විපක්ෂය අයවැයට පිළිතුරු දෙන හර්ෂගේ පළමු කතාව සජිත් කපාදමලා!
දිගුකාලීන පාර්ලිමේන්තු සම්ප්‍රදායෙන් බැහැර වෙමින්, 2027 අයවැය සඳහා විපක්ෂයේ ආරම්භක පිළිතුරු කතාව සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා විසින් සිදු නොකළේ ඇයිදැයි අග්‍රාමාත්‍ය හරිනි අමරසූරිය ප්‍රශ්න කර තිබේ.
අද පාර්ලිමේන්තුව අමතමින් අග්‍රාමාත්‍යවරිය කියා සිටියේ 2020 වසරේදී තමා පාර්ලිමේන්තුවට පිවිසි දා සිට වාර්ෂික අයවැය ඉදිරිපත් කිරීමෙන් අනතුරුව විපක්ෂය වෙනුවෙන් විවාදය ආරම්භ කරනු ලැබුවේ සම්ප්‍රදායානුකූලව මන්ත්‍රී හර්ෂ ද සිල්වා විසින් බවයි.
“සාමාන්‍යයෙන් විපක්ෂය වෙනුවෙන් අයවැය විවාදය ආරම්භ කරන්නේ විපක්ෂ මන්ත්‍රී හර්ෂ ද සිල්වා මහතායි. 2020 වසරේ මම පාර්ලිමේන්තුවට පැමිණි දා සිට මෙය සම්ප්‍රදායක් ලෙස පැවතුණා. සාමාන්‍යයෙන් අපි සූදානම් වෙන්නේ ඔහුගේ අදහස් දැක්වීම්වලට පිළිතුරු දෙන්නයි. අපි ආණ්ඩුවේ සිටියත් විපක්ෂයේ සිටියත් අයවැය ඉදිරිපත් කිරීමකින් පසු ඔහුගේ ආරම්භක ප්‍රකාශයට සවන් දීමට සැමවිටම සූදානමින් සිටියා. නමුත් අද එම සම්ප්‍රදායේ වෙනසක් අපට දක්නට ලැබෙනවා,” යැයි ඇය පැවසුවාය.
එම වෙනස රජය විසින් පිළිගන්නා නමුත්, 2027 අයවැය පිළිබඳව මන්ත්‍රී හර්ෂ ද සිල්වාගේ අදහස් දැනගැනීමට තමන් තවදුරටත් උනන්දුවෙන් පසුවන බව අග්‍රාමාත්‍යවරිය සඳහන් කළාය.
සමගි ජන බලවේගයේ ආර්ථික ප්‍රතිපත්තිවල වෙනසක් සිදුවී ඇත්ද, නැතහොත් එම පක්ෂය තවදුරටත් සිය පෙර ස්ථාවරයේම රැඳී සිටින්නේද යන්න තහවුරු කර ගැනීමට ඔහුගේ අදහස් දැක්වීම උපකාරී වනු ඇති බව ඇය කියා සිටියාය.
විවාදය ආරම්භයේදී විපක්ෂ නායක සජිත් ප්‍රේමදාස සිදු කළ ප්‍රකාශයන් පිළිබඳව සඳහන් කරමින් අග්‍රාමාත්‍යවරිය චෝදනා කළේ, ආර්ථිකය, ජාත්‍යන්තර මූල්‍ය අරමුදල සහ ලෝක බැංකුව සම්බන්ධයෙන් ඔහු නොමඟ යවන සුළු ප්‍රකාශ ඉදිරිපත් කළ බවයි.
මෙම ආර්ථික කරුණු සම්බන්ධයෙන් සමගි ජන බලවේගයේ අනෙකුත් පාර්ලිමේන්තු මන්ත්‍රීවරුන් ද විපක්ෂ නායකවරයාගේ ස්ථාවරයම දරන්නේද යන්න තහවුරු කර ගැනීම සඳහා මන්ත්‍රී හර්ෂ ද සිල්වාගේ විවාද දායකත්වය අපේක්ෂාවෙන් රජය බලා සිටින බව ඇය වැඩිදුරටත් පැවසුවාය.
මේ පුවත තව අයට බලන්න
