1979 වසරේ ඉදිවුනු වසර 40 ක් පමණ පැරණි වත්මන් පාර්ලිමේන්තු ගොඩනැගිල්ලේ යම් යම් ප්‍රතිසංස්කරණ සිදුකිරීම අවශ්‍යවන අතර එම ප්‍රතිසංස්කරණ කටයුතු වහාම ආරම්භකිරීමට කටයුතු යොදා අවසන් බව මුදල් රාජ්‍ය අමාත්‍ය රංජිත් සියඹලාපිටිය මහතා පවසයි.
රී ජයවර්ධනපුර කෝට්ටේ ප්‍රදේශයේ දියවන්නා ඔය මධ්‍යයේ පිහිටි අක්කර 16ක කුඩා දූපතක නව පාර්ලිමේන්තු සංකීර්ණය ඉදිකිරීම ආරම්භ වූයේ 1979 වසරේදීය.
එවකට ජනාධිපති ජේ.ආර්.ජයවර්ධන මැතිතුමාගේ මඟපෙන්වීම යටතේ එවකට අග්‍රාමාත්‍යවරයා වූ රණසිංහ ප්‍රේමදාස මැතිතුමා මෙම ගොඩනැගිල්ල ඉදිකිරීමට උපදෙස් ලබා දී ඇත.
ඒ අනුව ජෙෆ්රි බාවා ප්‍රධාන වාස්තු විද්‍යාඥයා ලෙස තෝරාගෙන නව ගොඩනැගිල්ල ඉදිකිරීම සඳහා ජපන් සමාගමකට පැවරිණි. ශ්‍රී ලාංකේය සම්ප්‍රදායන් මත පදනම් වූ පාර්ලිමේන්තු ගොඩනැගිල්ලේ සියලු වාස්තුවිද්‍යාත්මක විචිත්‍රත්වය තුළ ප්‍රදේශයට ප්‍රමුඛත්වය ලබා දී ඇත.
කෝට්ටේ ශ්‍රී ජයවර්ධනපුර ගොඩනැගිල්ලේ ඉදිකිරීම් 1982 දී නිම කර නව පාර්ලිමේන්තුව උත්සවාකාරයෙන් 1982 අප්‍රේල් 29 විවෘත කරන ලදී. ඒ අනුව ගාලු මුවදොර පිහිටි පාර්ලිමේන්තුවේ කටයුතු කෝට්ටේ ශ්‍රී ජයවර්ධනපුර අභිනවයෙන් ඉදිකරන ලද පාර්ලිමේන්තුව වෙත ගෙන යන ලදී.
විශේෂයෙන්ම නව පාර්ලිමේන්තු ගොඩනැගිල්ල වන ශ්‍රී ජයවර්ධනපුර විවෘත කිරීමත් සමඟ කෝට්ටේ ශ්‍රී ලංකාවේ ප්‍රධාන පරිපාලන නගරය බවට පත් විය.
ඒ අනුව ඉදිකිරීමෙන් වසර 40ක් සම්පූර්ණ වන පාර්ලිමේන්තු සංකීර්ණයේ අත්‍යවශ්‍ය ප්‍රතිසංස්කරණයන් සිදුකිරීමට පසුගිය 25 වනදා කථානායකවරයාගේ ප්‍රධානත්වයෙන් පැවැති උපදේශක කාරක සභා රැස්වීමේදී නාගරික සංවර්ධන අධිකාරියේ සහ මධ්‍යම ඉංජිනේරු උපදේශක කාර්යාංශයේ මැදිහත්වීමෙන් එම කටයුතු සිදුකිරීමට තීරණය කර තිබේ.
