‘මුදල් ලැබුනා ස්තුතියි..’ - නාමල් ක්රිෂ් සමාගමට ලිපියක් යවලා!
කොළඹ කොටුව ට්‍රාන්ස්වර්ක්ස් චතුරශ්‍රයේ පිහිටි අක්කර 4.3 ක ඉඩම බදු පදනම මත ලබාගැනීමේ කටයුතු කඩිනම් කරදීම වෙනුවෙන් ‘ක්රිෂ්’ සමාගම විසින් අල්ලස් වශයෙන් ලබාදුන් බව කියන රුපියල් මිලියන 70 ක මුදල ලැබුණු බව තහවුරු කරමින් නාමල් රාජපක්ෂ මහතා එම සමාගම වෙත ස්තුති ලිපියක් යොමු කර ඇතැයි අල්ලස් හෝ දූෂණ විමර්ශන කොමිෂන් සභාව අධිකරණය හමුවේ අනාවරණය කළේය.
මෙම නඩුව කොළඹ ප්‍රධාන මහෙස්ත්‍රාත් අසංග එස්. බෝදරගම මහතා හමුවේ කැඳවූ අවස්ථාවේදී අල්ලස් කොමිසමේ නිලධාරීන් විසින් මේ බව දැනුම් දෙන ලදී.
එහිදී අල්ලස් කොමිසම අධිකරණයට පෙන්වා දුන්නේ, නිමල් පෙරේරා නමැත්තා සභාපතිත්වය දැරූ ‘සිලෝන් ප්‍රිමියර් ස්පෝර්ට්ස් ලිමිටඩ්’ ක්‍රීඩා සමාජයේ ගිණුමට ක්රිෂ් සමාගම මගින් අදාළ මුදල බැර කර ඇති බවත්, පසුව එම මුදල සැකකාර නාමල් රාජපක්ෂ මහතා වෙත ලැබී ඇති බවත්ය.
2012 දෙසැම්බර් මස 15 වැනි දිනැතිව ක්රිෂ් සමාගම වෙත ලිපියක් යවමින් නාමල් රාජපක්ෂ මහතා අදාළ මුදල ලැබුණු බවට ස්තුති කර ඇති බව ද විමර්ශන නිලධාරීහු සඳහන් කළහ.
එම ලිපියේ අත්අකුරු පරීක්ෂා කිරීම සඳහා සැකකාර නාමල් රාජපක්ෂ මහතා බන්ධනාගාරයේ රඳවා සිටියදීම ඔහුගේ අත්අකුරු සාම්පල ලබාගෙන රජයේ රස පරීක්ෂකවරයා වෙත යොමු කිරීමට අවශ්‍ය අවසරය ලබාදෙන ලෙස ද අල්ලස් කොමිසම අධිකරණයෙන් ඉල්ලා සිටියේය.
නාගරික සංවර්ධන අධිකාරිය සතු කොළඹ කොටුවේ පිහිටි අදාළ වටිනා ඉඩම ක්රිෂ් සමාගමට පවරා ගැනීමට අවශ්‍ය අනුමැතිය කඩිනමින් ලබාගැනීම උදෙසා එම සමාගමේ ඉන්දීය ජාතික අධ්‍යක්ෂවරුන් වන අමිත් කට්‍යාල් සහ රාජේන්ද්‍ර ප්‍රසාද් ගුප්තා යන අය විසින් මෙම රුපියල් මිලියන 70 ක අල්ලස ලබා දී ඇති බවට චෝදනා එල්ල වී තිබේ.
අදාළ නඩුවේ තෙවැනි සහ සිව්වැනි සැකකරුවන් වන ජානකි සිරිවර්ධන සහ නාමල් රාජපක්ෂ යන අය බන්ධනාගාර නිලධාරීන් විසින් අධිකරණයට ඉදිරිපත් කිරීමෙන් අනතුරුව කරුණු දැක්වූ අල්ලස් කොමිසම, මෙම ගනුදෙනුව සමාගමේ සාමාන්‍ය ක්‍රියාදාමයෙන් බැහැරව සිදුවූවක් බවට ක්රිෂ් සමාගමේ ගණකාධිකාරීවරයා ප්‍රකාශයක් ලබා දී ඇති බව පැවසීය.
නිමල් පෙරේරා නමැත්තා එම සමාගමේ සේවාදායකයකු, සේවකයකු හෝ වෙනත් සේවාවක් සපයන්නකු නොවන පසුබිමක ඔහු වෙත මෙම මුදල ගෙවීමට සමාගම් අධ්‍යක්ෂ මණ්ඩලය නිර්දේශ කර තිබූ බව ද හෙළි විය.
එමෙන්ම 2012 වසරේ සිට ‘සිලෝන් ප්‍රිමියර් ස්පෝර්ට්ස් ලිමිටඩ්’ මගින් රගර් තරගාවලි පවත්වා තිබුණ ද, මෙම රුපියල් මිලියන 70 ක මුදල රගර් ක්‍රීඩාව හෝ කිසිදු ක්‍රීඩා ප්‍රවර්ධනයක් සඳහා යෙදවූ බවට හෝ අනුග්‍රාහකත්වයක් ලෙස ලබාදුන් බවට කිසිදු සාක්ෂියක් ඉදිරිපත් වී නොමැති බව ද අල්ලස් කොමිසම වැඩිදුරටත් අධිකරණයට දැනුම් දුන්නේය.
මේ පුවත තව අයට බලන්න
