයට දැඩි ප්‍රතිචාරයක් දැක්විය යුතුයි. මේ විකෘතිය නිවැරදි විය යුතුයි. ශ්‍රී ලංකාවේ දේශපාලනය කරන්නට ඕනෑම ශ්‍රී ලාංකිකයකුට අයිතිය තියෙනවා. හැබැයි මේ එන විකෘතිය මෙරට දේශපාලනයේ කලින් නොතිබුණු දෙයක්. සියලු දෙනා එක්ව මෙය නිවැරදි කිරීම සදහා පෙනී සිටිය යුතුයි’’ යැයිද ඔහු කීවේය.