මූල්‍ය ආයතන ආරක්ෂා කරමින් එම ආයතනවලින් ණය ලබා ගෙන තිබෙන ව්‍යවසායකයන් ද ආරක්ෂා කිරීමේ ප්‍රායෝගික වැඩ පිළිවෙලක් වෙනුවට පරාටේ නීතිය ක්‍රියාත්මක කිරීම අත්හිටුවන බවට ජනාධිපති රනිල් වික්‍රමසිංහ ප්‍රමුඛ ආණ්ඩුව ගෙන ගිය ප්‍රචාරය මුලුමනින්ම අසත්‍යයක් බවට තහවුරු වී තිබේ.
මේ වනවිට සුළු හා මධ්‍යම පරිමාණ කර්මාන්තකරුවන් දෙලක්ෂයකට වැඩි පිරිසකගේ ආයතන මුළුමනින්ම වසා ඇති බව හෙළිවී තිබේ. එවැනි තත්වයක් තුළ ණය ගෙවා ගත නොහැකි වූ ව්‍යවසායකයින්ගේ දේපළ පරාටේ නීතිය යටතේ බැංකු ඇතුළු මූල්‍ය ආයතන මගින් අත්පත් කර ගැනීමට කටයුතු කර තිබිණි.
මෙසේ අත්පත් කර ගැනීම් නවත්වා සහන සලසන ලෙස එම ව්‍යවසායකයන් දිගින් දිගටම ආණ්ඩුවට බලපෑම් කිරීම හමුවේ මැතිවරණ ප්‍රචාරක අංගයක් ලෙස ආණ්ඩුව එය යොදා ගනු ලැබීය. පසුගිය පෙබරවාරි මස කැබිනට් මණ්ඩලය ගනු ලැබූ තීරණයක් අනුව පරාටේ නීතිය ක්‍රියාත්මක කිරීම අත්හිටුවන බව ආණ්ඩුව විශාල ප්‍රචාරයක් දියත් කර තිබිණි.
එහෙත්, පරාටේ නීතිය ක්‍රියාත්මක කිරීම කිසිසේත් ම අත්හිටුවීමට ක්‍රියා නොකරන බව ශ්‍රී ලංකා බැංකුකරුවන්ගේ සංගමය අවධාරණය කර තිබේ.
එම සංගමය නිවේදනයක් නිකුත් කරමින් මේ බව අවධාරණය කර ඇත. එම නිවේදනයෙන් ආණ්ඩුවේ ක්‍රියාමාර්ග දෝෂ දර්ශනයට ලක් කරමින් කැබිනට් මණ්ඩලය පරාටේ නීතිය ක්‍රියාත්මක කිරීමේ අත්හිටුවීමේ තීරණය ඒක පාර්ශවිකව ගෙන ඇති බව පෙන්වා දී තිබේ. ආණ්ඩුව මූල්‍ය ආයතන සමඟ කිසිදු සාකච්ඡාවක් නොකොට මෙම තීරණය ගැනීම සම්බන්ධයෙන් අප්‍රසාදය පළ කර ඇති අතර ශ්‍රී ලංකා බැංකු සංගමය ද මෙම නිවේදනයේ කරුණු අනුමත කර තිබේ.
රනිල්ගේ ප්‍රචාරය සම්බන්ධයෙන් දිනමිණ පළ කර තිබූ ප්‍රවෘත්තිය
සුළු හා මධ්‍ය පරිමාණ ව්‍යවසායකයන්ට හුස්ම ගන්න අවස්ථාවක්
පරාටේ නීතිය අත්හිටුවීම ගැන ව්‍යාපාරික ප්‍රජාවේ ප්‍රසාදය
සහන ලබා ගන්න ව්‍යවසායක කර්මාන්තකරුවන්ට අවස්ථාව උදා කර දිය යුතුයි
පසුගිය වසර තුනක කාලයක සිට පවතින ආර්ථික පසුබෑම හේතුවෙන් අඩපණවූ සුළු හා මධ්‍ය පරිමාණ කර්මාන්ත සහ ව්‍යවසායකයන්ට යළි හුස්ම ගැනීමට ලැබුණු අගනා අවස්ථාවක් ලෙස පරාටේ නීතිය ක්‍රියාත්මක කිරීම දෙසැම්බර් 15 වැනිදා දක්වා අත්හිටුවීමට රජය ගත් තීරණය හැඳින්විය හැකි බව මෙරට ප්‍රධානතම සුළු හා මධ්‍ය පරිමාණ කර්මාන්තකරුවන්ගේ එකමුතුවේ ජාතික සංවිධායක එස්.එන්. රාගුවන් මහතා ප්‍රකාශ කළේය.
කොළඹ අධිකරණ අමාත්‍යාංශයේ ශ්‍රවණාගාරයේ ඊයේ (28) දහවල් පැවැති විශේෂ මාධ්‍ය හමුවට එක්වෙමින් ජාතික සංවිධායකවරයා එසේ පැවසීය.
පරාටේ නීතිය ක්‍රියාත්මක කිරීම තාවකාලිකව අත්හිටුවීම තම එකමුතුව ඇතුළු අප රටේ ක්ෂුද්‍ර සුළු හා මධ්‍ය පරිමාණ පමණක් නොව මහා පරිමාණ වුව කර්මාන්ත සහ ව්‍යාවසායකයන්ගේ ජයග්‍රහණයක් වන බව ද ඔහු කීය.
