සජිත්ටයි මද්දුම බණ්ඩාරටයි එරෙහිව ඕෂලගෙන් ‘මැකො’ට පැමිණිල්ලක්!

ශ්‍රී ලංකා පුරවැසිභාවය නොමැති බව දැන දැනත් ඩයනා ගමගේ සමගි ජන බලවේගයේ ජාතික ලැයිස්තු මන්ත්‍රීවරියක් ලෙස නම් කිරීම මගින් 1981 අංක 1 දරන පාර්ලිමේන්තු මැතිවරණ පනත උල්ලංඝනය කළ බවට චෝදනා කරමින් සමගි ජන බලවේගයට, විපක්ෂ නායක සජිත් ප්‍රේමදාසට සහ සමගි ජන බලවේගයේ ප්‍රධාන ලේකම් පාර්ලිමේන්තු මන්ත්‍රී රංජිත් මද්දුම බණ්ඩාරට එරෙහිව පියවර ගන්නා ලෙස සමාජ ක්‍රියාකාරික ඕෂල හේරත් මැතිවරණ කොමිසමෙන් ඉල්ලා තිබේ.

හේරත් විසින් ශ්‍රේෂ්ඨාධිකරණය හමුවේ ගොනු කරන ලද නඩුවක ප්‍රතිඵලයක් ලෙස ගමගේ සතු එක්සත් රාජධානියේ පුරවැසිභාවය හේතුවෙන් පාර්ලිමේන්තු මන්ත්‍රී ධුරය අහිමි විය.

ඕෂල හේරත් පවසන්නේ ඩයනා ගමගේට ශ්‍රී ලංකා පුරවැසිභාවය නොමැති බව තමන් 2020 දී ප්‍රේමදාස සහ මද්දුම බණ්ඩාර යන දෙදෙනාටම පැහැදිලි සාක්ෂි සහිතව දැනුම් දුන් බවයි.

මේ පිළිබඳ ඔවුන්ට දැනුම්දීමට අමතරව තමන් ඔවුන්ව අදාළ නඩුවල වගඋත්තරකරුවන් ලෙස නම් කළ බවත් එම නඩුවලදී ඔවුන් ඉදිරිපත් කළ කරුණුවලින් පෙනී යන්නේ ඇයට ශ්‍රී ලංකා පුරවැසිභාවය නොමැති බව ඔවුන් හොඳින්ම දැන සිටි බව යනුවෙනුත් ඕෂල හේරත් පවසයි.

මෙම ගැටලුව මැතිවරණ කොමිසම වෙත දැනුම්දීමට හෝ ගමගේට එරෙහිව නීතිමය ක්‍රියාමාර්ග ගැනීමට අපොහොසත් වීමෙන් ප්‍රේමදාස සහ මද්දුම බණ්ඩාර ගමගේ කළ වරදට ඵලදායි ලෙස ආධාර සහ අනුබල ලබා දී ඇති බව ඔහු වැඩිදුරටත් ප්‍රකාශ කර තිබේ.

ගමගේ, ප්‍රේමදාස සහ මද්දුම බණ්ඩාර යන තිදෙනාම පාර්ලිමේන්තු මැතිවරණ පනත යටතේ වැරදි කර ඇති බව මෙයින් පැහැදිලි වන බැවින් එවැනි වැරදි නැවත සිදු නොවීමට ඔවුන්ට එරෙහිව පියවර ගන්නා ලෙස තමන් මැතිවරණ කොමිෂන් සභාවට ලිඛිත ඉල්ලීමක් ඉදිරිපත් කළ බව ඕෂල හේරත් පවසයි.

ගමගේ පාර්ලිමේන්තු මන්ත්‍රී ධූරයක් දැරීමට නුසුදුස්සකු බව ශ්‍රේෂ්ඨාධිකරණය මැයි 8 වැනිදා තීන්දු කළේය.

එම තීන්දුවෙන් පසු මාධ්‍ය වෙත අදහස් දක්වමින් මද්දුම බණ්ඩාර සඳහන් කළේ ජාතික ලැයිස්තු මන්ත්‍රීවරයකු ලෙස නාමයෝජනා ලබා දීමේදී නොමඟ යවන සුළු ලිපි ලේඛන ඉදිරිපත් කළ බව කියන ගමගේට එරෙහිව නීතිමය ක්‍රියාමාර්ග ගැනීමට සමගි ජන බලවේගය අපේක්ෂා කරන බවයි.(Daily Morning)