මෙරට කාන්තා දේශපාලනඥවරියන්ට ‘DeepFake ප්රහාර’... එය ප්රජාතන්ත්රවාදයට තර්ජනයක් - අගමැතිනි
ශ්රී ලංකාවේ කාන්තා දේශපාලන නායිකාවන් ඉලක්ක කරගනිමින් ව්යාජ ඡායාරූප සහ දෘශ්ය නිර්මාණ (Deepfake images) නිර්මාණය කර ප්රචාරය කිරීමේ ප්රවණතාවක් පවතින බවත්, එය රටේ ප්රජාතන්ත්රවාදයට මෙන්ම එහි ක්රියාකාරීත්වයට එල්ල වී ඇති බරපතළ තර්ජනයක් බවත් අග්රාමාත්ය ආචාර්ය හරිනි අමරසූරිය මෙනෙවිය අනාවරණය කළ බව අප පුවත්පත වාර්තා කර සිටී.
පාර්ලිමේන්තුව අමතමින් අග්රාමාත්යවරිය සඳහන් කළේ, මෙය ලොව පුරා පවතින ගෝලීය අර්බුදයක් බවත්, මෙවැනි තාක්ෂණික ප්රචණ්ඩත්වයන් සඳහා පහසුකම් සලසන සමාජ මාධ්ය වේදිකාවන් මෙම තත්ත්වය පිළිබඳව මීට වඩා දැඩි වගකීමකින් සහ අවධානයකින් යුතුව කටයුතු කළ යුතු බවත්ය.
දේශපාලන පසුබිම හෝ දේශපාලන හා මතවාදී බැඳීම් කුමක් වුව ද, ලොව පුරා ප්රසිද්ධ රාජ්ය තනතුරු දරන කාන්තාවන් මෙම ගැටලුවට මුහුණ දෙමින් සිටින බව ඇය පෙන්වා දුන්නාය.
"මෙරට කාන්තා දේශපාලන නායිකාවන් ඉලක්ක කර ගනිමින් ඩීප්ෆේක් තාක්ෂණය යොදාගන්නා ආකාරය සවිස්තරාත්මකව දැක්වෙන ලිපියක් මට ලැබුණා. කාන්තා දේශපාලන නායිකාවන් ලෙස අප මෙවැනි තනතුරුවලට පත්වන විට, මෙවැනි ආකාරයේ දැඩි ප්රතිරෝධයන් සහ පසුබෑම් බලාපොරොත්තු විය යුතු බව අපි හොඳින්ම දන්නවා," යැයි ඇය ප්රකාශ කළාය.
තවද, මෙය තනි පුද්ගලයෙකුට හෝ කිසියම් එක් රටකට පමණක් විසඳිය හැකි අභියෝගයක් නොවන බවත්, ඊට එරෙහිව ගෝලීය වශයෙන් ඒකාබද්ධ විසඳුම් සෙවිය යුතු බවත් අග්රාමාත්යවරිය අවධාරණය කළාය.
තාක්ෂණික ප්රචණ්ඩත්වයට ඉඩහසර සලසන ඩිජිටල් හා සමාජ මාධ්ය වේදිකාවන් මෙන්ම තාක්ෂණික ක්ෂේත්රයේ ප්රවීණයන් ද මෙම ගැටලුව වඩාත් බැරෑරුම් ලෙස සලකා, ඊට එරෙහිව සුදුසු ආරක්ෂක විධිවිධාන කඩිනමින් හඳුන්වා දීමට පියවර ගත යුතු බවද අග්රාමාත්යවරිය වැඩිදුරටත් කියා සිටියාය.
මේ පුවත තව අයට බලන්න
