ශිරන්ති හිර වෙයි.. බදු වංචා කර බස් ගෙන්නලා.. ලලිත් වීරතුංගත් ගෑවේ..
ක්රීඩා අමාත්යාංශයට අවශ්ය බස් රථ ආනයනය කරන මුවාවෙන් රුපියල් කෝටි ගණනක් වටිනා තීරුබදු කපා හැර ආනයනය කරන ලද සුඛෝපභෝගී බස් රථ දෙකක් හිටපු ජනාධිපති මහින්ද රාජපක්ෂගේ බිරිය වන ශිරන්ති රාජපක්ෂ යටතේ පවත්වාගෙන යන කාල්ටන් පෙර පාසලට දීමෙන් සිදු කරන ලද දූෂණ හා මූල්ය අක්රමිකතා සම්බන්ධයෙන් අල්ලස් හෝ දූෂණ විමර්ශන කොමිෂන් සභාව සහ අපරාධ පරීක්ෂණ දෙපාර්තමේන්තුව ඒකාබද්ධ විමර්ශනයක් ආරම්භ කර තිබේ.
මෙතෙක් කරන ලද විමර්ශන මඟින් අනාවරණය වූ කරුණු අනුව අපරාධ චෝදනා ගොනු කිරීමට ප්රමාණවත් කරුණු ඇති බවට නීතිපති දෙපාර්තමේන්තුව දුන් උපදෙස් අනුව පොලිස් මූල්ය විමර්ශන ඒකකය මඟින්ද මේ අක්රමිකතා සම්බන්ධයෙන් විධිමත් විමර්ශනයක් ආරම්භ කර ඇත.
එසේම සිරිලිය පදනම හෙවත් සිරිලිය සවිය ජනාධිපති කාර්යාලය යටතේ පවතින කාන්තා සංවිධානයක් බවට ඒත්තු ගන්වා මේ මූල්ය අක්රමිකතාව සිදු කර ඇති බැවින් හිටපු ජනාධිපති ලේකම්වරයකු වන ලලිත් වීරතුංග හා ජනාධිපති ලේකම් කාර්යාලයේ අතිරේක ලේකම්වරයකු ලෙස කටයුතු කළ පුද්ගලයකු සම්බන්ධයෙන්ද එමඟින් විමර්ශනය කරමින් පවතී.
මේ අතර මහින්ද රාජපක්ෂ ජනාධිපති ධුරය දැරූ සමයේදී ජාතික ඉතිරිකිරීමේ බැංකුවෙන් දුන් රුපියල් ලක්ෂ සීයක මුදලක් සිරිලිය පදනම මඟින් අවභාවිත කිරීමක් සම්බන්ධයෙන්ද මූල්ය විමර්ශන ඒකකය මඟින් වෙනම පරීක්ෂණයක් ආරම්භ කර තිබේ.
සිරිලිය පදනම විසින් කොළඹ රිජ්වේ ආර්යා ළමා රෝහලට සී.ටී ස්කෑනර් යන්ත්රයක් පරිත්යාග කිරීමට අවශ්ය බව පෙන්වා දෙමින් ඉදිරිපත් වූ ලිපියක් අනුව විධිමත් අයුරින් කරුණු සොයාබැලීමකින් තොරව එවකට ජාතික ඉතිරිකිරීමේ බැංකුවේ සභාපතිවරයා විසින් දෙන ලද වාචික උපදෙස් අනුව එකී මුදල සිරිලිය පදනමට පරිත්යාග කොට ඇති බවත් එකී මුදලින් මිල දී ගත් බව අඟවා හිටපු ජනාධිපති මහින්ද රාජපක්ෂගේ පුත්රයකුගේ උපන්දිනය නිමිත්තෙන් එම සී.ටී. ස්කෑනර් යන්ත්රය රෝහලට පරිත්යාග කොට ඇති බවත් අනාවරණය වී තිබේ.
කෙසේ වෙතත් සැබැවින්ම එම ස්කෑනර් යන්ත්රය ලැබී ඇත්තේ චීන රජය විසින් ලංකා රජයට දුන් ආපසු ගෙවිය යුතු බැඳුම්කර ණය මුදලක් උපයෝගි කරගෙන වන බැවින් ඒ සම්බන්ධයෙන්ද නීතිපතිවරයා උපදෙස් දී ඇති අතර, සිරිලිය පදනමේ සභාපති ශිරන්ති රාජපක්ෂ ඇතුළු අධ්යක්ෂ මණ්ඩලය මෙන්ම ජාතික ඉතිරිකිරීමේ බැංකුවේ සභාපතිවරයා ලෙස කටයුතු කළ ප්රදීප් කාරියවසම් ඇතුළු වගකිව යුත්තන්ගෙන් ප්රකාශ ගෙන විමර්ශන පවත්වා අධිකරණයට කරුණු වාර්තා කිරීමට මූල්ය විමර්ශන ඒකකය පියවර ගනිමින් සිටියි.
ජාතික ඉතිරිකිරීමේ බැංකුවේ හිටපු සභාපති කාරියවසම් ඇතුළු පිරිසෙන් මේ දක්වා ගත් ප්රකාශ නීතිපති දෙපාර්තමේන්තුවට දී ඇති අතර, එහිදී ඉදිරි නෛතික පියවර ගැනීම සඳහා අතිරේක සොලිසිටර් ජනරාල් දිලීප පීරිස් ඇතුළු නීතිපති දෙපාර්තමේන්තුවේ නිලධාරි කණ්ඩායමක් ඒ ප්රකාශ සටහන් අධ්යයනය කරමින් සිටිති.
- Silumina
