රංජන් ජයලාල් ශ්‍රේෂ්ඨ නායකයෙක්… ඔහු කටට එන දේ ඔහේ කියනවා… අල්ලස් ගත් බවට සාක්කි නෑ… පක්ෂෙන් අවවාද කළා…ඇමති ලාල්කාන්ත…
කඩුවෙල නගර සභාවේ නගරාධිපති රන්ජන් ජයලාල් මහතා විසින් සිදුකරන ලද ආන්දෝලනාත්මක ප්‍රකාශය ජාතික ජන බලවේගය හෝ රජය කිසිසේත්ම අනුමත නොකරන බවත්, පවතින දූෂණ විරෝධී නීතියට අනුව ඉදිරි උත්සව සමයේදී රාජ්‍ය සේවකයන් කිසිදු ආයතනයකින් තෑගි භෝග ලබා නොගත යුතු බවත් කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ.ඩී. ලාල් කාන්ත මහතා අවධාරණය කරයි.
මාධ්‍ය හමුවකට එක්වෙමින් අමාත්‍යවරයා සඳහන් කළේ, අදාළ ප්‍රකාශය රන්ජන් ජයලාල් මහතා විසින් සිය මතය අනුව නොසැලකිලිමත් ලෙස කළ එකක් මිස පක්ෂයේ හෝ ආණ්ඩුවේ ප්‍රතිපත්තිය නොවන බවයි.
පවතින දූෂණ විරෝධී පනතේ විධිවිධාන සිහිපත් කරමින් අමාත්‍යවරයා මෙසේ ද පැවසීය:
"අල්ලස් හෝ දූෂණ විරෝධී නව පනතට අනුව කිසිවෙකුට සුළු තෑග්ගක්වත් ලබා ගැනීමට නීතියෙන් ඉඩක් නැහැ. සියලුම රාජ්‍ය නිලධාරීන්ගෙන් මෙන්ම මහජන නියෝජිතයන්ගෙන් අප ඉල්ලා සිටින්නේ ඉදිරි නත්තල් උත්සව සමයේ විවිධ සමාගම්වලින් හෝ ආයතනවලින් ලබාදෙන කිසිදු තෑග්ගක් භාර නොගන්නා ලෙසයි. එවැනි තෑගි ලබා ගැනීම පවා නීතිය ඉදිරියේ වරදක් බවට පත්වෙනවා. අවශ්‍ය නම් තේ එකක් බීම පවා අල්ලසක් ලෙස අර්ථ දැක්වීමේ හැකියාව නීතිය තුළ පවතිනවා. එබැවින් රන්ජන් ජයලාල් සහෝදරයා කළ ප්‍රකාශය මුළුමනින්ම වැරදියි, එය අපි එකහෙළා ප්‍රතික්ෂේප කරනවා."
එම ප්‍රකාශය මුල් කරගනිමින් රන්ජන් ජයලාල් මහතා ඉවත් කළ යුතු බවට එල්ල වන ඉල්ලීම් ප්‍රතික්ෂේප කළ ලාල් කාන්ත මහතා, ඔහු මෙරට කම්කරු අරගල ඉතිහාසයේ අතිමහත් කැපකිරීම් කළ ශ්‍රේෂ්ඨ චරිතයක් බව පෙන්වා දුන්නේය.
"ඔහු සැබවින්ම අල්ලස් ඉල්ලීමක් කළේ නැහැ. ඉදිරියේදී මෙවැනි අසංවේදී ප්‍රකාශ සිදු නොකරන ලෙස පක්ෂය විසින් ඔහුට දැඩිව අවවාද කරනු ඇති. අතීතයේදී අප කියූ ඇතැම් කටකැඩිච්ච කතාවලටත් පක්ෂයෙන් අවවාද ලැබී තිබෙනවා. එබැවින් මෙය ඔහුව නෙරපා හැරීමට තරම් හේතුවක් නොවන නමුත්, ඔහු යම් අල්ලසක් ලබාගෙන ඇත්නම් නීතිය ක්‍රියාත්මක කිරීමට කිසිදු බාධාවක් නැහැ," යනුවෙන් අමාත්‍යවරයා වැඩිදුරටත් කියා සිටියේය.
තෑගි හෝ මුදල් ලබාගැනීම සාමාන්‍ය කරුණක් බව හැඟවෙන පරිදි රන්ජන් ජයලාල් මහතා සිදුකළ ප්‍රකාශයක් සහිත වීඩියෝ පටයක් සමාජ මාධ්‍ය ඔස්සේ සංසරණය වීමත් සමඟ විපක්ෂ දේශපාලන කණ්ඩායම් සහ සිවිල් සංවිධාන ඊට දැඩි විරෝධය පළ කළහ. 2023 අංක 9 දරන දූෂණ විරෝධී පනත යටතේ රාජ්‍ය සේවකයින්ට සහ මහජන නියෝජිතයින්ට කිසිදු පාර්ශ්වයකින් ත්‍යාග, අල්ලස් හෝ අයුතු ප්‍රතිලාභ ලබාගැනීම සපුරා තහනම් කර ඇති පසුබිමක, මෙවැනි ප්‍රකාශයක් නිකුත් වීම දැඩි විවේචනයට හේතු විය.
