“භික්ෂූන් වහන්සේ ගියේ එක දවසක, මම ගියේ වෙන දවසක” – කිංග්ස්බරි සිද්ධියේ ඇත්ත හෙළි කිරීමට සරත් වීරසේකර මාධ්‍ය කැඳවයි!
සමාජ මාධ්‍ය ඔස්සේ සංසරණය වූ සංස්කරණය කරන ලද CCTV දර්ශන සම්බන්ධයෙන් කොළඹ කිංග්ස්බරි හෝටලයට එරෙහිව රුපියල් මිලියන 100ක වන්දි ඉල්ලා එන්තරවාසියක් යොමු කළ හිටපු අමාත්‍ය සරත් වීරසේකර මහතා, ඒ පිළිබඳව කරුණු පැහැදිලි කිරීම සඳහා මාධ්‍ය හමුවක් කැඳවා තිබෙනවා.
අදාළ එන්තරවාසියට අනුව, පසුගිය ඔක්තෝබර් 24 වැනිදා තමන් හෝටලයට පැමිණි අවස්ථාවේ පටිගත වූ CCTV දර්ශන සංස්කරණය කර, තමන් සහ බෞද්ධ භික්ෂූන් වහන්සේ නමක් එකම හෝටල් කාමරයකට එකම හෝ ආසන්න වේලාවක ඇතුළු වූ බවට වැරදි අදහසක් ඇති වන අයුරින් අන්තර්ජාලයට මුදාහැර ඇති බවට ඔහු චෝදනා කරනවා.
එම දර්ශන සහ ස්ථාවර ඡායාරූප හෝටලය විසින් නිකුත් කර ඇති බවට ෆේස්බුක් පිටු සහ යූටියුබ් නාලිකා කිහිපයක් ඔස්සේ ප්‍රචාරය වී ඇති බව ද එන්තරවාසියේ සඳහන් වනවා.
හෝටලය සතු මුල් CCTV දර්ශන, පෞද්ගලිකත්වය සම්බන්ධ ප්‍රතිපත්ති සහ තමන්ගේ එකඟතාව පිළිබඳ ගැටලු නොසලකා හරිමින් පිටතට නිකුත් කර ඇති බවට ද ඔහුගේ නීතිඥවරුන් චෝදනා කර තිබෙනවා.
මෙම සිදුවීම හේතුවෙන් තමන් දැඩි මානසික පීඩනයකට, කීර්තිනාමයට හානියකට සහ අන්තර්ජාල හිරිහැරවලට මුහුණ දී ඇති බව පවසන සරත් වීරසේකර මහතා, අදාළ දර්ශන නිකුත් කිරීම සම්බන්ධයෙන් වගකිවයුත්තන් හඳුනාගෙන ප්‍රසිද්ධියේ සමාව අයැදින ලෙසත්, එම දර්ශන ඉවත් කරන ලෙසත් ඉල්ලා සිටිනවා.
එම ඉල්ලීම් දින හතක් ඇතුළත ඉටු නොකළහොත් අපහාස කිරීම, පෞද්ගලිකත්වයට අයුක්ති සහගත ලෙස මැදිහත් වීම සහ කීර්තිනාමයට හානි කිරීම සම්බන්ධයෙන් රුපියල් මිලියන 100ක වන්දි ඉල්ලා නඩු පවරන බවට ද ඔහු අනතුරු අඟවා තිබෙනවා. එමෙන්ම අදාළ බලධාරීන් වෙත පැමිණිලි කිරීමට ද කටයුතු කරන බව සඳහන්.
මාධ්‍ය හමුවේදී අදහස් දක්වමින් හිටපු අමාත්‍යවරයා කියා සිටියේ තමන් සහ අදාළ භික්ෂූන් වහන්සේ එකම අවස්ථාවක හෝටලයට පැමිණි බවට වැරදි අදහසක් ඇති වන අයුරින් දර්ශන ප්‍රචාරය කර ඇති බවයි.
“භික්ෂූන් වහන්සේ ගියේ එක දවසක. මම ගියේ ඊළඟ දවසේ. ඒ වගේ විකෘති කරපු පණිවිඩයක් තමයි ජනතාව අතරට මුදාහැරියේ” යනුවෙන් ඔහු ප්‍රකාශ කර තිබෙනවා.
මෙම සිද්ධිය සම්බන්ධයෙන් ඉදිරි නීතිමය ක්‍රියාමාර්ග ගන්නා බව ද හිටපු අමාත්‍ය සරත් වීරසේකර මහතා වැඩිදුරටත් අවධාරණය කර තිබෙනවා.
මේ පුවත තව අයට බලන්න