පරාටේ නීතිය ක්‍රියාත්ම කිරීම මාස දහයකින් අත්හිටුවීම සමඟ බිඳවැටුණු කර්මාන්තවලට නැවත නැඟිටීමට ණය ප්‍රතිව්‍යුහගතකරණය කර ගැනීමේ විධිමත් යන්ත්‍රණයක් සකස් කළ යුතු යැයි ජාතික සංවිධායකවරයා පෙන්වා දුන්නේය.
එස්.එන්. රාගුවන් මහතා එහිදී මෙසේද සඳහන් කළේය.
“ජනාධිපති රනිල් වික්‍රමසිංහ මහතා මුදල් ඇමැතිවරයා ලෙස කැබිනට් මණ්ඩලයට ඉදිරිපත් කළ මෙම යෝජනාව සම්මත වීම දැන් සිදු වී තිබෙනවා. එළඹ තිබෙන්නේ එම සහනය අප එකමුතුවේ සාමාජිකයන් ඇතුළු සියලු රටවැසි ව්‍යවසායක සහ කර්මාන්තකරුවන්ට ලබා ගැනීමට අවස්ථාව උදා කිරීමයි.
මෙහිදී අධිකරණ අමාත්‍යාංශයට සුවිශාල කාර්යභාරයක් පැවරී තිබෙනවා. එම කාර්යභාරය අප සමඟ එකතුව අධිකරණ ඇමැති ආචාර්ය විජයදාස රාජපක්ෂ මහතා ඉටු කරන බව අපට විශ්වාසයි.
මීට දින හැටපහකට පෙර කර්මාන්ත ඇමැති වෛද්‍ය රමේෂ් පතිරණ මහතාත් අධිකරණ ඇමැතිවරයාත් සහභාගි කරවාගෙන බණ්ඩාරනායක සම්මන්ත්‍රණ ශාලාවේදී අප එකමුතුවේ විශාල දැනුවත් කිරීමේ වැඩපිළිවෙළක් ක්‍රියාත්මක කළා.
එහි ප්‍රතිඵලයක් ලෙස අපගේ හඬ ඇමැති මණ්ඩලය දක්වා ගෙන ගොස් අද වන විට තීරණාත්මක ජයග්‍රාහී මාවතකට පැමිණ තිබෙනවා. මෙය ආරම්භය පමණයි. මින් ඔබ්බට බිඳ වැටුණු ව්‍යාපාර සහ කර්මාන්තකරුවන්ට යළි නැඟී සිටීමට අවශ්‍ය සහන ලබා ගැනීම පිළිබඳවයි අපේ අවධානය යොමු වන්නේ.”
ශ්‍රී ලංකා සුළු හා මධ්‍ය පරිමාණ කර්මාන්තකරුවන්ගේ වාණිජ මණ්ඩලයේ උප සභාපතිනී ශෂිකා ද සිල්වා මහත්මිය,
“බිඳවැටුණු ව්‍යාපාර නැවත ගොඩනැඟීම යනු ශ්‍රී ලංකා ආර්ථිකය ශක්තිමත් කිරීමේ අඩිතාලම දැමීමක්. මේ වන විට ඒ සඳහා මුල් පියවර තබා තිබෙනවා. අපේ කර්මාන්ත එකමුතුවේ සාමාජිකයන් කිසිවකු හිතාමතාම බැංකු ණය පැහැර හැරීමට කටයුතු කර නැහැ. රටේ ඇතිවූ අපට පාලනය කළ නොහැකි කරුණු නිසා ආර්ථිකය බිඳ වැටුණා. ඉන් අපට පීඩාවට පත්වීමට සිදු වුණා. දැන් අවස්ථාවක් ලැබී තිබෙනවා. යළි නැඟී සිටීමට අප ශක්තිමත් විය යුතුයි. අප වාගේම ශ්‍රී ලංකා මහ බැංකුව, එහි අධිපතිවරයා, මුදල් මණ්ඩලය වාගේම රටේ සියලු බැංකු හා මූල්‍ය ආයතන ප්‍රධානීන් සියලු දෙනා එක්ව විධිමත් වැඩපිළිවෙළක් හරහා යළි නැඟී සිටීමට කටයුතු කළ යුතුයි. අප කිසිවකුටත් චෝදනා නඟමින් සිටියාට වැඩක් වන්නේ නැහැ. අප සියලු දෙනා එකමුතුව කටයුතු කළොත් අපටත් රටටත් ආර්ථික වශයෙන් යළි නැඟී සිටීමට හැකි වෙනවා. ඒ අනුව අප කටයුතු කරමු.“
මෙම අවස්ථාවට සුළු හා මධ්‍ය පරිමාණ කර්මාන්ත සහ ව්‍යාවසායක ප්‍රජාව නියෝජනය කරමින් පරාටේ නීතිය යටතේ පීඩාවට පත්වූ පිරිස් සහභාගි වී සිටි අතර, කිහිපදෙනෙක් මෙහිදී අදහස් දැක්වූහ.
- lankatruth
