රනිල්ගේ ආරක්ෂකයාට පහරදුන් මාධ්‍යවේදියා අත්අඩංගුවට!
හිටපු ජනාධිපති රනිල් වික්‍රමසිංහ මහතාගේ ප්‍රභූ ආරක්ෂක නිලධාරියෙකුට සිය කැමරාවෙන් පහරදීමේ සිද්ධිය සම්බන්ධයෙන් පෞද්ගලික මාධ්‍ය ආයතනයක කැමරා ශිල්පියෙකු අද (01) කොම්පඤ්ඤවීදිය පොලිසිය මඟින් අත්අඩංගුවට ගෙන තිබේ.
සිද්ධිය සම්බන්ධයෙන් ප්‍රකාශයක් සටහන් කරගැනීම සඳහා පොලිසිය විසින් ඊයේ (30) සිදු කරන ලද දැනුම්දීමකට අනුව, නීතිඥවරයෙකු සමඟ අද පෙරවරුවේ කොම්පඤ්ඤවීදිය පොලිස් ස්ථානය වෙත පැමිණි අවස්ථාවේදී සැකකාර කැමරා ශිල්පියා මෙලෙස අත්අඩංගුවට ගෙන ඇති බව පොලිසිය සඳහන් කරයි.
කොළඹ කොටුව මහේස්ත්‍රාත් අධිකරණයේ ඊයේ (30) පැවති නඩු කටයුත්තක් සඳහා හිටපු ජනාධිපති රනිල් වික්‍රමසිංහ මහතා පැමිණි අවස්ථාවේදී, මාධ්‍ය ආවරණයේ නිරතව සිටි මෙම කැමරා ශිල්පියා සිය වීඩියෝ කැමරාවෙන් ප්‍රභූ ආරක්ෂක නිලධාරියාගේ මුහුණට පහර දෙන ආකාරය අසල සිටි සෙසු මාධ්‍යවේදීන්ගේ කැමරාවල සටහන්ව තිබිණි.
අනතුරුව එම දර්ශන සමාජ මාධ්‍ය ඔස්සේද දැඩි කතාබහක් නිර්මාණය කරමින් සංසරණය විය.
මෙම සිදුවීමෙන් පහරකෑමට ලක්ව තුවාල ලබා ඇත්තේ පොලිස් ප්‍රභූ ආරක්ෂක කොට්ඨාසයට අනුයුක්තව සේවය කරන පොලිස් සැරයන් ඒ. එච්. මහේෂ් රන්ජන් නමැති නිලධාරියාය.
තුවාල ලැබූ පොලිස් සැරයන්වරයා මේ වන විට නාරාහේන්පිට පොලිස් රෝහලට ඇතුළත්ව නේවාසිකව ප්‍රතිකාර ලබමින් පසුවන අතර, අත්අඩංගුවට ගත් සැකකරු අධිකරණයට ඉදිරිපත් කිරීමට කොම්පඤ්ඤවීදිය පොලිසිය වැඩිදුර නීතිමය පියවර ගනිමින් සිටී.
මේ පුවත තව අයට බලන්න
