කලින් IMF විවේචනය කලත් ආණ්ඩුව ගත් පසු IMF සමගම ගියේ විකල්පයක් නොතිබූ නිසයි..- අගමැතිනි හරිනි CNN වෙත
ජාත්‍යන්තර මූල්‍ය අරමුදලේ වැඩසටහන සම්බන්ධයෙන් මීට පෙර සිය පක්ෂය විවේචනාත්මක ස්ථාවරයක පසුවුවද, ආණ්ඩුව භාරගැනීමෙන් අනතුරුව එම වැඩසටහන සමඟම ඉදිරියට යාමට සිදුවූයේ රට හමුවේ වෙනත් විකල්පයක් නොතිබූ බැවින් යැයි අග්‍රමාත්‍ය ආචාර්ය හරිනි අමරසූරිය මෙනවිය පවසයි.
CNN ජාත්‍යන්තර පුවත් සේවයේ 'Quest Means Business' වැඩසටහන සමඟ විශේෂ සාකච්ඡාවකට එක්වෙමින් රිචඩ් ක්වෙස්ට් නැගූ ප්‍රශ්නයකට පිළිතුරු දෙමින් අග්‍රමාත්‍යවරිය මේ බව සඳහන් කළාය.
මීට පෙර ශ්‍රී ලංකාව IMF වැඩසටහන් සමඟ කටයුතු කළ ආකාරය සම්බන්ධයෙන් යහපත් අත්දැකීම් නොතිබූ බැවින් තමන් ඊට අකමැත්තක් දැක්වූ නමුත්, නව රජය බලයට පත්වන විටත් අදාළ ගිවිසුම අත්සන් කර තිබූ බව ඇය සිහිපත් කළාය.
කෙසේ වෙතත්, බලයට පත්වීමෙන් පසු IMF නිලධාරීන් සමඟ සාකච්ඡා කර සිය ගැටලු ඉදිරිපත් කිරීමට හැකිවූ බවත්, යහපාලනය, දූෂණය පිටුදැකීම සහ දැඩි මූල්‍ය විනයක් පවත්වා ගැනීම පිළිබඳව ඔවුන් මතු කළ කරුණු සමඟ රජය ද එකඟ වූ බැවින් වැඩසටහන අඛණ්ඩව ඉදිරියට ගෙන යාමට තීරණය කළ බවත් ඇය පැවසුවාය.
මැතිවරණයෙන් පසු රටේ ස්ථාවරත්වය පවත්වාගෙන යාම සහ නව පාලනයක් ලෙස අසාර්ථක නොවන බව ඔප්පු කිරීම රජයේ ප්‍රමුඛ ඉලක්කය වූ බව ද ඇය අවධාරණය කළාය.
මීට අමතරව මැදපෙරදිග පවතින යුදමය ගැටුම් හමුවේ ශ්‍රී ලංකාවේ විදේශ ප්‍රතිපත්තිය පිළිබඳව ද අදහස් දැක්වූ අග්‍රමාත්‍යවරිය, මෙවැනි යුද්ධවලින් කිසිදු පාර්ශ්වයකට යහපතක් සිදුනොවන බවත්, කලාපීය සාමය සුරකිමින් යුද්ධය මෙරට සීමාවට ඇතුළුවීම වැළැක්වීම සඳහා ශ්‍රී ලංකාව දැඩි නොබැඳි පිළිවෙතක් අනුගමනය කරන බවත් ප්‍රකාශ කළාය.
ඉන්ධන සහ බලශක්ති මිල ඉහළ යාම අර්බුදයකින් ගොඩඑමින් පවතින ශ්‍රී ලංකාව වැනි ආර්ථිකයකට අවාසනාවන්ත තත්ත්වයක් බව ද ඇය පෙන්වා දුන්නාය.
එමෙන්ම නව ව්‍යවස්ථා සංශෝධනයක් පිළිබඳව අවධානය යොමු කරන්නේදැයි විමසූ අවස්ථාවේදී අග්‍රමාත්‍යවරිය සඳහන් කළේ, වත්මන් ව්‍යවස්ථාව 22 වතාවක් සංශෝධනය වී ඇති බැවින් එහි සැබෑ දෝෂ පවතින බවයි.
යුද්ධය අවසන් වුවද ගැටුම්වලට මුල් වූ මූලික හේතූන්ට විසඳුම් සෙවීම, විනිවිදභාවය සහ වගවීම තහවුරු වන තිරසර හා සියල්ලන් ඇතුළත් කරගත් සංවර්ධනයක් උදෙසා නව ව්‍යවස්ථා ප්‍රතිසංස්කරණයක් වෙත යොමුවීමේ දැඩි අවශ්‍යතාවක් පවතින බව ද අග්‍රමාත්‍ය හරිනි අමරසූරිය මෙනවිය වැඩිදුරටත් කියා සිටියාය.
